ကမ္ဘောဇတိုင်း
.
လာမည့် စက်တင်ဘာလ ၂ ရက်တွင် ကျင်းပမည့် ဒုတိယအကြိမ် ရှမ်းပြည်နယ်လွှတ်တော်
အကြိမ် (၂၀) မြောက် ပုံမှန် အစည်းအဝေး ပထမနေ့တွင် ရှမ်းပြည်နယ်တရားလွှတ်တော် တရားသူကြီး
၂ ဦး ခန့်ထားနိုင်ရေးအတွက် အတည်ပြု ဆောင်ရွက်သွားမည်ဖြစ်ကြောင်း သိရသည်။
.
.
“ရှမ်းပြည်နယ်တရားလွှတ်တော် တရားသူကြီးတစ်ဦးက ဩဂုတ်လ ၂၈ ရက်မှာ
ပင်စင်ယူသွားပြီ ဖြစ်ပါတယ်။ နောက်တစ်ဦးကတော့ အောက်တိုဘာလ ၅ ရက်မှာ ယူဖို့ရှိပါတယ်။
ဒါပေမဲ့ လွှတ်တော်က ရွေးကောက်ပွဲပြီးမှ လုပ်ဖြစ်မှာ ဆိုတော့ ကြားမှာ တရားသူကြီး ခါးဆက်မပြတ်အောင်ရယ်၊
ရှမ်းပြည်နယ်က ကျယ်ဝန်းတဲ့အတွက် လုပ်သားပြည်သူတွေရဲ့ အမှုတွေ ကြန့်ကြာမှုမရှိအောင်
နောက် ပင်စင်ယူမယ့် ပုဂ္ဂိုလ်အတွက်ပါ ဖြည့်ဆည်းပြီး ၂ ယောက် ခန့်ထားမယ်လို့တော့ သိထားပါတယ်” ဟု ရှမ်းပြည်နယ်တရားလွှတ်တော်မှ
တာဝန်ရှိသူတစ်ဦးက ကမ္ဘောဇတိုင်းသို့ ပြောသည်။
လက်ရှိတွင် အသစ်ခန့်ထားမည့် တရားသူကြီး ၂ ဦး၏ အမည်စာရင်းကို
ရှမ်းပြည်နယ်ဝန်ကြီးချုပ်မှ တင်သွင်းခြင်း မရှိသေးသည့်အတွက် အတိအကျ မသိရှိရသေးဘဲ ယင်း
အငြိမ်းစားယူမည့် ရှမ်းပြည်နယ်တရားလွှတ်တော် တရားသူကြီး ၂ ဦးမှာ ဦးခင်မောင်ဌေးနှင့်
ဒေါ်ခင်မေတင့်တို့ဖြစ်ကာ ၎င်းတို့သည် ၂၀၁၁ ခုနှစ် ပထမအကြိမ် အစိုးရ လက်ထက်မှ စတင်၍
ရှမ်းပြည်နယ်တရားလွှတ်တော် တရားသူကြီးများအဖြစ် လက်ရှိ ရှမ်းပြည်နယ်တရားလွှတ်တော် တရားသူကြီးချုပ်
ဦးကြွယ်ကြွယ်နှင့်အတူ တာဝန်ထမ်းဆောင်ခဲ့သူများဖြစ်ကြောင်း သိရသည်။
.
ထို့အတူ ရှမ်းပြည်နယ်လွှတ်တော် တာဝန်ရှိသူတစ်ဦးကလည်း လာမည့်
စက်တင်ဘာလ ၂ ရက်တွင် ကျင်းပမည့် ဒုတိယအကြိမ် ရှမ်းပြည်နယ်လွှတ်တော် အကြိမ် (၂၀) မြောက်
ပုံမှန်အစည်းအဝေး၌ ရှမ်းပြည်နယ်တရားလွှတ်တော် တရားသူကြီး ၂ ဦး ခန့်ထားနိုင်ရေးအတွက်
လွှတ်တော်တွင် အတည်ပြုသွားရန် ရှိနေကြောင်း ပြောဆိုထားသည်။
.
၂၀၀၈ ခုနှစ် နိုင်ငံတော်ဖွဲ့စည်းပုံအခြေခံဥပဒေ၊ အခန်း (၆)၊ တရားစီရင်ရေး၊
ပုဒ်မ ၃၀၈၊ ပုဒ်မခွဲ (ခ) (၁) တွင် နိုင်ငံတော် သမ္မတသည် ပြည်ထောင်စုတရားသူကြီးချုပ်၊
သက်ဆိုင်ရာတိုင်းဒေသကြီး/ပြည်နယ်ဝန်ကြီးချုပ် တို့နှင့် ညှိနှိုင်းပြီး သက်ဆိုင်ရာတိုင်းဒေသကြီး/ပြည်နယ်တရားလွှတ်တော်
တရားသူကြီးချုပ်အဖြစ် ခန့်အပ်ရန် အမည်စာရင်း ပြုစု၍ ယင်းအမည်စာရင်းကိုလည်းကောင်း၊ သက်ဆိုင်ရာ
တိုင်းဒေသကြီး/ပြည်နယ်ဝန်ကြီးချုပ်သည် ပြည်ထောင်စု တရားသူကြီးချုပ်နှင့် ညှိနှိုင်းပြီး
သက်ဆိုင်ရာတိုင်းဒေသကြီး/ပြည်နယ်တရားလွှတ်တော် တရားသူကြီးများအဖြစ် ခန့်အပ်ရန် အမည်စာရင်းကို
ပြုစု၍ ယင်းအမည်စာရင်းများကို လည်းကောင်း သက်ဆိုင်ရာ တိုင်းဒေသကြီး/ပြည်နယ် လွှတ်တော်သို့
ပေးပို့ရမည်ဖြစ်ကြောင်း ပြဌာန်းဖော်ပြထားသည်။
.
