စိုင်းသိင်္ခသူ
.
တာချီလိတ်မြို့၊
ဆန်ဆိုင်း(ခ) ရပ်ကွက်၊ မြို့ပတ်လမ်းရှိ RED Bar စားသောက်ဆိုင်၌ ဩဂုတ်လ ၂၇ ရက်၊ ညနေ
၄ နာရီခွဲကျော်ခန့်တွင် အမျိုးသား တစ်ဦးသည် အရက် မူးလွန်ကာ မော်တော်ယာဉ်အား
မီးရှို့ခဲ့သဖြင့် ယာဉ်နှင့် အဆောက်အဦ မီးလောင်မှု ဖြစ်ပွားခဲ့ကြောင်း သိရသည်။
.
RED Bar
စားသောက်ဆိုင် ပိုင်ရှင် အိုက်သိုက် (ခ) စိုင်းအောင်ခမ်းသည် အရက်သေစာ
သောက်စားပြီးနောက် အမူးလွန်ကာ မော်တော်ယာဉ်အား မီးရှို့ခဲ့ခြင်း ဖြစ်ပြီး
မော်တော်ယာဉ်မှ တဆင့် အဆောက်အဦအား မီးကူးစက် လောင်ကျွမ်းခဲ့ခြင်း ဖြစ်သည်ဟု
ဆိုင်စောင့် ဖြစ်သူက ပြောကြားခဲ့ကြောင်း သိရသည်။
.
“
မီးရှို့တဲ့ သူကိုတော့ မဖမ်းမိသေးပါဘူး။ အမှု ဖွင့်ထားပါပြီ။” ဟု
တာချီလိတ်မြို့မရဲစခန်းမှ စခန်းမှူး ဒုရဲမှူး ကျော်ထွန်းနိုင်က ကမ္ဘောဇတိုင်းသို့
ပြောသည်။
.
ယင်း
မီးလောင်မှုအား မီးသတ်တပ်ဖွဲ့ဝင်များ၊ ရဲတပ်ဖွဲ့ဝင်များ၊ ဒေသခံ ပြည်သူများက
မီးငြိမ်းသတ်ခဲ့ပြီး မီးလောင်မှုကြောင့် မော်တော်ယာဉ်နှင့် အဆောက်အဦ
ပျက်ဆီးဆုံးရှုံးခဲ့ရကြောင်း သိရသည်။
.
အဆိုပါ
မော်တော်ယာဉ်အား မီးရှို့ခဲ့သူ အိုက်သိုက် (ခ) စိုင်းအောင်ခမ်းမှာ ထွက်ပြေး
တိမ်းရှောင်နေလျက် ရှိပြီး ၎င်းအား တာချီလိတ်မြို့မရဲစခန်းတွင် (ပ) ၃၂၃/၂၀၂၀၊
ပြစ်မှုဆိုင်ရာ ဥပဒေပုဒ်မ ၄၃၆ ဖြင့် အမှုဖွင့်၍ ဖမ်းဆီးရမိရေး ဆောင်ရွက်လျက်
ရှိကြောင်း သိရသည်။
