.
လွိုင်လင်မြို့တွင် ငွေကျပ်သိန်း ၇၀၀၀ ကျော် တန်ဖိုးရှိ စိတ်ကြွရူးသွပ်ဆေးပြားများကို သြဂုတ်လ ၂၄ ရက်၊ ညနေပိုင်းက ပိုင်ရှင်မဲ့အဖြစ် ဖမ်းမိခဲ့ကြောင်း သိရသည်။
.
 |
| Photo - IPRD |
လွိုင်လင်မြို့ အထွက်ရှိ တိုးဂိတ်တွင် လွိုင်လင် မြို့မရဲစခန်းမှ တပ်ဖွဲ့ဝင်များ ပါဝင်သော ပူးပေါင်းအဖွဲ့သည် ဖြတ်သန်းသွားလာနေသောယာဉ်များအား ရှာဖွေစစ်ဆေးနေစဉ် လွိုင်လင်မြို့ဘက်မှ တောင်ကြီးမြို့ဘက်သို့ မောင်းနှင်လာသော မော်တော်ယာဥ်သည် နောက်ဘက် (လွိုင်လင်မြို့တွင်း)သို့ ပြန်လည် မောင်းနှင်သွားသဖြင့် မသင်္ကာ၍ ပူးပေါင်းအဖွဲ့က လိုက်လံစစ်ဆေးရာ တိုးဂိတ်နှင့် တစ်မိုင်ခန့် အကွာတွင်ယာဉ်အား ကားလမ်းဘေးတွင် ရပ်တန့်ထားသည်ကိုတွေ့ရှိရခြင်း ဖြစ်ကြောင်း သိရသည်။
.
အဆိုပါယာဉ်အား စစ်ဆေးရာ ယာဥ်မောင်းအား တွေ့ရခြင်း မရှိဘဲ ယာဥ်ပေါ်တွင် WY စာတန်းပါ ပန်းရောင်ရူးသွပ်ဆေးပြား ၇၁၂၅၀၀ ပြား (ဒေသ ကာလတန်ဖိုးငွေ ၇၁၂၅၀၀၀၀၀ ကျပ်)အား တွေ့ရှိ၍ သိမ်းဆည်းရမိခဲ့ကြောင်း သိရသည်။
.
ယင်း သက်သေခံ မူးယစ်ဆေးဝါးများနှင့်၊ သက်သေခံပစ္စည်းများအား လွိုင်လင်မြို့မရဲစခန်းမှ ရှာဖွေပုံစံဖြင့် သိမ်းဆည်းပြီး အမှုဖွင့်၍ သယ်ဆောင်လာသူအား စုံစမ်းစစ်ဆေးလျှက်ရှိကြောင်း သိရသည်။
