တရုတ်နိုင်ငံအတွင်း လူကုန်ကူးခံရသည့် အမျိုးသမီးငယ်တစ်ဦး တိုက်ပေါ်မှ ခုတ်ချထွက်ပြေးရာမှ ခြေ ၂ ဘက်ကျိုး၍ ဆေးကုသမှုအတွက် အကူအညီများ လိုအပ်နေ - Kanbawza Tai News

Breaking

ကမ္ဘောဇတိုင်းသတင်းဂျာနယ်သည် တောင်ကြီးမြို့တွင် အခြေစိုက်၍ ထုတ်ဝေခွင့်အမှတ် (မြဲ-၀၁၀၇၉)ဖြင့် ဆောင်ရွက်နေသည့် တရားဝင် သတင်းမီဒီယာ တစ်ခု ဖြစ်ပါသည်။

Wednesday, August 12, 2020

တရုတ်နိုင်ငံအတွင်း လူကုန်ကူးခံရသည့် အမျိုးသမီးငယ်တစ်ဦး တိုက်ပေါ်မှ ခုတ်ချထွက်ပြေးရာမှ ခြေ ၂ ဘက်ကျိုး၍ ဆေးကုသမှုအတွက် အကူအညီများ လိုအပ်နေ


မင်းဇော်မင်း
.
တရုတ်နိုင်ငံ၊ ကျန်ရှင်းပြည်နယ်တွင် လူကုန်ကူးခံရသူ အမျိုးသမီးတစ်ဦး တိုက်ပေါ်မှ ခုတ်ချထွက်ပြေးရာမှ ခြေ ၂ ဘက် ကျိုး၍ ဆေးကုသမှုခံယူလျက်ရှိရာ အခက်အခဲများ ကြုံတွေ့နေရသဖြင့် ရွှေလီအခြေစိုက် မိုးမဖဖောင်ဒေးရှင်းမှ မူဆယ် လူကုန်ကူးမှု တားဆီးနှိမ်နင်းရေးရဲတပ်ဖွဲ့နှင့် ဆက်သွယ်ကာ ကူညီဆောင်ရွက်ပေးလျက်ရှိသည်ဟု သိရသည်။
.

.
“တရုတ်ယောက်ျားတော့ မယူနိုင်ဘူး။ သေ‌ရင် သေပါစေ မထူးဘူးဆိုပြီး လူလစ်တာနဲ့ ပြတင်းပေါက်က ခုန်ချခဲ့တာ။ တခြား ကလေးမ ၂ ယောက်ကိုလည်း ကယ်တင်နိုင်ခဲ့တယ်။ တခြား ၂ ယောက်ကိုတော့ ဘယ်ပို့လိုက်မှန်း မသိဘူးလို့ ပြောတယ်။ အခုတော့ ဒီမနက်အစော ဖုန်းဆက်လာတယ်။ တရုတ်ရဲတွေက ဆေးကုသပေးမယ် ပြောသလို ဆေးရုံက ဆရာဝန် ၁၀ ယောက်ကလည်း မနက်ဖြန် ခွဲစိပ်ပေးမယ်ဆိုပြီး လာကြည့်တယ်လို့ သိရတယ်” ဟု မိုးမခဖောင်ဒေးရှင်း နာယက ဒေါ်မိုးမခက ကမ္ဘောဇတိုင်းသို့ ပြောသည်။
.
အဆိုပါ ပြတင်းပေါက်မှ ခုန်ချထွက်ပြေးပြီး ဆေးကုသမှု ခံယူနေသူမှာ ပဲခူးတိုင်းဒေသကြီး၊ ကြို့ပင်ကောက်မြို့နယ်မှ အသက် ၂၅ နှစ်အရွယ် အမျိုးသမီးဖြစ်ပြီး ၎င်းနှင့်အတူ အခြား ရွယ်တူအမျိုးသမီး ၅ ဦးခန့် ရှိနေကာ တရုတ်မယား အဖြစ် အတင်းပေးစားခြင်း၊ ရိုက်နှက်ခြင်း၊ အစားမကျွေးဘဲ ပိတ်လှောင်ခြင်းများ ပြုလုပ်ထားသဖြင့် အားလုံး လွတ်မြောက်နိုင်ရေးအတွက် ၎င်းမှ ဇူလိုင်လ ၁၂ ရက်၊ မွန်းလွဲ ၁ နာရီခန့်က တိုက်ပေါ်မှ ခုန်ချခဲ့ခြင်းဖြစ်ကြောင်း သိရသည်။
.
ထိုသို့ ခုန်ချမှုကြောင့် ယင်းအမျိုးသမီးတွင် ခြေ ၂ ဘက် ကျိုးသွားခဲ့သဖြင့် ဆေးရုံသို့ တက်ရောက်ဆေးကုသမှု ခံယူနေ ခြင်းဖြစ်ပြီး ဆေးကုသခ ယွမ် ၄၀၀၀၀ တောင်းခံနေသဖြင့် မတတ်နိုင်ဘဲ မြန်မာနိုင်ငံသို့ ပြန်လည်ပို့ဆောင်ပေးရေး ကိုသာ တောင်းခံနေရာမှ မိုးမခဖောင်ဒေးရှင်းသို့ ဆက်သွယ်အကူအညီတောင်းခံခဲ့ခြင်းဖြစ်သည်ဟု သိရသည်။
.
“သံရုံးနဲ့ ရွှေလီလူကုန်ကူးရဲတပ်ဖွဲ့ကို ကယ်ဆယ်ကူညီဆောင်ရွက်ပေးနိုင်ရေး စာပို့အကူအညီတောင်းခံထားပါတယ်” ဟု မူဆယ် လူကုန်တားရဲတပ်ဖွဲ့မှ ရဲမှူးမင်းနိုင်က ပြောသည်။
.
အဆိုပါ ကျန်ရှင်းပြည်နယ်မှာ ရွှေလီမြို့မှ ၃ ရက် ၃ ည ခန့် ကားမောင်းသွားရသည့် အကွာအဝေးရှိ တရုတ်နိုင်ငံ အရှေ့ပိုင်း ပြည်နယ်တစ်ခုဖြစ်ကာ ယင်း တိုက်ပေါ်ခုန်ချခဲ့သူကို သွားရောက်ခေါ်ယူခဲ့သည့် အချိန်က တရုတ်ရဲတပ်ဖွဲ့မှ  တွေ့ရှိကယ်တင်နိုင်ခဲ့သူ အခြား အမျိုးသမီး ငယ် ၂ ဦးမှာ ရဲစခန်းတွင် ရှိနေကြောင်းသိရသဖြင့် ဆက်လက်ကယ်ဆယ် ကူညီ နိုင်ရေးဆောင်ရွက်နေကြောင်း သိရသည်။
.

No comments:

Post a Comment

Journal Download

Photo of three cats

About