အင်းလေး ဖောင်တော်ဦးဗုဒ္ဓရုပ်ပွားတော်များ ဒေသစာရီကြွချီ အပူဇော်ခံတော့မည် မဟုတ်

မင်းဇော်မင်း

.

ရှမ်းပြည်နယ်၏ အထင်ကရ ပွဲတော်တစ်ခု ဖြစ်သည့် အင်းလေးဖောင်တော်ဦး ဗုဒ္ဓ ရုပ်ပွားတော်များ အင်းလေးဒေသ ၂၁ ဌာနသို့ ဒေသစာရီ ကြွချီပူဇော်ခံခြင်းကို ယခုနှစ်တွင် ပြုလုပ်တော့မည် မဟုတ်ကြောင်း သိရသည်။

.

အင်းလေးဖောင်တော်ဦး ဗုဒ္ဓ ရုပ်ပွားတော်များ ဒေသစာရီ ကြွချီ ပူဇော်ခံရေးနှင့် ပတ်သက်၍ ဩဂုတ်လ ၁၆ ရက်၊ နံနက်ပိုင်းက ညောင်ရွှေမြို့နယ်ရှိ အင်းလေးဖောင်တော်ဦးဘုရား ထိန်ထိန်လင်းကျောင်း၌ ကျင်းပသည့် ဩဝါဒစရိယဆရာတော်ကြီးများ၊ ဌာနဆိုင်ရာ တာဝန်ရှိသူများ၊ ဂေါပက အဖွဲ့များ ပြုလုပ်သည့် အစည်းအဝေး အပြီးတွင် ယင်းကဲ့သို့  ဒေသစာရီ ကြွချီ ပူဇော်ခံခြင်း မပြုတော့ကြောင်း ဆုံးဖြတ်ခဲ့ခြင်း ဖြစ်သည်။

.

အင်းလေးဖောင်တော်ဦး ဗုဒ္ဓ ရုပ်ပွားတော်များသည် နှစ်စဉ် သီတင်းကျွတ်လဆန်း ၁ ရက်မှ သီတင်းကျွတ် လပြည့်ကျော် ၃ ရက်ထိ အင်းလေးဒေသ ၂၁ ဌာနသို့ ဒေသစာရီ ကြွချီပူဇော်ခံခဲ့သော်လည်း ယခုနှစ်တွင် COVID-19 ဖြစ်ပွားမှု ကာကွယ်ထိန်းချုပ်နေသည့် ကာလဖြစ်ခြင်း၊ လူစုလူဝေးနှင့် ပွဲလမ်းသဘင်များကို ရှောင်ကြဉ်ခြင်း စသည်တို့ကြောင့် ဒေသစာရီ ကြွချီ ပူဇော်ခံခြင်း မပြုတော့ခြင်း ဖြစ်ကြောင်း သိရသည်။