အောင်ပန်းတွင် အမျိုးသားတစ်ဦး ထွေလာဂျီပေါ်မှ ပြုတ်ကျ

စုလှိုင်

.

ကလောမြို့နယ်၊ အောင်ပန်းမြို့၊ သရက်ပုကျေးရွာတွင် ယနေ့ ဩဂုတ်လ ၂၃ ရက်၊ ညနေပိုင်းက အမျိုးသားတစ်ဦး မောင်းနှင်နေသော ထွေလာဂျီပေါ်မှ ပြုတ်ကျ၍ ထိခိုက်ဒဏ်ရာများ ရရှိခဲ့ကြောင်း သိရသည်။

.

.

အောင်ပန်းမြို့၊ သရက်ပုကျေးရွာနေ ယာဉ်မောင်း ထွေးမောင် မောင်းနှင်ပြီး‌ နောက်တွင် ရာဇာ လိုက်ပါစီးနင်းလာသည့် တစ်လုံးထိုး ထွေလာဂျီယာဉ်သည် ဩဂုတ်လ ၂၃ ရက်၊ ညနေ ၄ နာရီခန့်က ပြည်ထောင်စုလမ်းမကြီးအတိုင်း အောင်ပန်းဘက်မှ ဟဲဟိုးဘက်သို့ မောင်းနှင်လာစဉ် သရက်ပုကျေးရွာ၊ မိုင်တိုင်အမှတ် (၈၅/၂) နှင့် (၈၅/၃) ကြား အရောက်တွင် နောက်မှ စီးနင်းလာသူ ရာဇာသည် ယာဉ်ပေါ်မှ ပြုတ်ကျသဖြင့် ယာဘက်ဦးခေါင်းဂျိုစောင်း ဖူးရောင် နာကျင်ဒဏ်ရာ၊ နှာခေါင်းသွေးထွက်ဒဏ်ရာ၊ အပေါ်နှုတ်ခမ်း ဖူးရောင်ဒဏ်ရာ၊ ယာဘက်ခြေမ၊ ခြေသန်း ပွန်းပဲ့ဒဏ်ရာ၊ ဝဲခြေခုံ ပွန်းပဲ့ဒဏ်ရာ (စိုးရိမ်ရ)များ ရရှိခဲ့ပြီး အောင်ပန်းတိုက်နယ်ဆေးရုံသို့ ပို့ဆောင်ခဲ့ကြောင်း သိရသည်။

.

“ယာဉ်မောင်းကို ပုဒ်မ ၂၇၉ /၃၃၈ နဲ့ အမှုဖွင့်ထားပါတယ်” ဟု အမှတ် (၁၁၇) ယာဉ်ထိန်းတပ်ဖွဲ့စု (ကလော) တပ်စိတ် ရုံးမှ ရဲအုပ်မျိုးလှိုင်ဝင်းက ကမ္ဘောဇတိုင်းသို့ ပြောသည်။

.

အဆိုပါ အမျိုးသား ယာဉ်ပေါ်မှ ပြုတ်ကျမှုနှင့် ပတ်သက်၍ ယာဉ်မဆင်မခြင် မောင်းနှင်သူ ယာဉ်မောင်း ထွေးမောင် အား အောင်ပန်းနယ်မြေရဲစခန်းတွင် ယာဉ် (ပ) ၄၈/၂၀၂၀၊ ရာဇသတ်ကြီးဥပဒေပုဒ်မ ၂၇၉/၃၃၈ ဖြင့် အမှုဖွင့်စစ်ဆေး ဆောင်ရွက်လျက်ရှိကြောင်း သိရသည်။

.
[ဖြည့်စွက်ချက်] လူနာမှာ ရရှိ​သော ဒဏ်ရာ​ကြောင့် ည ၈ နာရီခန့်က ​သေဆုံးသွားပြီ ဖြစ်​ကြောင်း ​အောင်ပန်းနယ်​မြေရဲစခန်း၊ စခန်းမှူးထံမှ သိရသည်။