အောင်ပန်းတွင် ကားနှင့် ဆိုင်ကယ် ပွတ်တိုက်ရာမှ ရဟန်းတစ်ပါး စိုးရိမ်ရဒဏ်ရာများ ရရှိ

ခွန်သန်းအောင်

.

ကလောမြို့နယ်၊ အောင်ပန်းမြို့တွင် ဩဂုတ်လ ၁၄ ရက်၊ ညနေပိုင်းက မော်တော်ယာဉ်နှင့် မော်တော် ဆိုင်ကယ် ပွတ်တိုက်ရာမှ မော်တော်ဆိုင်ကယ်ပေါ်ပါ ရဟန်းတစ်ပါး စိုးရိမ်ရဒဏ်ရာများ ရရှိခဲ့ကြောင်း သိရသည်။

.

.

အောင်ပန်းမြို့၊ လွယ်မခံကျေးရွာအနီး၊ အောင်ပန်း-ပင်းတယကားလမ်းပေါ်တွင် ဩဂုတ်လ ၁၄ ရက်၊ ညနေ ၃ နာရီ အချိန်ခန့်က အောင်ပန်းဘက်မှ ပင်းတယဘက်သို့ အောင်ပန်းမြို့၊ စေတီကုန်းကျေးရွာကျောင်းတိုက် ကျောင်းထိုင် ဆရာတော် အရှင်ပညာဝံသ မောင်းနှင်လာသော ဆိုင်ကယ်သည် လားရာတူ ဟဲဟိုးမြို့၊ ဘော်နင်းကျေးရွာအုပ်စုနေ ဇော်ဝင်း မောင်းနှင်လာသည့် မော်တော်ယာဉ်နှင့် လက်ဝဲဘက်လမ်းအကွေ့တွင် ပွတ်တိုက်မိသဖြင့် အရှင်ပညာဝံသ တွင် ဦးခေါင်းနောက်စေ့ပေါက်ပြဲဒဏ်ရာ၊ နှာခေါင်းသွေးထွက်ဒဏ်ရာများဖြင့် စိုးရိမ်ရ ဒဏ်ရာများရရှိခဲ့ပြီး အောင်ပန်း တိုက်နယ်ဆေးရုံသို့ ပို့ဆောင်ခဲ့ခြင်းဖြစ်ကြောင်း သိရသည်။

.

အဆိုပါ ယာဉ်မတော်တဆမှုမှ အရှင်ပညာဝံသနှင့် ဇော်ဝင်းတို့အား အောင်ပန်းနယ်မြေရဲစခန်းတွင် ယာဉ်(ပ) ၄၇/၂၀၂၀၊ ရာဇသတ်ကြီးပုဒ်မ ၂၇၉/၃၃၇/၃၃၈ တို့ဖြင့် အမှုဖွင့် အရေးယူဆောင်ရွက်လျက်ရှိကြောင်း သိရသည်။

.