၂၁ ရာစု ပင်လုံ ညီလာခံကို ဩဂုတ်လ ၁၉ ရက်တွင် ပြုလုပ်မည် - Kanbawza Tai News

Breaking

ကမ္ဘောဇတိုင်းသတင်းဂျာနယ်သည် တောင်ကြီးမြို့တွင် အခြေစိုက်၍ ထုတ်ဝေခွင့်အမှတ် (မြဲ-၀၁၀၇၉)ဖြင့် ဆောင်ရွက်နေသည့် တရားဝင် သတင်းမီဒီယာ တစ်ခု ဖြစ်ပါသည်။

Sunday, August 2, 2020

၂၁ ရာစု ပင်လုံ ညီလာခံကို ဩဂုတ်လ ၁၉ ရက်တွင် ပြုလုပ်မည်


စိုင်းသိင်္ခသူ
.
ပြည်ထောင်စုငြိမ်းချမ်းရေး ညီလာခံ -၂၁ ရာစု ပင်လုံကို လာမည့် ဩဂုတ်လ ၁၉ ရက်တွင် စတင်၍ ကျင်းပ ပြုလုပ်သွားမည် ဖြစ်ကြောင်း သိရသည်။
.
နေပြည်တော်ရှိ အမျိုးသား ပြန်လည်သင့်မြတ်ရေးနှင့် ငြိမ်းချမ်းရေးဗဟိုဌာန(NRPC) ၌ ဩဂုတ်လ ၁ ရက်က ပြုလုပ်သည့် အစိုးရနှင့် NCA သဘောတူ လက်မှတ်ရေးထိုးထားသည့် တိုင်းရင်းသား လက်နက်ကိုင် အဖွဲ့အစည်းများ (NCA-S EAO) ညှိနှိုင်းရေးအဖွဲ့တို့၏ အစည်းအဝေး အပြီး ညနေပိုင်းတွင် အစိုးရကိုယ်စားလှယ် နိုင်ငံတော်၏ အတိုင်ပင်ခံရုံး ဝန်ကြီးဌာန ညွှန်ကြားရေးမှူးချုပ် ဦးဇော်ဌေးက မီဒီယာများအား ယင်းကဲ့သို့ ပြောကြားခဲ့ခြင်း ဖြစ်သည်။
.
Photo - NCA-S EAO

“ တစ်ဖက်မှာလည်း နိုင်ငံရေးပါတီတွေ အနေနဲ့ ရွေးကောက်ပွဲ ကာလရှိတဲ့အတွက် ဒီထက်တော့ ကျွန်တော်တို့ နောက်ဆုတ်လို့ မရဘူးပေါ့နော်။ နိုင်ငံရေးပါတီတွေ အနေနဲ့ ရွေးကောက်ပွဲနဲ့ ပတ်သက်တဲ့ စည်းရုံး လှုပ်ရှားမှုတွေ ဆောင်ရွက်ရတဲ့ အနေအထား ဖြစ်တော့ ၁၉၊ ၂၀၊ ၂၁ မှာ ကျင်းပဖို့ ရှိပါတယ်” ဟု ဦးဇော်ဌေးက ပြောသည်။
.
အဆိုပါ အစည်းအဝေးတွင် NCA-S EAO ညှိနှိုင်းရေးအဖွဲ့ ခေါင်းဆောင် RCSS/SSA မှ ဗိုလ်မှူးကြီး စိုင်းငင်းက ပြည်ထောင်စု အကျိုး၊ တိုင်းရင်းသားပြည်သူလူထု တစ်ရပ်လုံးအကျိုးနှင့် အားလုံးအကျိုးအတွက် နှစ်ဖက် လက်ခံ ကျေနပ်၍ မျှမျှတတဖြစ်သည့် ထိုက်သင့်သော အပေးအယူ၊ အလျှော့အတင်းများကို လိုအပ်သလို  ဆောင်ရွက်ပေးရေး ဝန်မလေးကြရန် တိုက်တွန်းလိုကြောင်း အဖွင့်အမှာစကား ပြောကြားခဲ့ကြောင်း သိရသည်။
.
ပြည်ထောင်စု ငြိမ်းချမ်းရေး ညီလာခံ  - ၂၁ ရာစု ပင်လုံ ကျင်းပနိုင်ရေးအတွက်  (၈) ကြိမ်မြောက် JICM အစည်းအဝေးတွင် ၂၀၂၀ ပြည့်နှစ် ပထမ ၄ လတာ ကာလ အတွင်း ကျင်းပရန် ဆုံးဖြတ်ထားသော်လည်း COVID-19 ကာလဖြစ်သည့်အတွက် နောက်သို့ ရွှေ့ဆိုင်းခဲ့ပြီး သြဂုတ်လ ၁၂၊ ၁၃၊ ၁၄ ရက်တို့တွင် ကျင်းပရန် လျာထားခဲ့ပြီးနောက် ဇူလိုင်လ နောက်ဆုံးပတ်က ရန်ကုန်၌ ပြုလုပ်ခဲ့သော အစည်းအဝေးတွင် သြဂုတ်လ ၁၉၊ ၂၀ ၊၂၁ ရက်တို့တွင် ကျင်းပ ပြုလုပ်ရန် သတ်မှတ် လျာထားခဲ့ခြင်း ဖြစ်ကြောင်း သိရသည်။

No comments:

Post a Comment

Journal Download

Photo of three cats

About