စူဠာမုနိစေတီ ရင်ပြင်တော်နှင့် ဈေးဆိုင်ခန်းများ ပြန်ပိတ်

ကမ္ဘောဇတိုင်း

.

ရှမ်းပြည်နယ်မြို့တော် တောင်ကြီးမြို့၏ အထင်ကရ စေတီဖြစ်သော စူဠာမုနိလောကချမ်းသာ စေတီတော် ရင်ပြင်တော်နှင့် ဈေးဆိုင်ခန်းများအား ယမန်နေ့ ဇူလိုင်လ ၁ ရက်က ဖွင့်လှစ်ပေးခဲ့သော်လည်း ယနေ့ ဇူလိုင်လ ၂ ရက်တွင် ရှမ်းပြည်နယ် အစိုးရအဖွဲ့၏ ညွှန်ကြားချက်အရ ပြန်ပိတ်ခဲ့သည်ဟု သိရသည်။

.

.

“ဂေါပကအဖွဲ့ရဲ့ အစည်းအဝေး ဆုံးဖြတ်ချက်အရ မနေ့က ပြန်ဖွင့်ခဲ့ပါတယ်။ ဒါပေမဲ့ ညနေပိုင်းမှာ ခေတ္တ ဆိုင်းငံ့ ထားပေးဖို့ ရှမ်းပြည်နယ်အစိုးရက အကြောင်းကြားလာတဲ့အတွက် ပြန်ပိတ်ထားပါတယ်” ဟု စူဠာမုနိ စေတီတော် ဂေါပကအဖွဲ့ အတွင်းရေးမှူး ဒေါက်တာရဲမြင့်အောင်က ကမ္ဘောဇတိုင်းသို့ ပြောသည်။

.

ထို့အပြင် စေတီတော် ရင်ပြင်ရှိ စားသောက်ဆိုင်ခန်းများကိုလည်း မတ်လ ၃၁ ရက်မှ ယနေ့အချိန်အထိ ဆိုင်ခန်း လစာ ကောက်ခံခြင်းမရှိသည့်အတွက် ဆိုင်ခန်းရှင်များအဖို့ နစ်နာမှု မရှိနိုင်ကြောင်းနှင့် လုပ်ငန်းများ ပြန်လည်လည်ပတ်မှသာ ဆိုင်ခန်းလစာကို ပြန်လည်ကောက်ခံမည်ဖြစ်ကြောင်း ၎င်းက ဆက်လက် ပြောဆိုခဲ့သည်။

.

COVID-19 ကပ်ရောဂါ ကူးစက်မှုမှ ကာကွယ်နိုင်ရန်အတွက် ရှမ်းပြည်နယ်အတွင်းရှိ အထင်ကရ ဘုရား၊ စေတီများကို ဝင်ရောက်ခွင့် ပိတ်ပင်ထားရန် ရှမ်းပြည်နယ်အစိုးရအဖွဲ့က ဧပြီလဆန်းအတွင်း ညွှန်ကြားထား ခဲ့ခြင်း ဖြစ်ကြောင်း သိရသည်။

.

တောင်ကြီးမြို့နယ်အတွင်း စူဠာမုနိ လောကချမ်းသာ စေတီတော်အပြင် အထင်ကရ ဘုရားစေတီများ ဖြစ် သော ရွှေဘုန်းပွင့် စေတီ၊ အတုလမာရဇိန် ဆုတောင်းပြည့် မြို့လယ်ဓမ္မာရုံ အပါအဝင် ဘုရား ၂၆၀၄ ဆူ၊ စေတီ ၃၀၉၅ ဆူ၊ ပုထိုး ၂ ဆူ၊ ဘုန်းတော်ကြီးကျောင်း ၃၄၄ ကျောင်းရှိပြီး ရဟန်း ၂၀၀၀ ကျော်၊ သာမဏေ ၅၀၀၀ ကျော်နှင့် သီလရှင် ၆၀၀ ကျော် သီတင်းသုံးလျက်ရှိကြောင်း သိရသည်။

.