ကျိုင်းတုံတွင် အမျိုးသမီးတစ်ဦးအား တရုတ်မယားအဖြစ် ရောင်းစားရန် ကြံစည်ခဲ့သူများကို ဖမ်းဆီး - Kanbawza Tai News

Breaking

ကမ္ဘောဇတိုင်း သည် တောင်ကြီးမြို့တွင် အခြေစိုက်၍ ထုတ်ဝေခွင့်အမှတ် (၀၁၀၇၉)ဖြင့် ဆောင်ရွက်နေသည့် သတင်းမီဒီယာ ဖြစ်သည်။

ကျိုင်းတုံတွင် အမျိုးသမီးတစ်ဦးအား တရုတ်မယားအဖြစ် ရောင်းစားရန် ကြံစည်ခဲ့သူများကို ဖမ်းဆီး

ထက်တိုင်းကျော်
.
ရှမ်းပြည်နယ်အရှေ့ပိုင်း၊ ကျိုင်းတုံမြို့နယ်၊ ပန်ကြူကျေးရွာအုပ်စု၊ ဝင်းဘိုကျေးရွာနေ အမျိုးသမီးတစ်ဦးအား တရုတ် မယားအဖြစ် ရောင်းစားရန် ကြံစည်ခဲ့သူများကို ဖမ်းဆီးရမိထားကြောင်း သိရသည်။
.

.
ဝင်းဘိုကျေးရွာနေ အိမ်ထောင်ကွဲနေသည့် အမျိုးသမီးတစ်ဦးသည် အလုပ်အကိုင် ရှာဖွေနေစဉ် တစ်ရွာ တည်းနေ ကျနူး ဆိုသူ အမျိုးသားတစ်ဦးနှင့် နာရှီးဘို၊ အက်စတာ ဆိုသူ အမျိုးသမီး ၂ ဦးတို့မှ တရုတ်နိုင်ငံရှိ ခေါက်ဆွဲဆိုင် သို့မဟုတ် အသားကင်ဆိုင်တွင် အလုပ်ရပြီး လုပ်ခလစာ တရုတ်ငွေယွမ် ၂၀၀၀ ရနိုင် ကြောင်းနှင့် အလုပ်ကြိုးစားလျှင် ကြိုးစား သလို လစာတိုးရမည်ဖြစ်ကြောင်း စည်းရုံးပြောဆိုသဖြင့် ယင်း အမျိုးသမီးမှ သဘောတူလက်ခံပြီး ကျနူး၊ အက်စတာ တို့နှင့်အတူ ဆိုင်ကယ်စီးနင်း၍ လိုက်ပါသွားခဲ့ ကြောင်း သိရသည်။
.
ထို့နောက် မိုင်းယန်းမြို့သို့ ရောက်ရှိပြီး အမည်မသိ အမျိုးသမီးတစ်ဦး၏ နေအိမ်တွင် တစ်ည တည်းခို ခဲ့ပြီးနောက် ကျနူးဆိုသူမှ တရုတ်နိုင်ငံသားနှင့် လက်ထပ်ရန် ခြိမ်းခြောက်ပြောဆိုစည်းရုံးကာ တရုတ်နိုင်ငံ သားတစ်ဦးနှင့် Video Call ဖြင့် ဆက်သွယ်ကာ ဈေးညှိနှိုင်းပြောဆိုနေသဖြင့် အမျိုးသမီးမှ ၎င်း၏ခင်ပွန်းနှင့် ချိတ်ဆက်ကာ ကျိုင်းတုံမြို့သို့ ပြန်လာနိုင်ခဲ့သည်ဟု ရဲမှတ်တမ်းများအရ သိရသည်။
.
အဆိုပါ အမျိုးသမီးအား တရုတ်မယားအဖြစ် ရောင်းစားရန် ပူးပေါင်းကြံစည်ခဲ့သူများမှ ၎င်းအား ထွက် မပြေးနိုင်စေရန် အတွက် စောင့်ကြည့်ထိန်းသိမ်းခဲ့သော တစ်ရွာတည်းနေ မနာလောဘို ဆိုသူလည်း ပါဝင် ကြောင်း သိရသည်။
.
အဆိုပါအမှုနှင့် ပတ်သက်၍ ယင်းအမျိုးသမီး၏ တိုင်ကြားချက်အရ ကျိုင်းတုံမြို့မရဲစခန်းမှ ကျနူးနှင့် ၎င်း၏ဇနီး ဖြစ်သူ နာရှီးဘိုတို့ ၂ ဦးအား ဇူလိုင်လ ၂၃ ရက်တွင် ဖမ်းဆီးရမိခဲ့ပြီး ၎င်းတို့ ၂ ဦး အပြင် မအက်စတာ၊ မနာလောဘိုနှင့် မိုင်းယန်းမြို့ရှိ နေအိမ်တွင် ညအိပ်လက်ခံ ပူးပေါင်းပါဝင်ခဲ့သည့် အမျိုးသမီးတို့အား (ပ) ၃၂၇/၂၀၂၀၊ လူကုန်ကူးမှု တားဆီးကာကွယ်ရေး ဥပဒေပုဒ်မ ၂၈/၃၂ ဖြင့်အမှုဖွင့် အရေးယူထားကြောင်းသိရသည်။
.

Journal Download

Photo of three cats