ကျောက်မဲတွင် ခွင့်ပြုချက်မရဘဲ ဆန္ဒဖော်ထုတ်သဖြင့် တရားစွဲဆိုခံရသူ ၃ ဦးမှာ ဆန္ဒဖော်ထုတ်ရာတွင် ပါဝင်ခြင်းမရှိ ဟုဆို

မင်းဇော်မင်း

.

ရှမ်းပြည်နယ်မြောက်ပိုင်း၊ ကျောက်မဲမြို့နယ်တွင် ဇူလိုင်လ ၁၀ ရက်က ခွင့်ပြုချက်မရဘဲ ဆန္ဒဖော်ထုတ် ခဲ့မှုနှင့် ပတ်သက်၍ အမှုဖွင့်တရားစွဲဆိုခံရသူ ၃ ဦးမှာ ဆန္ဒဖော်ထုတ်ရာတွင် ပါဝင်ခြင်းမရှိကြောင်း ကျောက်မဲ မြို့နယ် မဲဆန္ဒနယ်အမှတ် (၂) မှ ရှမ်းပြည်နယ်လွှတ်တော်ကိုယ်စားလှယ် ဦးစိုင်းထွန်းဉာဏ်ထံက သိရသည်။

.

.

“သူတို့ ၃ ယောက်က ဦးဆောင်ပြီး ဆန္ဒဖော်ထုတ်ဖို့စာတင်တာ မှန်ပေမဲ့ တကယ်ဆန္ဒပြတဲ့နေ့မှာ မပါဘူး” ဟု ပြည်နယ်လွှတ်တော်ကိုယ်စားလှယ် ဦးစိုင်းထွန်းဉာဏ်က ပြောသည်။

.

ကျောက်မဲမြို့နယ်၊ ဟဲကွီကျေးရွာနှင့် ပန်ကျန်ကျေးရွာအနီး၌  တပ်မတော်နှင့် RCSS တို့ ဇွန်လ ၂၈ ရက်က ဖြစ်ပွားခဲ့သော တိုက်ပွဲများအတွင်း တပ်မတော်၏ ပစ်ခတ်မှုကြောင့် ဒေသခံ ရှမ်းတိုင်းရင်းသား အမျိုးသား တစ်ဦး သေဆုံး၍ အမျိုးသား တစ်ဦးနှင့် အမျိုးသမီး တစ်ဦး ဒဏ်ရာရရှိခဲ့သည်ဟုဆိုကာ ဒေသခံများက ဇူလိုင်လ ၁၀ ရက်၌ ဆန္ဒဖော်ထုတ်ခွင့် တင်ပြခဲ့ရာ COVID-19 ကာလဖြစ်၍ ခွင့်ပြုချက်မရသော်လည်း ဒေသခံများက ဆန္ဒဖော်ထုတ် ခဲ့ကြခြင်း ဖြစ်ကြောင်း သိရသည်။

.

အဆိုပါ ဆန္ဒထုတ်ဖေါ်ခြင်းနှင့်ပတ်သက်၍  ဦးဆောင်တင်ပြခဲ့သူ ဦးစိုင်းသန်းမောင်၊ ဦးဇောတိကနှင့် ဦးအာလိယျတို့ကို ကျောက်မဲမြို့မရဲစခန်းမှ (ပ)၆၅/၂၀၂၀ဖြင့် ငြိမ်းချမ်းစွာစုဝေးခြင်းနှင့် ငြိမ်းချမ်းစွာ စီတန်းလှည့်လည်ခြင်းဆိုင်ရာ ဥပဒေပုဒ်မ ၁၉၊ ကူးစက်ရောဂါများ ကာကွယ်နှိမ်နင်းရေး ဥပဒေပုဒ်မ ၁၈ တို့ဖြင့် အရေးယူရန် ဆောင်ရွက်နေခြင်းဖြစ်ကြောင်းသိရသည်။

.

“အခုထိတော့ သူတို့ကို မမြင်ဘူးသေးဘူး။ ၁၅ ရက်အတွင်း ဥပဒေအရဖြေရှင်းခွင့်ရှိနေတယ်။ ဖမ်းဆီးခြင်း လည်း မရှိသေးပါဘူး” ဟုဦးစိုင်းထွန်းဉာဏ်ကပြောသည်။

.

ယင်းကဲ့သို့ ဆန္ဒထုတ်ဖော်မှုကို တရားစွဲဆိုထားခြင်းနှင့် ပတ်သက်၍ ရှမ်းလူမှုအခြေပြုအဖွဲ့အစည်းများ အပါအဝင် လူမှုအဖွဲ့အစည်းပေါင်း ၂၁၆ ဖွဲ့က ကန့်ကွက်ရှုံ့ချကြောင်း သဘောထားထုတ်ပြန်ထားသည်။

.