ကလောတွင် နယ်မြေကျော် သယ်ဆောင်လာသည့် ဝက်များကို တားမြစ်ဖမ်းဆီး - Kanbawza Tai News

Breaking

ကမ္ဘောဇတိုင်းသတင်းဂျာနယ်သည် တောင်ကြီးမြို့တွင် အခြေစိုက်၍ ထုတ်ဝေခွင့်အမှတ် (မြဲ-၀၁၀၇၉)ဖြင့် ဆောင်ရွက်နေသည့် တရားဝင် သတင်းမီဒီယာ တစ်ခု ဖြစ်ပါသည်။

Wednesday, July 1, 2020

ကလောတွင် နယ်မြေကျော် သယ်ဆောင်လာသည့် ဝက်များကို တားမြစ်ဖမ်းဆီး

မင်းဇော်မင်း
.
ရှမ်းပြည်နယ်တောင်ပိုင်း၊ ကလောမြို့နယ်တွင် ဇွန်လ ၂၅ ရက်က လယ်ဝေးဘက်မှ နယ်မြေကျော် သယ်ဆောင်လာသည့် ဝက်တင်ကား တစ်စီးကို စစ်ဆေးတွေ့ရှိသဖြင့် ရှမ်းပြည်နယ် အာဖရိကဝက်အပြင်းဖျားရောဂါ ကာကွယ်ရေးအဖွဲ့မှ တားမြစ်ဖမ်းဆီး အမှုဖွင့်ကာ ယနေ့ ဇူလိုင်လ ၁ ရက်တွင် သက်ဆောင်လာသည့် ဝက်များကို ဖျက်ဆီးခဲ့သည်ဟု သိရသည်။
.
.
“အင်းလေးဒေသဘက်မှာ ဖြစ်နေတဲ့ အာဖရိကဝက်အပြင်းဖျားရောဂါကြောင့် သတ်မှတ်ကန့်သတ်ထားတဲ့ နယ်မြေ အတွင်းမှာ သယ်ဆောင်လာမှု၊ နယ်မြေကျော် သယ်ဆောင်လာတာမှာ ပါရှိရမယ့် သယ်ဆောင် တင်ပို့ခွင့် မပါရှိတာ ဖြစ်လို့ ဖမ်းဆီးပြီး ဖျက်ဆီးရခြင်းဖြစ်ပါတယ်” ဟု ကလောမြို့နယ် အုပ်ချုပ်ရေးမှူး ဦးခင်မင်းက ကမ္ဘောဇတိုင်းသို့ ပြောသည်။
.
ထို့အတူ ကလောမြို့နယ် မွေးမြူရေးနှင့် ကုသရေး ဦးစီးဌာနမှူး ဒေါက်တာ ဖြူဖြူမွန်ကလည်း “ကားပေါ်က အချမှာပဲ ၅ ကောင်လောက် သေတယ်။ ထိန်းသိမ်းထားရင်း ၇ ကောင် ထပ်သေတော့ အခု ၂၂ ကောင်ပဲ ကျန်တယ်။ ဥပဒေအရ သတ်မှတ်ထားလို့ ဆောင်ရွက်ရတာဖြစ်ပါတယ်” ဟု ပြောသည်။
.
အဆိုပါ ဝက်များသယ်ဆောင်လာမှုနှင့် ပတ်သက်၍ သယ်ဆောင်လာသူ ၃ ဦးအား ကလောမြို့မရဲစခန်းတွင် တိရစ္ဆာန်မွေးမြူရေးနှင့် ကုသရေးဥပဒေ ပုဒ်မ ၂၄ (က) ဖြင့် အမှုဖွင့်ပြီး ကလောမြို့နယ် တရားရုံးက တစ်ဦး လျှင် ဒဏ်ငွေ ၅ သောင်းကျပ်စီ ချမှတ်ကာ ဝက်များကို အောင်ပန်းမြို့၊ သာမိုင်းခမ်းကျေးရွာရှိ စည်ပင်သာယာအမှိုက်ပုံ တွင် မြေမြှုပ်ဖျက်ဆီးရန် အမိန့်ချမှတ်ခဲ့ကြောင်း သိရသည်။

No comments:

Post a Comment

Journal Download

Photo of three cats