ထိုင်းနိုင်ငံသားများအား မူးယစ်ဆေးဝါးများနှင့်အတူ တာချီလိတ်တွင် ဖမ်းမိ

စိုင်းသိင်္ခသူ

.

ထိုင်းနိုင်ငံသားများအား မူးယစ်ဆေးဝါးများနှင့်အတူ ရှမ်းပြည်နယ် အရှေ့ပိုင်း၊ တာချီလိတ်မြို့တွင် ယနေ့ (ဇူလိုင်လ ၂၆ ရက်)၊ နေ့လယ်ပိုင်းက ပူးပေါင်းအဖွဲ့က ဖမ်းမိခဲ့ကြောင်း သိရသည်။

.

တာချီလိတ်မြို့နယ် ရဲတပ်ဖွဲ့မှူး ရဲမှူး ညီညီးဌေး ဦးဆောင်သော ရဲတပ်ဖွဲ့ဝင်များနှင့် စရတ တပ်ဖွဲ့ဝင်များ ပါဝင်သော ပူးပေါင်းအဖွဲ့သည် တာချီလိတ်မြို့၊ ဝမ်ကောင်းရပ်ကွက်၊ တော့ကော့(တွင်း)လမ်းရှိ နေအိမ် တစ်လုံးတွင် ထိုင်းနိုင်ငံသား တရားခံပြေးများ ခိုအောင်းနေကြောင်း သတင်းအရ ထိုင်းနိုင်ငံသား ၅ ဦးကို မူးယစ်ဆေးဝါးများနှင့်အတူ ဖမ်းဆီးနိုင်ခဲ့ခြင်း ဖြစ်ကြောင်း ရဲမှတ်တမ်းများအရ သိရသည်။

.

အဆိုပါ ထိုင်းနိုင်ငံသားများမှာ ဝပ်ထနာဒါယု (ခ) ကျို့အပါအဝင် ၊ ဆန်ချိုင်း (ခ) ဘန်း၊ ဘီ၊ နာရတ်ခွန်တန်း၊ ချိုင်ဝမ့်တို့ ဖြစ်ပြီး ၎င်းတို့အား စိတ်ကြွရူးသွပ်ဆေးပြား ၇၆ ပြား၊ အိုက်စ်ဟု ယူဆရသော အဖြူရောင်ပုံဆောင်ခဲ့ ၆ ဒသမ ၂ ဂရမ်ခန့် အပါအဝင် မူးယစ်ဆေးဝါး သုံးစွဲရာတွင် အသုံးပြုသည့် ဆက်စပ် ပစ္စည်းများနှင့်အတူ ဖမ်းဆီးရမိခဲ့ခြင်း ဖြစ်ကြောင်း သိရသည်။

.

အဆိုပါ မူးယစ်ဆေးဝါးများနှင့်အတူ ဖမ်းဆီးရမိသည့် ထိုင်းနိုင်ငံသားများအား တာချီလိတ်မြို့မ ရဲစခန်းတွင် မယ(ပ) ၁၀၁/၂၀၂၀၊ မူး/စိတ်ပုဒ်မ ၁၉(က)/၂၁ ဖြင့် အမှုဖွင့် အရေးယူဆောင်ရွက်ထားကြောင်း သိရသည်။