တောင်ကြီး ဝါးပြားလမ်းဆုံတွင် စည်ပင်သာယာမှ စွန့်ပစ်ထားသည့် အမှိုက်များကြောင့် ဒေသခံများ အခက်ကြုံနေ - Kanbawza Tai News

Breaking

ကမ္ဘောဇတိုင်းသတင်းဂျာနယ်သည် တောင်ကြီးမြို့တွင် အခြေစိုက်၍ ထုတ်ဝေခွင့်အမှတ် (မြဲ-၀၁၀၇၉)ဖြင့် ဆောင်ရွက်နေသည့် တရားဝင် သတင်းမီဒီယာ တစ်ခု ဖြစ်ပါသည်။

Friday, June 5, 2020

တောင်ကြီး ဝါးပြားလမ်းဆုံတွင် စည်ပင်သာယာမှ စွန့်ပစ်ထားသည့် အမှိုက်များကြောင့် ဒေသခံများ အခက်ကြုံနေ


ဗျတ္တ
.
ရှမ်းပြည်နယ်မြို့တော် တောင်ကြီးမြို့၊ အနောက်မြို့ပတ်လမ်း၊ ဝါးပြားလမ်းဆုံအနီးတွင် စည်ပင်သာယာရေး ဌာန သန့်ရှင်းရေးဝန်ထမ်းများမှ စည်းကမ်းမဲ့ စွန့်ပစ်ထားသည့် အမှိုက်များကြောင့် ဒေသခံများအတွက် သွားလာရေး အခက်အခဲ ဖြစ်ပေါ်နေပြီး ယာဉ်အန္တရာယ်/လမ်းအန္တရာယ် ဖြစ်ပေါ်လာမည်ကို စိုးရိမ်နေရသည်ဟု သိရသည်။
.
.
ပြီးခဲ့သည့် မတ်လဆန်းပိုင်းအတွင်းက စည်ပင်သာယာရေးဌာနမှ ဂနိုင်ကန်လမ်း အနောက်ဘက်ခြမ်း ပြုပြင် ထိန်းသိမ်းခြင်းနှင့် ရေမြောင်းလုပ်ငန်းများ ဆောင်ရွက်စဉ်က ရေမြောင်းအတွင်းမှ ဆယ်ယူထားသည့် ယင်းအထပ်သား အဟောင်း အမှိုက်များအား လက်စသတ် သိမ်းဆည်းခြင်းမရှိဘဲ လမ်းဘေး လူသွားစင်္ကြန် ပလက်ဖောင်းပေါ်တွင် စွန့်ပစ် ထားခဲ့ခြင်းဖြစ်သည်ဟု သိရသည်။
.
“ရေမြောင်းနဲ့ ပလက်ဖောင်း လုပ်ပြီးသွားတော့ ရေမြောင်းထဲက ပြန်ထုတ်ထားတဲ့ အထပ်သားအဟောင်း တွေကို မသိမ်းဘဲနဲ့ ဒီအတိုင်း ပလက်ဖောင်းပေါ်မှာ စွန့်ပစ်ထားခဲ့တာပါ။ လနဲ့ချီနေပြီး။ အမှိုက်သိမ်းကားတွေကို ယူသွားဖို့ ပြောတော့လည်း ဒီအမှိုက်တွေက ပစ်စရာနေရာ မရှိလို့ မယူဘူးလို့ ပြောကြတယ်။ လမ်းပေါက်ဝကြီးမှာ ဖြစ်နေတဲ့အတွက် အမြန်ဆုံး ရှင်းလင်းပေးစေလိုပါတယ်” ဟု ဝါးပြားလမ်းဆုံအနီး နေထိုင်သူ ဒေသခံတစ်ဦးက ပြောသည်။
.
အဆိုပါကိစ္စနှင့် ပတ်သက်၍ တောင်ကြီးမြို့နယ်စည်ပင်သာယာရေးကော်မတီဝင် ဦးဇော်ဝင်းထူးအား ကမ္ဘောဇ တိုင်းမှ ဆက်သွယ်မေးမြန်းရာတွင် “ဝါးပြားလမ်းဆုံကနေ နဂါးပွက်လမ်းဆုံအထိ အနောက်မြို့ပတ်လမ်း အဆင့်မြှင့် တင်မှုလုပ်ငန်းက မပြီးသေးတော့ ကျွန်တော်တို့ကို လုပ်ငန်း မအပ်သေးပါဘူး။ အဲဒါကိုတော့ သိမ်းရမယ့်တာဝန် ရှိပါ တယ်။ အင်ဂျင်နီယာတွေကို အမြန်ဆုံး အကြောင်းကြားပြီးတော့ သိမ်းဆည်းဖို့ ဆောင်ရွက်ပေးပါမယ်” ဟု ပြန်လည် ဖြေကြားခဲ့သည်။
.
တောင်ကြီးမြို့၊ အနောက်မြို့ပတ်လမ်း၊ ဝါးပြားလမ်းဆုံနေရာသည် ယာဉ်အသွားအလာ များပြားသည့်အပြင် နေ့စဉ် နာရေးယာဉ်တန်းများ ဖြတ်သန်းဝင်ရောက်ရာ လမ်းဖြစ်သည့်အတွက် ယင်းစွန့်ပစ်အမှိုက်များကို အမြန်ဆုံး ဖယ်ရှားရှင်းလင်းရန် လိုအပ်နေခြင်းဖြစ်ကြောင်း သိရသည်။
.

No comments:

Post a Comment

Journal Download

Photo of three cats

About