မိုင်းတုံတွင် စည်ပင်အမှိုက်ကားမှ ဘက်ထရီဖြုတ်ခိုးသူများကို ဖမ်းမိ - Kanbawza Tai News

Breaking

ကမ္ဘောဇတိုင်းသတင်းဂျာနယ်သည် တောင်ကြီးမြို့တွင် အခြေစိုက်၍ ထုတ်ဝေခွင့်အမှတ် (မြဲ-၀၁၀၇၉)ဖြင့် ဆောင်ရွက်နေသည့် တရားဝင် သတင်းမီဒီယာ တစ်ခု ဖြစ်ပါသည်။

Thursday, June 25, 2020

မိုင်းတုံတွင် စည်ပင်အမှိုက်ကားမှ ဘက်ထရီဖြုတ်ခိုးသူများကို ဖမ်းမိ

မင်းဇော်မင်း
.
ရှမ်းပြည်နယ်အရှေ့ပိုင်း၊ မိုင်းဆတ်ခရိုင်၊ မိုင်းတုံမြို့နယ်တွင် စည်ပင်သာယာရေးဌာနပိုင် အမှိုက်သိမ်းယာဉ်မှ ဘက်ထရီ ၂ လုံး ဖြုတ်ခိုးယူသူများကို ဇွန်လ ၂၅ ရက်က နေ့ချင်း ဖမ်းဆီးရမိခဲ့သည်ဟု သိရသည်။
.
.
“သတင်းရတာနဲ့ တန်းလိုက်တာ နမ့်တုံချောင်းဘေးမှာ ဖမ်းမိခဲ့ပါတယ်” ဟု မိုင်းတုံမြို့မရဲစခန်းမှူး ဒုရဲမှူး ကိုကိုဇော်က ကမ္ဘောဇတိုင်းသို့ ပြောသည်။
.
မိုင်းတုံမြို့နယ်စည်ပင်သာယာရေးဌာနမှ အမှုဆောင်အရာရှိ ဦးမြင့်နိုင်ဦးသည် ဇွန်လ ၂၅ ရက်၊ နံနက် ၁၁ နာရီခွဲ အချိန်ခန့် က နေအိမ်တွင် ရှိနေစဉ် ကားဂိုဒေါင်အတွင်း ရပ်ထားသည့် မြို့နယ်စည်ပင်သာယာရေးဌာန ပိုင် Dong Feng အမျိုး အစားမော်တော်ယာဉ်၌ တပ်ဆင်ထားသည့် ၁၂ ဗို့ ဘက်ထရီ ၂ လုံးအား လူ ၂ ဦးမှ ဖြုတ်ခိုးနေသည်ကို စည်ပင်ဝန်ထမ်း ဦးစိုးမောင်မှ တွေ့ရှိပြီး အော်ဟစ်အကူအညီတောင်းခံသံ ကြားရသဖြင့် ကြည့်ရှုရာ ဘက်ထရီအိုး ၂ လုံးအား ဂိုဒေါင်အနီး မြေပြင်တွင် ချထားခဲ့ပြီး ခိုးယူသူ ၂ ဦးမှာ ရုံးအုတ်တံတိုင်း ကိုကျော်၍ ထွက်ပြေးသွားခဲ့ကြောင်း သိရသည်။
.
သို့ဖြစ်၍ အဆိုပါ ဘက်ထရီအိုး ခိုးယူသူများအား လိုက်လံစုံစမ်းရာမှ မောင်ညိုလေး (ခ) စုနောင့် (၂၅ နှစ်) ကို ကွက်သစ် ဘက်မှ ဆင်းလာစဉ် ညနေ ၃ နာရီအချိန်တွင် ဖမ်းဆီးရမိခဲ့ပြီး စစ်မေးခဲ့ရာ ၎င်းနှင့်အတူ အဲယို (ခ) ဝင်းမင်းထွန်း (၂၀ နှစ်) တို့ ပူးပေါင်းကျူးလွန်ကြောင်း စစ်ဆေးပေါ်ပေါက်သဖြင့်  အဲယို(ခ) ဝင်းမင်းထွန်း ကို နမ့်တုံချောင်းဘေးတွင် ညနေ ၃ နာရီခွဲအချိန်ခန့်၌ ထပ်မံဖမ်းဆီးရမိခဲ့ခြင်းဖြစ်ကြောင်း သိရသည်။
.
အဆိုပါ မိုင်းတုံမြို့နယ် စည်ပင်သာယာရေးဌာနပိုင် အမှိုက်သိမ်းယာဉ်မှ တစ်လုံးလျှင် ကျပ် ၁၇၀၀၀၀ တန်ဖိုး ရှိ ဘက်ထရီအိုး ၂ လုံးအား ဖြုတ်ခိုးရန် ကြံစည်သူ မောင်ညိုလေး(ခ) စုနောင်နှင့် အဲယို (ခ) ဝင်းမင်းထွန်းတို့ ၂ ဦးအား မိုင်းတုံမြို့မရဲစခန်းမှ (ပ)၁၇/၂၀၂၀၊ ပြည်သူပိုင်ပစ္စည်း ကာကွယ်ရေးဥပဒေ ပုဒ်မ ၆ (၁) ဖြင့်အမှုဖွင့် စစ်ဆေး ဆောင်ရွက်လျက်ရှိကြောင်း သိရသည်။
.

No comments:

Post a Comment

Journal Download

Photo of three cats

About