မိုင်းပျဉ်းတွင် မဟာဓါတ်အားလိုင်းမှ လျှပ်စစ်မီးပေးရန် အသင့်ဖြစ်နေ

ထက်တိုင်းကျော်

.

ရှမ်းပြည်နယ်အရှေ့ပိုင်း၊ မိုင်းပျဉ်းမြို့တွင် 66 KV မဟာဓါတ်အားလိုင်းမှ မြို့နေပြည်သူလူထုအတွက် လျှပ်စစ်မီး ဖြန့်ဖြူး ပေးရန် အသင့်ဖြစ်နေပြီဖြစ်သည်ဟု သိရသည်။

.

 

.

သို့ဖြစ်၍ ယနေ့ဇွန်လ ၇ ရက်တွင် မိုင်းပျဉ်းမြို့ပေါ်ရှိ ရပ်ကွက် ၃ ခုအား လျှပ်စစ်ဓါတ်အား စမ်းသပ်ဖြန့်ဖြူးပေးသွားမည် ဖြစ်ပြီး စမ်းသပ်ပို့လွှတ်သည့် လျှပ်စစ်ဓါတ်အား တည်ငြိမ်သည့်အချိန်တွင်သာ လျှပ်စစ်မီး အသုံးပြုကြရန် မိုင်းပျဉ်းမြို့နယ် လျှပ်စစ်အင်ဂျင်နီယာမှူးရုံးမှ ကြိုတင်ကြေညာထားသည်ဟု သိရသည်။

.

“မိုင်းပျဉ်းမြို့ပေါ် ရပ်ကွက်အုပ်ချုပ်ရေးမှူးရုံးတွေမှာ ကြော်ငြာစာ ကပ်ထားတယ်။ မီးအးငြိမ်မှ အိမ်သုံး၊ လုပ်ငန်းသုံး အတွက် လျှပ်စစ်ဓါတ်အားကို သုံးစွဲစေချင်ပါတယ်” ဟု မိုင်းပျဉ်းမြို့နယ် လျှပ်စစ်အင်ဂျင်နီယာမှူး ဦးဝင်းနိုင်ဦးက ကမ္ဘောဇတိုင်းသို့ ပြောသည်။

.

ယင်းကဲ့သို့ လျှပ်စစ်ဓါတ်အား ဖြန့်ဖြူးပေးမည့် အစီအစဉ်နှင့် ပတ်သက်၍ မိုင်းပျဉ်းဒေသခံတစ်ဦးက “ဝမ်းသာတာပေါ့။ တစ်ညမှာ ၃ နာရီပဲ မီးလင်းပြီး ဒီဇယ်နဲ့ မီးပေးတဲ့ EPC က အခုတော့ ၂၄ နာရီ မီးရတော့မှာဆိုတော့ ဝမ်းသာလို့ မဆုံးပါဘူး” ဟု ၎င်း၏အမြင်ကို ပြောဆိုခဲ့သည်။

.

မိုင်းပျဉ်းမြို့ပေါ်တွင် ရပ်ကွက် ၃ ရပ်ကွက်ရှိပြီး ယခင်က ဒီဇယ်အင်ဂျင်ဖြင့် နေ့စဉ် ညနေ ၆ နာရီမှ ည ၉ နာရီအထိ လျှပ်စစ်ဓါတ်အား ဖြန့်ဖြူးပေးနေခြင်းဖြစ်ကာ အိမ်သုံးမီတာ အလုံးရေ ၅၀၀ ကျော် ရှိသဖြင့် 66 KV မဟာဓါတ်အား လိုင်းမှ ၂၄ နာရီ မီးရရှိပါက လျှပ်စစ်ဓါတ်အား သုံးစွဲမှုနှင့်အတူ စီးပွားရေး ဖွံ့ဖြိုးတိုးတက်လာမည် ဖြစ်ပြီး ရှမ်းပြည်နယ် အရှေ့ပိုင်းမြို့တော် ကျိုင်းတုံမြို့သို့လည်း မဟာဓါတ်အားလိုင်း ဆက်လက်သွယ်တန်းလျက်ရှိကြောင်း သိရသည်။

.