.
ရှမ်းပြည်နယ်မြောက်ပိုင်း၊ လားရှိုးမြို့ရှိ မန်ဆူ ဈေးအမည်အား ရွှေချမ်းမြေ့အမည်သို့ ပြောင်းလဲ၍ ဇွန်လ ၂၂ ရက်က တင်ဆင်ခဲ့သည့် ဆိုင်းဘုတ်ကို ယနေ့ (ဇွန်လ ၂၃ ရက်)၊ ညနေပိုင်းတွင် ပြန်လည် ဖြုတ်သိမ်းခဲ့ကြောင်း မန်ဆူဈေး တာဝန်ခံထံမှ သိရသည်။
.
" စည်ပင်က ညွှန်ကြားလာလို့ပါ။ ခဏ ပြန်ဖြုတ်ထားပါဆိုလို့ ပြန်ဖြုတ်ထားပါတယ်။ ဈေးသူ၊ ဈေးသား ၃၀၀ ကျော်က အမည် ပြောင်းသင့်တယ်ဆိုလို့ အထက်ကို တင်ပြပြီး အမည် ပြောင်းခဲ့တာပါ။" ဟု မန်ဆူဈေး တာဝန်ခံ ကိုမျိုးက ကမ္ဘောဇတိုင်းသို့ ပြောသည်။
.
အဆိုပါ မန်ဆူဈေး အမည် ပြောင်းခြင်းကို လွှတ်တော် ကိုယ်စားလှယ်များ၏ သဘောထားမှတ်ချက် တောင်းခံ ရယူခဲ့သည် ဆိုသော်လည်း အမျိုးသားလွှတ်တော်ကိုယ်စားလှယ်၏ သဘောထား မှတ်ချက်ကို တောင်းခံခြင်း မရှိသည့် အပြင် အသိပေးခြင်း၊ ဖုန်းဆက် ပြောခြင်းများ မရှိခဲ့ကြောင်း သိရသည်။
.
" ခုပဲ မြို့နယ်အုပ်ချုပ်ရေးမှူးကို ဖုန်းဆက် ပြောနေတာ၊ မန်ဆူဈေး အမည် ပြောင်းတာ ဘာမှလည်း မသိရဘူး၊ ပြီးတော့ မြို့ရွာတွေက အစ ရှမ်းအမည်တွေ ပြန်ပြောင်းဖို့ ကြိုးပမ်းမှုတွေပြုလုပ်နေတဲ့ အချိန်မှာ ဒီဖြစ်ရပ်မျိုးက မဖြစ်သင့်ဘူး။ ကျွန်တော်က အရင်အမည် မန်ဆူကိုပဲ အတည်ပြုတယ်၊ သမိုင်းကြောင်းနဲ့ ချီလာတဲ့ဈေးလေ၊ ဈေးအသစ် သီးခြား တည်ရင်တော့ တစ်မျိုးပေါ့၊ အခုအမည်ကို ကန့်ကွက်ပါတယ်။ " ဟု အမျိုးသားလွှတ်တော်ကိုယ်စားလှယ် ဦးစိုင်းဝမ်းလှိုင်ခမ်းက ပြောသည်။
.
မန်ဆူဈေးကော်မတီဥက္ကဌ ဦးမောင်ငယ်အား ဆက်သွယ် မေးမြန်းရာတွင် " လားရှိုးရှိ ရပ်ကွက် ၁၂ ခုလုံးကို ကြေညာခဲ့ပြီး ရှိတဲ့ ဈေး အားလုံးမှာလည်း ကြေညာခဲ့ပါတယ်၊ ဈေးသူ ဈေးသားတွေ တင်ပြချက်နဲ့ လူကြီးတွေကို တင်ပြပြီး အမည်ပြောင်းခဲ့ပေမယ့် အခုနိုင်ငံရေး၊ လူမျိုးရေးတွေ ပါလာနေတဲ့ မှတ်ချက်တွေကြောင့် ရွှေချမ်းမြေ့ ဆိုင်းဘုတ်ကို ခဏ ပြန် ဖြုတ်ခိုင်းလို့ ဖြုတ်ထားပါ။ စည်ပင်ဝန်ကြီးလည်း ကွတ်ခိုင် မူးယစ်ဆေးဝါး ဖျက်ဆီးပွဲ ရောက်နေတော့ သူ့ညွှန်ကြားချက် ရယူပြီးမှ ဆက်လက် လုပ်ဆောင်ဖို့ ရှိပါ့မယ်။ ဟု ပြောသည်။
.
အဆိုပါ အခြေအနေများနှင့် ပတ်သက်၍ လားရှိုးမြို့နယ် စည်ပင်သာယာရေးဌာနသို့ ဖုန်းဖြင့် ဆက်သွယ် မေးမြန်းရာ အစည်းအဝေ းတက်ရောက်နေသည်ဟုသာ ပြန်လည် ပြောကြားခဲ့သည်။
No comments:
Post a Comment