စိုင်းသိင်္ခသူ
.
ရှမ်းပြည်နယ်တောင်ပိုင်း၊ ညောင်ရွှေ၊ အောင်ပန်းနှင့် ရွာငံဒေသထွက်
ခရမ်းချဉ်သီးများ ဈေးကောင်းမရသည့်အပြင် တင်ပို့ရန် ခက်ခဲသဖြင့် အခမဲ့ ပေးဝေရသည့်အထိ
တောင်သူများ အရှုံးပေါ်နေရကြောင်း သိရသည်။
.
.
COVID-19 ကပ်ရောဂါ ဖြစ်ပွားနေသည့် ကာလအတွင်း ကုန်စည်ပို့ဆောင်ရေး
ခက်ခဲမှုကြောင့် ခရမ်းချဉ်သီးများ ခူးဆွတ်ချိန် ရောက်သော်လည်း တင်ပို့ရောင်းချရမှု
နည်းပါးသည့်အတွက် ယင်းကဲ့သို့ အခက်အခဲ ဖြစ်ပေါ်နေရခြင်း ဖြစ်ကြောင်း သိရသည်။
“အခု ၃၁ ပိဿာဝင် တစ်အိတ်မှ ၂၀၀၀ ကနေ ၃၀၀၀ လောက်ပဲ ရတယ်။ အရင်ကဆို
၅၀၀၀ အထက်ရတယ်။ အရင်း အနှီးများတော့ တော်တော်ရှုံးကြတယ်။ ဈေးနည်းတဲ့အပြင် ရောင်းချင်တာတောင်
ဝယ်လက်မရှိတော့ အလကားပေး နေတာတောင် ယူမယ့်သူ နည်းတယ်” ဟု ညောင်ရွှေမြို့နယ်၊ မှော်ဘီကျေးရွာနေ
ခရမ်းချဉ်သီးစိုက်တောင်သူ ဖိုးမူက ကမ္ဘောဇတိုင်းသို့ ပြောသည်။
.
မှော်ဘီကျေးရွာသည် ခရမ်းချဉ်သီး ရာသီချိန်တွင် ကုန်းသီးခေါ် ခရမ်းချဉ်သီး
အဓိက စိုက်ပျိုးသည့် အင်းလေးဒေသ အတွင်းရှိ ကုန်းပေါ်ကျေးရွာတစ်ရွာဖြစ်ပြီး ယခုနှစ်တွင်
ခရမ်းချဉ်သီးစိုက် တောင်သူများအနေဖြင့် များစွာအရှုံးပေါ် နေရခြင်းဖြစ်ကြောင်း သိရသည်။
.
ခရမ်းချဉ်သီးယိုနှင့် ပြည်မကြိုက် အင်းသီးခေါ် အသားထူ ခရမ်းချဉ်သီးများမှာ
စျေးကွက်ဝင်သော်လည်း အမှာရှိမှသာ ပို့ဆောင်ရသဖြင့် ယခင်နှစ်ကဲ့သို့ ရောင်းအား မကောင်းကြောင်း
ညောင်ရွှေမြို့အခြေစိုက် အောင်မြန်မာ ခရမ်းချဉ်သီး ပွဲရုံ မှ ဦးအောင်အောင် ထံက သိရသည်။
.
“ဖုန်းဆက်မှာမှ ပို့ရတယ်။ နောက်ပိုင်းတော့ စျေးကောင်းလာမယ်လို့
ယူဆတယ်။ စျေးကွက်က တောင်းဆို လာနေပါပြီ။ အခုကတော့ ၃၁ ပိဿာဝင် တစ်အိတ်မှ ၉၀၀၀ ပဲ ရတယ်။
တန်ဖိုးမြင့်ထုတ်ကုန် မလုပ်နိုင်မချင်းတော့ ကုန်ကြမ်းအဆင့်ပဲ ရောင်းချနေကြရမှာပါ” ဟု
ဦးအောင်အောင်က ပြောသည်။
.
ရေခြံ ခေါ် အင်းလေးကန်အတွင်း ခြံဖြင့် စိုက်ပျိုးသည့် အင်းသီးကို ရန်ကုန်၊ မိတ္ထီလာ၊ ကျောက်ပန်းတောင်း၊ ပြည်၊ မြစ်သား၊ မန္တလေးတို့အထိ လမ်းကြောင်း ၃ ကြောင်းဖြင့် ပို့ဆောင်ပေးနေ ခြင်းဖြစ်ပြီး အင်းခရမ်းချဉ်သီး (အင်းသီး)မှာ အသားထူပြီး အထားခံသဖြင့် ဖျော်ရည်၊ ယို၊ ခရမ်းချဉ်ဆော့များ လုပ်ရန် အထူးကောင်းမွန်သော်လည်းစက်ရုံမရှိသဖြင့် ကုန်ကြမ်းအဖြစ်သာ ထုတ်လုပ်ရောင်းချနေရကြောင်း ၎င်းထံက သိရသည်။
.
အောင်ပန်းရှိ ခရမ်းချဉ်သီးပွဲရုံများအနေဖြင့်လည်း ရာသီထွက် ခရမ်းချဉ်သီးအခွံပါးများမှာ
စျေးကောင်းမရသဖြင့် ဝယ်ယူသူနည်းပါးမှုကြောင့် စွန့်ပစ်မှုများရှိနေသလို ပရဟိတအဖွဲ့များနှင့်လိုအပ်သူများသို့
အခမဲ့ ပေးလှူမှုများ ပြုလုပ်လျက်ရှိသည်ဟု သိရသည်။
.
“ရေရှားတဲ့ရွာတွေ ရေလှူရင်း သူတို့မှာ COVID-19 ကာလ ကန့်သတ်ချက်တွေကြောင့်
ဟင်းစားခက်ခဲနေတဲ့သူတွေ ရှိနေတာ တွေ့သိလာရလို့ အခင်းတွေထဲအထိ သွားဝယ်တော့ အလကားပေးတာနဲ့
အနည်းဆုံးစျေးပေးတာနဲ့ ပေးလှူကြလို့ အထုပ်တွေထုပ်ပြီး အလိုရှိတဲ့ ရွာတွေ၊ အိမ်ထောင်စုတွေကို
အခမဲ့ လိုက်ဝေပေးနေပါတယ်” ဟု ရွာငံ မြို့နေ ကိုစိုင်းလူခေးက ပြောသည်။
.
ရှမ်းပြည်နယ်တောင်ပိုင်းဒေသအတွင်း ခရမ်းချဉ်သီးကို ညောင်ရွှေ၊ အောင်ပန်း၊
ရွာငံမြို့များတွင် စီးပွားဖြစ် အဓိက စိုက်ပျိုးကြခြင်းဖြစ်ကြောင်း သိရသည်။
.
