သတင်းသမားများ Quarantine ဝင်ရခြင်းနှင့် ရောဂါ ကူးစက်ခံရပါက သတင်းမီဒီယာကောင်စီက ထောက်ပံ့မည်

စုလှိုင်

.

သတင်းမီဒီယာသမားများ သတင်း ရယူရေး လုပ်ငန်းများ ဆောင်ရွက်ရာတွင် COVID-19 ရောဂါနှင့် ပတ်သက်ပြီး Quarantine ဝင်ရခြင်းနှင့် ရောဂါ ကူးစက်ခံရပါက မြန်မာနိုင်ငံ သတင်းမီဒီယာကောင်စီမှ ထောက်ပံ့မည် ဖြစ်ကြောင်း မေလ ၅ ရက်က ထုတ်ပြန် ကြေညာခဲ့သည်။

.

COVID-19 ရောဂါ ဖြစ်ပွါးနေဆဲ ကာလတွင် သတင်း သမားအချို့လူမှုရေး အခက်အခဲများ ပေါ်ပေါက်လာသဖြင့် လိုအပ်သော အကူအညီ ပေးနိုင်ရန်အတွက် မြန်မာနိုင်ငံ သတင်းမီဒီယာ ကောင်စီမှ COVID-19 ရန်ပုံငွေ အဖြစ် ငွေကျပ်သိန်း ၁၀၀ ဖြင့် မတည်ထားကာ သတင်း မီဒီယာသမားများ သတင်းရယူမှုနှင့် ပတ်သက်ပြီး Quarantine ဝင်ခံရခြင်း၊ COVID 19 ရောဂါ ကူးစက်ခံရခြင်း ဖြစ်ပါက တစ်ဦးလျှင် ငွေကျပ် ၂ သိန်းနှုန်းဖြင့် ထောက်ပံ့ ကူညီသွားမည် ဖြစ်ကြောင်း သိရသည်။

.

.

အဆိုပါ ထောက်ပံ့ကြေး ရရှိရေးအတွက် သတင်းမီဒီယာသမားများ အနေဖြင့် သက်ဆိုင်ရာ သတင်းမီဒီယာတိုက်မှ ထောက်ခံစာ ၊ COVID-19 ကာလအတွင်း သတင်းရယူသူ ဖြစ်ခြင်း၊ Quarantine ဝင်ရောက်နေကြောင်း သက်ဆိုင်ရာမှ အတည်ပြု ထောက်ခံပေးသူ ဖြစ်ရန် လိုအပ်ကြောင်း ထုတ်ပြန်ချက်တွင် ဖော်ပြထားသည်။

.

သတင်းမီဒီယာသမားများ အတွက် သတင်းမီဒီယာ ကောင်စီသို့ လာရောက် လှူဒါန်းသည့် အလှူ ပစ္စည်းများနှင့် အလှူငွေ ရရှိမှုအပေါ် မူတည်ပြီး ဆန်၊ ဆီနှင့် အခြား ကူညီ ထောက်ပံ့မှုများကိုလည်း ဆက်လက် ဆောင်ရွက်ပေးသွားမည် ဖြစ်ကြောင်း သိရသည်။

.

ထို့အပြင် မြန်မာနိုင်ငံရှိ သတင်းမီဒီယာသမားများ စုပေါင်း၍ COVID-19 နှင့် ပတ်သက်၍ အခက်အခဲ ရှိသူများအား ကူညီ ထောက်ပံ့နိုင်ရေးအတွက် Committee of Social Assistance for Journalists ကို ဖွဲ့စည်းနိုင်ရေးအတွက် စီစဉ်နေလျက် ရှိကြောင်းလည်း သိရသည်၊