ထက်တိုင်းကျော်
.
ရှမ်းပြည်နယ်အရှေ့ပိုင်း၊ ကျိုင်းတုံမြို့နယ်၊ မိုင်းဇင်းကျေးရွာအုပ်စု၊
ပန်လော့အပေါ်ကျေးရွာတွင် မေလ ၁၈ ရက်၊ နံနက်ပိုင်းက SSA တပ်ဖွဲ့ဝင်များ ဟုဆိုကာ ယင်းကျေးရွာရှိ
အိမ်ခြေ ၃၀ ထံမှ ငွေကျပ် တစ်သိန်း ကောက်ခံမှု ဖြစ်ပွားခဲ့ကြောင်း သိရသည်။
.
.
“မေလ ၁၂ ရက်မှာ ရွာကို သူတို့ရောက်လာပြီး တစ်အိမ်ကို ဆန် တစ်ပုံးခွဲစီပေးဖို့
တောင်းပါတယ်။ ဆန်မရှိရင် တစ်အိမ် ကို ငွေ ၁၅၀၀၀ ပေးရမယ်လို့ပြောပြီး ၁၈ ရက်နေ့မှာ ပြန်လာမယ်လို့
ပြောပြီး ပြန်သွားတာပါ” ဟု ပန်လော့အပေါ် ကျေးရွာသူကြီး ဦးပီဆန်က ကမ္ဘောဇတိုင်းသို့
ပြောသည်။
အဆိုပါကိစ္စနှင့် ပတ်သက်၍ ရှမ်းပြည်နယ်အရှေ့ပိုင်း၊ ကျိုင်းတုံမြို့
အခြေစိုက် RCSS ဆက်ဆံရေးရုံးတာဝန်ခံ ဒုဗိုလ်မှူးကြီး စိုင်းမိဏ်းအား ဆက်သွယ်မေးမြန်းရာတွင်
“NCA လက်မှတ်ရေးထိုးထားပြီး နိုင်ငံရေး ဆွေးနွေးပွဲလုပ်ဖို့ ရှိပေမဲ့ ထောက်ပံ့ပေးထားတာမရှိလို့
မေတ္တာရပ်ခံပြီး ဆန်စပါးကို ကူညီထောက်ပံ့ပေးဖို့ ပြောထား ပါတယ်။ ငွေကြေးကောက်ခံခိုင်းတာ
မရှိပါဘူး” ဟု ပြန်လည်ဖြေကြားခဲ့သည်။
.
ရှမ်းပြည်ပြန်လည်ထူထောင်ရေးကောင်စီ၊ ရှမ်းပြည်တပ်မတော်
RCSS/SSA သည် တစ်နိုင်ငံလုံး ပစ်ခတ် တိုက်ခိုက်မှု ရပ်စဲရေး သဘောတူစာချုပ် NCA ကို
ပထမဆုံး လက်မှတ်ရေးထိုးသည့် လက်နက်ကိုင်အဖွဲ့ ၈ ဖွဲ့တွင် တစ်ခု အပါအဝင်ဖြစ်ကြောင်း
သိရသည်။
.
