အထူးဒေသ (၄) နမ့်ပန်းမှ Quarantine ပြုလုပ်ပြီးသော မြန်မာရွှေ့ပြောင်းလုပ်သား ၁၀၈ ဦးကို နေရပ်ပြန်ပို့ - Kanbawza Tai News

Breaking

ကမ္ဘောဇတိုင်းသတင်းဂျာနယ်သည် တောင်ကြီးမြို့တွင် အခြေစိုက်၍ ထုတ်ဝေခွင့်အမှတ် (မြဲ-၀၁၀၇၉)ဖြင့် ဆောင်ရွက်နေသည့် တရားဝင် သတင်းမီဒီယာ တစ်ခု ဖြစ်ပါသည်။

Saturday, May 23, 2020

အထူးဒေသ (၄) နမ့်ပန်းမှ Quarantine ပြုလုပ်ပြီးသော မြန်မာရွှေ့ပြောင်းလုပ်သား ၁၀၈ ဦးကို နေရပ်ပြန်ပို့

ကိုကိုနိုင် (မိုင်းယု)
.
ရှမ်းပြည်နယ်အရှေ့ပိုင်း၊ မိုင်းလားအထူးဒေသ (၄)၊ နမ့်ပန်းတွင် Quarantine ၂၁ ရက် ဝင်ရောက်ပြီးသော မြန်မာ လုပ်သား ၁၀၈ ဦးကို ယနေ့ မေလ ၂၃ ရက်၊ နံနက်ပိုင်းက မိုင်းယုမြို့မှတစ်ဆင့် ပြန်လည်ပေးပို့လာခဲ့ရာ ၎င်းတို့ကို နေရပ်သို့ ပြန်လည်ပို့ဆောင်ပေးလျက်ရှိသည်ဟု သိရသည်။
.
 
.
အဆိုပါ နေရပ်ပြန် မြန်မာအလုပ်သမားများကို ယနေ့ မေလ ၂၃ ရက်၊ နံနက်ပိုင်းက  မိုင်းယု-ကျိန်းယဲန်းတံတားပေါ်တွင် အထူးဒေသ(၄)၊ နမ့်ပန်းဒေသ ဒုတိယအုပ်ချုပ်ရေးမှူး ဦးအိုက်ဆမ်မွန်း၊ ဒုတိယဆက်ဆံရေးတာဝန်ခံ ဦးလော်ချီ၊ ဒုတိယရဲတပ်ဖွဲ့မှူး ချစ်ဆနှင့် ကျိန်းယဲန်းဒေသရဲစခန်းမှူး မောင်အေးဦးအဖွဲ့တို့မှ လွှဲပြောင်းလက်ခံ ဆောင်ရွက်ခဲ့ခြင်း ဖြစ်ကြောင်း သိရသည်။
.
ယင်းကဲ့သို့ လွှဲပြောင်းလက်ခံခဲ့သည့် ရွှေ့ပြောင်းလုပ်သားများတွင် နေပြည်တော်ကောင်စီနယ်မြေ၊ ရန်ကုန်တိုင်း ဒေသကြီး၊ ပဲခူးတိုင်းဒေသကြီး၊ မကွေးတိုင်းဒေသကြီး၊ မန္တလေးတိုင်းဒေသကြီး၊ ဧရာဝတီတိုင်းဒေသကြီး၊ တနင်္သာရီတိုင်းဒေသကြီး၊ ကချင်ပြည်နယ်၊ ကယားပြည်နယ်နှင့် ရှမ်းပြည်နယ်တို့မှ ကျား ၃၈ ဦး မ ၇၀ ဦး စုစုပေါင်း အလုပ်သမား ၁၀၈ ဦးပါဝင်ပြီး စတုထ္ထအကြိမ် လွှဲပြောင်းပေးအပ်ခြင်းဖြစ်ကြောင်း သိရသည်။
.
ထို့နောက် နေရပ်ပြန် အလုပ်သမားများကို မြို့မရပ်ကွက် အားကစားကွင်းတွင် ခရိုင်အဆင့်ဌာန ဆိုင်ရာ တာဝန်ရှိသူများ၊ COVID-19 ရောဂါ ကာကွယ်၊ ထိန်းချုပ်၊ ကုသရေးကော်မတီအဖွဲ့ဝင်များ၊ စစ်ဖက်ဆိုင်ရာအဖွဲ့များ၊ မြန်မာနိုင်ငံကြက်ခြေနီအသင်းအဖွဲ့များ၊ လူမှုကူညီရေးအသင်းအဖွဲ့များက လူဦးရေစာရင်းကောက်ယူခြင်း၊  ကျန်းမာရေးစစ်ဆေးပေးခြင်း၊ အစားအသောက်များ ဝေငှပေးခြင်း၊ သတ်မှတ်လိုင်းကားများ စီးနင်နိုင်ရန်စီစဉ်ပေးခြင်း များပြုလုပ်ပေးခဲ့ကြောင်း သိရသည်။
.
တရုတ်ပြည်မှ ကျပန်းအလုပ်လုပ်ကိုင်ရာမှ COVID-19 ရောဂါအခြေအနေများကြောင့် နယ်စပ်ဒေသ မိုင်းယုမြို့သို့ မေလ ၂၃ ရက်နေ့အထိ  Quarantine ၂၁ ရက်ပြုလုပ်ပြီးသော နေရပ်ပြန် မြန်မာအလုပ်သမားများ ၄ ကြိမ်မြောက် စုစုပေါင်း ၁၅၁၈ ဦး ဝင်ရောက်လာခဲ့ပြီး ၎င်းတို့ကို နယ်စပ်ဒေသ မိုင်းယုမြို့မှတစ်ဆင့် တောင်ကြီးမြို့သို့ ပို့ဆောင် ပေးခဲ့ခြင်းဖြစ်ကြောင်း သိရသည်။
.

No comments:

Post a Comment

Journal Download

Photo of three cats

About