လားရှိုးဆေးရုံမှ လူနာအမှတ်(၁၄)၏ ဒုတိယအကြိမ် ဓာတ်ခွဲအဖြေတွင် ပိုး မတွေ့

နန်းဝင်းရီ

.

ရှမ်းပြည်နယ်မြောက်ပိုင်း၊ လားရှိုးပြည်သူ့ဆေးရုံကြီးတွင် ဆေး ကုသမှု ခံယူနေသော ကျောက်မဲမြို့မှ COVID-19 ပိုးတွေ့လူနာ အမှတ်(၁၄)၏ ဒုတိယအကြိမ် ဓာတ်ခွဲအဖြေတွင် ရောဂါပိုး မတွေ့ရကြောင်း သိရသည်။

.

ယင်း COVID-19 ပိုးတွေ့လူနာ အမှတ် (၁၄) ၏ ဓါတ်ခွဲနမူနာအား ၅ ကြိမ် အထိ ဓါတ်ခွဲစစ်ဆေးခဲ့ခြင်း ဖြစ်ပြီး စတုတ္ထအကြိမ်နှင့် ပဥ္စမအကြိမ် စစ်ဆေးမှုတွင် ၂ ကြိမ်ဆက်တိုက် ရောဂါပိုး မတွေ့ရှိတော့ခြင်း ဖြစ်ကြောင်း သိရသည်။

.

“ Negative ၂ ကြိမ်ပါ။ ဆေးရုံ ဘယ်လို ပေးဆင်းရမလဲဆိုတော့ ဒီမှာ ရှိတဲ့ သမားတော်ကြီးတွေနဲ့ နေပြည်တော်က ရုံးချုပ်နဲ့ ကျွန်တော်တို့ တိုင်ပင်ပြီးတော့ စီစဉ်မှာပါ၊ ဆင်းရဖို့ များပါတယ်။ ကျန်းမာရေး အခြေအနေလည်း ကောင်းပါတယ်။ Positive က ဒီကြားထဲမှာ ၂ ခါလောက် ထွက်ထားတော့ အဲတာလေးတစ်ခုကိုပဲ ကျွန်တော်တို့ နည်းနည်းလေး စောင့်ကြည့်ချင်တဲ့ အနေအထား တစ်ခုပဲ ရှိပါတယ်။ ဒါပေမဲ့ ဆင်းရဖို့ပဲ ရှိပါတယ်။”  ဟု လားရှိုးပြည်သူ့ဆေးရုံကြီးမှ ဒေါက်တာဉာဏ်မြင့်က ကမ္ဘောဇတိုင်းသို့ ပြောသည်။

.

အဆိုပါ လူနာအမှတ် (၁၄)သည် ထိုင်းနိုင်ငံမှ ကျောက်မဲမြို့သို့ ပြန်လည်ရောက်ရှိလာသည့် အသက် ၂၄ နှစ်အရွယ် အမျိုးသား ဖြစ်ပြီး ကျောက်မဲဆေးရုံ၌ စောင့်ကြည့်လူနာအဖြစ် သတ်မှတ်၍ ဓါတ်ခွဲနမူနာအား စစ်ဆေးစဉ် COVID-19 ပိုး တွေ့ရှိခဲ့ပြီးနောက် လားရှိုးဆေးရုံသို့ ပြောင်းရွှေ့၍  ဆေးကုသမှု ပေးနေခြင်း ဖြစ်သည်။

.

မြန်မာနိုင်ငံတွင် ယနေ့ (မေလ ၁ ရက်)၊ နံနက် ၇ နာရီအထိ COVID-19 ပိုးတွေ့ အတည်ပြုလူနာ ၁၅၁ ဦး ရှိလာပြီ ဖြစ်ပြီး ယင်းအနက် ၆ ဦး သေဆုံး၍ ၂၈ ဦးမှာ ပြန်လည် သက်သာလာပြီ ဖြစ်ကာ ရှမ်းပြည်နယ်တွင်မူ COVID-19 အတည်ပြုလူနာ ၇ ဦး ရှိ၍ ၂ ဦးမှာ ပြန်လည် သက်သာလာပြီ ဖြစ်ကြောင်း သိရသည်။