တရုတ်နိုင်ငံ၊ ဝူဟန်အကျဉ်းထောင်မှ ပြန်လွှတ်လာသူ မြန်မာနိုင်ငံသားများတွင် ရှမ်းမြောက်ဒေသမှ အများဆုံး ပါဝင် - Kanbawza Tai News

Breaking

ကမ္ဘောဇတိုင်းသတင်းဂျာနယ်သည် တောင်ကြီးမြို့တွင် အခြေစိုက်၍ ထုတ်ဝေခွင့်အမှတ် (မြဲ-၀၁၀၇၉)ဖြင့် ဆောင်ရွက်နေသည့် တရားဝင် သတင်းမီဒီယာ တစ်ခု ဖြစ်ပါသည်။

Friday, May 8, 2020

တရုတ်နိုင်ငံ၊ ဝူဟန်အကျဉ်းထောင်မှ ပြန်လွှတ်လာသူ မြန်မာနိုင်ငံသားများတွင် ရှမ်းမြောက်ဒေသမှ အများဆုံး ပါဝင်

မင်းဇော်မင်း
.
COVID-19 ကပ်ရောဂါ စတင်ကူးစက်ပြန့်ပွားရာ တရုတ်နိုင်ငံ၊ ဟူပေပြည်နယ်၊ ဝူဟန်မြို့ရှိ အကျဉ်းထောင်မှ ပြန်လည် လွတ်မြောက်လာသည့် မြန်မာနိုင်ငံသားများတွင် ရှမ်းပြည်နယ်မြောက်ပိုင်းဒေသအတွင်းနေထိုင်သူ အများဆုံး ပါဝင်နေ ကြောင်း မူဆယ်ခရိုင် အထွေထွေအုပ်ချုပ်ရေးဦးစီးဌာနက သိရသည်။
.
 
.
“အားလုံး ၂၄၃ ယောက်မှာ ၂ ယောက်က ဖျားနေလို့ ပြန်ခေါ်သွားတယ်။ မူဆယ်မှာ ခေတ္တအနေနဲ့ Quarantine ထားရှိ ပေမဲ့ ၂၁ ရက်တော့ မဟုတ်ပါဘူး။ သူတို့ကို တရုတ်နိုင်ငံက ၃ လပြည့် စောင့်ကြည့်ပြီးတဲ့ အထောက်အထား စာရွက် စာတမ်းတွေ ပါပါတယ်။ သက်ဆိုင်ရာ မြို့တွေကို ဆက်လက်ပို့ဆောင်သွားမှာဖြစ်ပါတယ်” ဟု မူဆယ်ခရိုင် အထွေထွေ အုပ်ချုပ်ရေးဦးစီးဌာနမှ လက်ထောက်ညွှန်ကြားရေးမှူး ဦးမောင်မောင်သန်းက ပြောသည်။
.
မူဆယ်ရှိ COVID-19 ကာကွယ်၊ ထိန်းချုပ်ရေးကော်မတီမှ တရုတ်နိုင်ငံပြန်များကို စိစစ်၍ပြန်လည် လက်ခံလျက်ရှိရာ မေလ ၇ ရက်က ပြန်လည်လက်ခံသည့် လူဦးရေ ၂၆၀ ဦးတွင် ကျား ၁၇၁ ဦး၊ မ ၇၀ ဦး၊ စုစုပေါင်း ၂၄၁ ဦးမှာ COVID-19  စတင် ဖြစ်ပွားရာ တရုတ်နိုင်ငံ ၊ ဟူပေပြည်နယ်၊ ဟိုနန့်ဒေသ၊ ဝူဟန်မြို့ရှိအကျဉ်းထောင်မှလွတ်လာသူများ ဖြစ်ကြောင်း သိရသည်။
.
၎င်းတို့အနက် ၁၂၆ ဦးမှာ ရှမ်းပြည်နယ်မြောက်ပိုင်းမြို့များဖြစ်သည့် ကွတ်ခိုင်၊ ကျောက်မဲ၊ နမ့်ခမ်း၊ မိုင်းလုံ၊ နောင်ချို၊ မန်တုံ၊ မိုးမိတ်၊ လားရှိုး၊ လောက်ကိုင်၊ မူဆယ်၊ နမ့်ဆန်မြို့များမှ အများဆုံးဖြစ်ပြီး ကျန်သူများမှာ ရန်ကုန်တိုင်းဒေသကြီး၊ ရခိုင်ပြည်နယ်၊ ပဲခူးတိုင်း၊ စစ်ကိုင်းတိုင်းဒေသကြီး၊ ကချင်ပြည်နယ်၊ မကွေးတိုင်းဒေသကြီး၊ ချင်းပြည်နယ် စသည့်ဒေသများမှ ဖြစ်ကြောင်း သိရသည်။
.
လက်ရှိတွင် ၎င်းတို့ကို မူဆယ်မြို့ပေါ် Quarantine စင်တာများဖြစ်သည့် တရုတ်ဘုံကျောင်းတွင် အမျိုးသားများကို လည်းကောင်း၊ အထက (၃)တွင် အမျိုးသမီးများကိုလည်းကောင်း ခွဲခြား၍ ထားရှိကာ ကျန်းမာရေးဆိုင်ရာ စစ်ဆေးမှုများ ပြုလုပ်လျက်ရှိပြီး သက်ဆိုင်ရာ နေရပ်အသီးသီးသို့ ပြန်လည်ပို့ဆောင်ရေး စီစဉ်ဆောင်ရွက်လျက်ရှိကြောင်း သိရသည်။
.

No comments:

Post a Comment

Journal Download

Photo of three cats

About