မူဆယ်သင်္ချိုင်းအနီးတွင် လက်နက်ခဲယမ်းများ သိမ်းဆည်းရမိ

မင်းဇော်မင်း

.

ရှမ်းပြည်နယ်မြောက်ပိုင်း၊ မူဆယ်မြို့အစွန် သင်္ချိုင်းအနီးတွင် မေလ ၁၆ ရက်၊ ညနေပိုင်းက လက်နက်ခဲယမ်းများကို ပိုင်ရှင်မဲ့ တွေ့ရှိသိမ်းဆည်းရမိခဲ့ကြောင်း တပ်မတော်ကာကွယ်ရေးဦးစီးချုပ်ရုံး၏ သတင်းထုတ်ပြန်ချက်အရ သိရသည်။

.

 

.

မူဆယ်မြို့နယ်အတွင်း လုံခြုံရေးဆောင်ရွက်နေသော တပ်ဖွဲ့ဝင်များပါဝင်သော ပူးပေါင်းအဖွဲ့သည် သတင်းအရ မေ ၁၆ ရက် ည ၇ နာရီခန့်က  မူဆယ်မြို့အစွန် သင်္ချိုင်း အနီး၌ ရှာဖွေစစ်ဆေးရာ အမှိုက်ကျင်းအတွင်းမှ မြေစာများဖြင့် ဖုံးအုပ် ပြီး ဆာလာအိတ်ဖြင့် ထုပ်ပိုးထားသည့်  ပါရိအမျိုးအစား မောင်းပြန်ရိုင်ဖယ် ၁ လက်၊ အမ် ၂၂ မောင်းပြန် ရိုင်ဖယ် ၃ လက်၊ အမ် ၂၂ ကျည် ၁၀၂ တောင့်၊ ပါရိကျည်အိမ် ၁ ခုနှင့် အမ် ၂၂ ကျည်အိမ် ၃ ခုတို့အား ပိုင်ရှင်မဲ့ သိမ်းဆည်းရမိခဲ့ ကြောင်း သိရသည်။

.

ဆက်လက်ပြီး ပူးပေါင်းအဖွဲ့သည် အဆိုပါနေရာတစ်ဝိုက်အား ထပ်မံ ရှာဖွေရာ ၎င်းနေရာ၏ အနောက်မြောက်ဘက် မီတာ ၅၀၀ ခန့်အကွာ တဲပျက်အတွင်း၌ ဆာလာအိတ်ဖြင့် ထုပ်ပိုးထားသော ဘာရက်တာပစ္စတို (ပွိုင့်-၂၅) ၁ လက်၊ ၎င်းကျည် ၇ တောင့်၊ ကျည်အိမ် ၁ ခု၊ လူဂါပစ္စတို ၁ လက်၊ ၎င်းကျည်အိမ် ၁ ခု၊ ကြိုးဆွဲလက်ပစ်ဗုံး ၃ လုံး၊ လက်ပစ်ဗုံး အသေး (ဖြူ့စ်ပါ) ၂ လုံးတို့အား ထပ်မံ သိမ်းဆည်းရမိခဲ့ခြင်းဖြစ်ကြောင်း သိရသည်။

.

အဆိုပါ  သိမ်းဆည်းရမိ လက်နက်၊ခဲယမ်းများအား လုပ်ထုံးလုပ်နည်းနှင့်အညီ ဆက်လက်ဆောင်ရွက်သွားမည် ဖြစ်ကြောင်း တပ်မတော် ကာကွယ်ရေးဦးစီးချုပ်ရုံး၏ ထုတ်ပြန်ချက်တွင် ဖော်ပြထားသည်။

.