နန်းဝင်းရီ
.
ရှမ်းပြည်နယ်တောင်ပိုင်း၊ ပအိုဝ်းကိုယ်ပိုင် အုပ်ချုပ်ခွင့်ရဒေသ
ဟိုပုံးမြို့အဝင် ၂ နေရာနှင့် ယာယီစျေးတို့တွင် နှာခေါင်း စည်း Mask တပ်ဆင်လာခြင်း
မရှိပါက ဝယ်ယူတပ်ဆင်စေလျက်ရှိကြောင်း ဟိုပုံးမြို့နယ် အထွေထွေအုပ်ချုပ်ရေး ဦးစီးဌာနမှ
သိရသည်။
.
.
"Mask မတပ်ရင် စျေးထဲ မဝင်ခိုင်းဘူး။ Mask သွားဝယ်ခိုင်းတယ်။
တပ်ပြီးမှ စျေးထဲဝင် အဲဒီလို လုပ်ခိုင်းတာပါ။ Mask အလကားဝေတဲ့ အကြိမ်ပေါင်းလည်း မနည်းတော့ဘူး။
အသိပေးတဲ့ အကြိမ်ပေါင်းလဲ မနည်းတော့ဘူး။ မြို့အဝင် ၂ ဂိတ်မှာတော့ လုပ်နေပြီ။ Mask မပါရင်
ဝယ်ခိုင်းတယ်။"ဟု ဟိုပုံးမြို့နယ် အုပ်ချုပ်ရေးမှူး ဦးနန်းတင့်က ကမ္ဘောဇတိုင်း
သို့ ပြောသည်။
ထို့အတူ ဟိုပုံးဒေသခံတစ်ဦးကလည်း "Mask မတပ်တာများတယ်။ လူကြီးတွေနဲ့
စည်ပင်အဖွဲ့ပေါင်းစုံတွေက စျေးသည် စျေးဝယ်တွေကို Mask ဝေတယ်။ ဝေတုန်းပဲ တပ်ကြတယ်၊ လူကြီးတွေ
မရှိတာနဲ့ မတပ်ကြတော့ဘူး။ လိုက်နာမှုအားနည်းကြတယ်။ Mask မပါတဲ့သူကို တော့ ဝယ်ခိုင်းပါတယ်။"
ဟု ပြောဆိုခဲ့သည်။
.
ဟိုပုံးမြို့၊ ကျွဲ၊ နွားပွဲစျေး မြေနေရာတွင် ဖွင့်လှစ်ထားသည့်
ယာယီဈေးကို ၅ ရက်တစ်ဈေး ဈေးနေ့မှအပ နေ့စဉ် နံနက် ၅ နာရီမှ ၁၁ နာရီထိ ဖွင့်လှစ် ရောင်းချခွင့်
ပြုထားပြီး ဈေးသည်များ၊ ပြည်သူများအား နှာခေါင်းစည်း (Mask)တပ်၍ ဈေးသို့ လာရောက်ရန်နှင့်
စုပြုံ တိုးဝှေ့ ဈေးဝယ်ခြင်းမပြုရန် ဟိုပုံးမြို့နယ် စည်ပင်သာယာရေးကော်မတီက နှိုးဆော်ထားသည်။
.
