ကျိုင်းတုံနှင့် တာချီလိတ်တွင် စက်သုံးဆီဈေးများ ဆက်တိုက်ကျဆင်း

ထက်တိုင်းကျော်

.

ရှမ်းပြည်နယ်အရှေ့ပိုင်း၊ ကျိုင်းတုံနှင့် တာချီလိတ်မြို့များတွင် စက်သုံးဆီဈေးများ ဆက်တိုက် ကျဆင်းလျက်ရှိ ကြောင်း ရှမ်းပြည်နယ်အရှေ့ပိုင်း၊ မြန်မာ့ရေနံနှင့် ရေနံထွက်ပစ္စည်း ရောင်းဝယ်ရေး ပြည်နယ်မန်နေဂျာရုံးမှ သိရသည်။

.

.

တာချီလိတ်မြို့တွင် ယခင်ကာလများနှင့် နှိုင်းယှဉ်ပါက ဓါတ်ဆီ 95 တစ်လီတာလျှင် ၂ ဘတ်၊ 92 တစ်လီတာလျှင်၁ ဘတ်၊ ဒီဇယ်တစ်လီတာလျှင် ၂ ဘတ်ခန့် ဈေးနှုန်းကျဆင်းခဲ့ပြီး ကျိုင်းတုံတွင် ဓါတ်ဆီ 95 တစ်လီတာလျှင် ၉၀ ကျပ်၊ 92 တစ်လီတာလျှင် ၅၀ ကျပ်နှင့် ဒီဇယ်တစ်လီတာလျှင် ၉၀ ကျပ် ဈေးနှုန်းကျဆင်းခဲ့ခြင်းဖြစ်ကြောင်း သိရသည်။

.

“ဝယ်ဈေးကို မူတည်ပြီးတော့ ဈေးနှုန်းအပြောင်းအလဲ ဖြစ်နိုင်ပါတယ်။ ဖြစ်လာတဲ့ ဈေးနှုန်းအပြောင်းအလဲကို လည်း အများပြည်သူသိအောင် ထုတ်ပြန်ကြေညာပေးသွားပါမယ်” ဟု ကျိုင်းတုံမြို့ရှိ ရှမ်းပြည်နယ်အရှေ့ပိုင်း၊ မြန်မာ့ရေနံနှင့် ရေနံထွက်ပစ္စည်း ရောင်းဝယ်ရေး ပြည်နယ်မန်နေဂျာရုံးမှ ဦးစိုင်းရီစံခတ်က ကမ္ဘောဇတိုင်းသို့ ပြောသည်။

.

“စက်သုံးဆီဈေးတွေကျလို့ ဝမ်းမသာနိုင်ပါဘူး။ COVID-19 ကြောင့် ရှမ်းပြည်နယ်အစိုးရက တာချီလိတ်၊ ကျိုင်းတုံ ကနေ မဖြစ်မနေ တောင်ကြီးကိုသွားဖို့ လိုအပ်ရင် ကားခ ၂ ဆ သတ်မှတ်ထားပါတယ်” ဟု ကျိုင်းတုံဒေသခံ တစ်ဦးက ၎င်း၏အမြင်ကို ပြောဆိုခဲ့သည်။

.

ကမ္ဘာ့နိုင်ငံအများအပြားတွင် COVID-19  ကပ်ရောဂါ ကူးစက်ပြန့်ပွားမှုကြောင့် စီးပွားရေးလုပ်ငန်းများ ရပ်နား နေပြီး ရေနံဝယ်လိုအား ကျဆင်းနေသဖြင့် ဈေးနှုန်းများ ဆက်တိုက်ကျဆင်းနေခြင်းဖြစ်ကြောင်း သိရသည်။

.