ကျိုင်းတုံဒေသထွက် မက်မန်းသီးများ ရောင်းအားကောင်းလျက်ရှိ

ထက်တိုင်းကျော်

.

ရှမ်းပြည်နယ်အရှေ့ပိုင်း၊ ကျိုင်းတုံဒေသထွက် မက်မန်းသီးများသည် အရွယ်အစားကြီးမားပြီး အရသာ ကောင်းမွန် သဖြင့် လူကြိုက်များ၍ ရောင်းအားကောင်းလျက်ရှိကြောင်း သိရသည်။

.

 

.

မက်မန်းသီးသည် ကျိုင်းတုံမြို့၏ ရာသီဥတုနှင့် ကိုက်ညီမှုရှိပြီး ယခုနှစ် ရာသီပေါ်ချိန်တွင် ပိုးမွှားနှင့် လေဒဏ်မိုး ဖျက်ဆီးမှုဒဏ် အန္တရာယ်ကို မကြုံတွေ့ရသဖြင့် အသီးလှ၍ အထွက်နှုန်း ကောင်းမွန်လျက်ရှိသည်ဟု မက်မန်းစိုက်ပျိုး သည့် တောင်သူများထံက သိရသည်။

.

“ဒီနှစ်မက်မန်းသီးက အလုံးအရွယ်လည်းလှပြီး အရသာလည်း ကောင်းတော့ တခြားမြို့တွေကနေ မှာယူကြတာ ရှိပါတယ်။ COVID-19 သာ မရှိခဲ့ဘူးဆိုရင် ဈေးနှုန်း ပိုရနိုင်ပါတယ်” ဟု ကျိုင်းတုံမြို့နေ မက်မန်းစိုက် တောင်သူတစ်ဦး က ပြောသည်။

.

ကျိုင်းတုံဈေးကွက်တွင် မက်မန်းသီးအလေးချိန် တစ်ကီလိုလျှင် ၁၀၀၀ ကျပ်‌နှုန်းဖြင့် ရောင်းချလျက်ရှိပြီး ကျိုင်းတုံ မြို့တွင်း နေရာများသို့ ၅ ကီလိုနှင့်အထက် မှာယူပါက အိမ်တိုင်ရာရောက် ပို့ဆောင်ပေးသည့် ဝန်ဆောင်မှုများလည်း ရှိကြောင်း သိရသည်။

.

COVID-19 ကပ်ရောဂါ ကူးစက်ပြန့်ပွားမှု မရှိမီ ယခင်နှစ်များက ကျိုင်းတုံဒေသထွက် မက်မန်းသီးများကို “ဝ” အထူးဒေသ (၂)၊ မိုင်းလား အထူးဒေသ (၄) နှင့် ရှမ်းပြည်နယ်အရှေ့ပိုင်းမြို့များသို့ သာမက တောင်ကြီးမှတစ်ဆင့် ရန်ကုန်၊ မန္တလေးမြို့များသို့ တင်ပို့ရောင်းချခဲ့ရပြီး ကျိုင်းတုံမြို့နယ်၊ လွယ်မွေဒေသတွင် မက်မန်းဝိုင်အား စီးပွားဖြစ် ထုတ်လုပ်ရောင်းချကြကြောင်း သိရသည်။

.