နိုင်ငံတော်၏ ထောက်ပံ့ရိက္ခာမရသည့် ကျိုင်းတုံရှိ ကျေးရွာများသို့ ပရဟိတစေတနာရှင်များမှ စုပေါင်းလှူဒါန်း

ထက်တိုင်းကျော်

.

ရှမ်းပြည်နယ်အရှေ့ပိုင်း၊ ကျိုင်းတုံမြို့နယ်တွင် COVID-19 ကူးစက်ရောဂါ ကာကွယ်ရေးကာလအတွင်း နိုင်ငံတော်မှ ထောက်ပံ့သည့် ရိက္ခာ ၅ မျိုး မရရှိသည့် ကျေးရွာများသို့ ပရဟိတစေတနာရှင်များမှ စုပေါင်းလှူဒါန်းမှုများ ပြုလုပ်ခဲ့ ကြောင်း သိရသည်။

.

.

ယင်းကဲ့သို့ နိုင်ငံတော်မှ ထောက်ပံ့သည့် ရိက္ခာမရရှိသည့် ကျိုင်းတုံမြို့နယ်၊ ပင်းတောက်ကျေးရွာအုပ်စုရှိ ဗေသလ ကျေးရွာသို့ ယနေ့ မေလ ၁ ရက်တွင် အလှူရှင်များက အိမ်ထောင်စု ၅၈ စုအတွက် တစ်အိမ်ထောင်လျှင် ၄၅၀၀ ကျပ် တန်ဖိုးရှိသော စားဆီ၊ ဟင်းချိုမှုန့်၊ ငါးခြောက်၊ ဗလာချောင်ကြော်နှင့် ဆားတို့ကို ပေးအပ်လှူဒါန်းခဲ့ကြောင်း သိရသည်။

.

“ကျွန်မကို ဗေသလရွာကနေ ဖုန်းဆက်အကူအညီတောင်းလာပါတယ်။ ရွာထဲကို လူစိမ်းဝင်မရသလို တခြားရွာတွေကို လည်း သွားဖို့ခက်ခဲလို့ ဆန်ရှိပေမဲ့ တခြားစားနပ်ရိက္ခာ အခက်အခဲရှိတယ်ဆိုလို့ အွန်လိုင်းပေါ်ကနေ အလှူခံလို့ ရထားတဲ့ ငွေနဲ့ အခုလို လာလှူတာဖြစ်ပါတယ်” ဟု လှူဒါန်းမှုအား ဦးဆောင်သူ ဒေါ်ချစ်ဖူးငုံက ကမ္ဘောဇတိုင်းသို့ ပြောသည်။

.

“ကျွန်မတို့ရွာမှာ ဆင်းရဲ့တဲ့သူ၊ လယ်မရှိတဲ့သူနဲ့ လယ်ရှိပြီး မစားလောက်တဲ့အိမ်တွေ များပါတယ်။ နိုင်ငံတော်ကနေ ထောက်ပံ့ပေးတဲ့ ရိက္ခာကို တစ်အိမ်မှ မရကြပါဘူး” ဟု ဗေသလကျေးရွာတွင် နေထိုင်သူတစ်ဦးကလည်း ပြောဆိုခဲ့သည်။

.

ကျိုင်းတုံမြို့နယ်တွင် မြို့ပေါ် ၅ ရပ်ကွက်နှင့် ကျေးရွာအုပ်စု ၃၁ အုပ်စုရှိပြီး နိုင်ငံတော်အစိုးရ၏ COVID-19 ကူးစက် ရောဂါ ကြိုတင်ကာကွယ်ရေးကာလအတွက် ရိက္ခာ ၅ မျိုး ထောက်ပံ့မှုတွင် မရရှိသည့် ကျေးရွာများ ကျန်ရှိနေကြောင်း ဒေသခံများထံက သိရသည်။

.