ဒုတိယအကြိမ် ရှမ်းပြည်နယ်လွှတ်တော် အထူးအစည်းအဝေး (၁/၂၀၂၀) တွင် လေ့လာသူများအား တက်ရောက်ခွင့် မပြု - Kanbawza Tai News

Breaking

ကမ္ဘောဇတိုင်းသတင်းဂျာနယ်သည် တောင်ကြီးမြို့တွင် အခြေစိုက်၍ ထုတ်ဝေခွင့်အမှတ် (မြဲ-၀၁၀၇၉)ဖြင့် ဆောင်ရွက်နေသည့် တရားဝင် သတင်းမီဒီယာ တစ်ခု ဖြစ်ပါသည်။

Thursday, May 7, 2020

ဒုတိယအကြိမ် ရှမ်းပြည်နယ်လွှတ်တော် အထူးအစည်းအဝေး (၁/၂၀၂၀) တွင် လေ့လာသူများအား တက်ရောက်ခွင့် မပြု


စုလှိုင်
.
ဒုတိယအကြိမ် ရှမ်းပြည်နယ်လွှတ်တော် အထူးအစည်းအဝေး (၁/၂၀၂၀) ကို လာမည့် မေလ ၁၈ ရက်တွင် စတင် ပြုလုပ်သွားမည်ဖြစ်ပြီး လွှတ်တော်လေ့လာရေး လာရောက်သူများကို တက်ရောက်ခွင့် မပြုထားကြောင်း သိရသည်။
.
 
.
“လေ့လာရေးအဖွဲ့တွေက အရင်က အပေါ်ထပ်မှာပဲ ထားတာပါ။ Social Distancing လုပ်တဲ့အခါ လွှတ်တော် ကိုယ်စားလှယ်တွေက အဲဒီအပေါ်ကို ရောက်သွားမယ်။ ဒီတော့ လေ့လာသူတွေကို နေရာမပေးနိုင်လို့ အခုလို ထုတ်ပြန်တာပါ။ လွှတ်တော်အစည်းအဝေးက ၂ ရက်ပဲ လုပ်မှာပါ။ မေးခွန်း၊ အဆိုတွေ မပါဘူး။ BE (ရသုံးမှန်းခြေ ငွေစာရင်း လျာထားချက်) အတွက် လုပ်မှာပါ” ဟု ရှမ်းပြည်နယ်လွှတ်တော် ဒုတိယဥက္ကဋ္ဌ ဦးစဝ်အောင်မြတ်က ကမ္ဘောဇတိုင်း သို့ ပြောသည်။
.
ယင်းကဲ့သို့ လွှတ်တော်အစည်းအဝေး ကျင်းပရာတွင် COVID -19 ကပ်ရောဂါ ကူးစက်မှုမှ ကာကွယ်နိုင်ရန်အတွက် လွှတ်တော်ကိုယ်စားလှယ် တစ်ဦးနှင့်တစ်ဦးအကြား ၆ ပေခြားစီဖြင့် အောက်ထပ်တွင် ၉၂ ဦးနှင့် အပေါ်ထပ်တွင် ၂၇ ဦး တို့ကို နေရာချသွားပေးမည်ဖြစ်သဖြင့် လေ့လာရေးအဖွဲ့များအတွက် နေရာချထားပေးနိုင်ရှိမှု မရှိခြင်းဖြစ်ကြောင်း သိရသည်။
.
ထို့အပြင် လွှတ်တော်အစည်းအဝေးတွင် သတင်းမီဒီယာများအား ပုံမှန်အတိုင်း သတင်းရယူနိုင်ရန် စီစဉ်ဆောင်ရွက် ပေးထားပြီး ပြန်ကြားရေးနှင့် ပြည်သူ့ဆက်ဆံရေးဦးစီးဌာန၏ အကူအညီဖြင့် ကျန်းမာရေးစစ်ဆေးခြင်းများ ဆောင်ရွက် သွားမည်ဖြစ်ကြောင်း သိရသည်။
.
"၂၀၂၀-၂၀၂၁ ဘဏ္ဍာရေးနှစ်အတွက် ရသုံးမှန်းခြေငွေစာရင်းတွေ ဆွေးနွေးဖို့ မဖြစ်မနေလုပ်ရမှာဖြစ်လို့ အခက်အခဲကြားက အစည်းအဝေး ခေါ်ယူလိုက်တာပါ” ဟု ဦးစဝ်အောင်မြတ်က ဆက်လက် ပြောဆိုခဲ့သည်။
.
ဒုတိယအကြိမ် ရှမ်းပြည်နယ်လွှတ်တော် သက်တမ်းအတွင်း ပုံမှန်အစည်းအဝေး ၁၈ ကြိမ်၊ အရေးပေါ် အစည်းအဝေး ၄ ကြိမ်နှင့် အထူးအစည်းအဝေး ၁ ကြိမ် စုစုပေါင်း လွှတ်တော် အစည်းအဝေး ၂၃ ကြိမ် ကျင်းပ ပြုလုပ်ခဲ့ပြီးဖြစ်ကြောင်း သိရသည်။
.

No comments:

Post a Comment

Journal Download

Photo of three cats

About