ကျိုင်းတုံတွင် ဟိုတယ်လုပ်ငန်းရှင်များအား COVID-19 ကူးစက်ရောဂါ ကြိုတင်ကာကွယ်ရေး ဟောပြော - Kanbawza Tai News

Breaking

ကမ္ဘောဇတိုင်းသတင်းဂျာနယ်သည် တောင်ကြီးမြို့တွင် အခြေစိုက်၍ ထုတ်ဝေခွင့်အမှတ် (မြဲ-၀၁၀၇၉)ဖြင့် ဆောင်ရွက်နေသည့် တရားဝင် သတင်းမီဒီယာ တစ်ခု ဖြစ်ပါသည်။

Sunday, May 17, 2020

ကျိုင်းတုံတွင် ဟိုတယ်လုပ်ငန်းရှင်များအား COVID-19 ကူးစက်ရောဂါ ကြိုတင်ကာကွယ်ရေး ဟောပြော


ထက်တိုင်းကျော်
.
ရှမ်းပြည်နယ်အရှေ့ပိုင်း၊ ကျိုင်းတုံမြို့ရှိ Amazing Hotel တွင် မေလ ၁၆ ရက်၊ နံနက်ပိုင်းက ဟိုတယ်၊ မိုတည်၊ တည်းခိုခန်းလုပ်ငန်းရှင်နှင့် ဝန်ထမ်းများအား COVID-19 ကူးစက်ရောဂါ ကြိုတင်ကာကွယ်ရေး အသိပညာပေး ဆွေးနွေး ဟောပြောမှုများ ပြုလုပ်ခဲ့သည်ဟု သိရသည်။
.
 
.
ရှမ်းပြည်နယ်အစိုးရ၏  ခွင့်ပြုချက် ရရှိပါက ဟိုတယ်လုပ်ငန်းများ စတင်ဆောင်ရွက်ရာတွင် ဘေးအန္တရာယ် ကင်းရှင်း စေရေးအတွက် ယင်းကဲ့သို့ ဟောပြောဆွေးနွေးခဲ့ခြင်းဖြစ်သည်ဟု သိရသည်။
.
အသိပညာပေး ဟောပြောပွဲတွင် ရှမ်းပြည်နယ်အရှေ့ပိုင်း ပြည်သူ့ကျန်းမာရေးဦးစီးဌာနမှ ပြည်နယ်ဦးစီးမှူး ဒေါက်တာ မြင့်ကျော်က လက်ရှိ ကမ္ဘာတွင် ပျံ့နှံ့ဖြစ်ပွားနေသည့် COVID-19 ကူးစက်ရောဂါအား ကာကွယ်ဆေးနှင့် ကုသဆေးကို ပြည်သူများ အသုံးပြုနိုင်မည့် အချိန်ကာလမှာ ကြိုတင်မသိရှိနိုင်သေးသဖြင့် ကျန်းမာရေးဦးစီးဌာနက ထုတ်ပြန်ထား သော COVID-19 ကူးစက်ရောဂါ ကာကွယ်ထိန်းချုပ်ရေးနည်းစနစ်များကို လိုက်နာဆောင်ရွက်ခြင်းသာ အကောင်းဆုံး ဖြစ်သည်ဟု ပြောဆိုခဲ့သည်။
.
“ရှမ်းပြည်နယ်အစိုးရအဖွဲ့ရဲ့ လမ်းညွှန်မှုနဲ့ ကျိုင်းတုံမှာရှိတဲ့ ဟိုတယ်၊ မိုတယ်၊ တည်းခိုခန်းတွေကို ပြန်ဖွင့်ခွင့် ပြုမယ် ဆိုရင် လုပ်ငန်းရှင်တွေနဲ့ ဝန်ထမ်းတွေကို COVID-19 ကူးစက်ရောဂါ ကြိုတင်ကာကွယ်ရေးအတွက် ဆောင်ရန်/ရှောင် ရန်နည်းလမ်းတွေကို သိရှိနိုင်အောင်လို့ အခုလို ဆွေးနွေးဟောပြောပွဲကို ကျင်းပရတာဖြစ်ပါတယ်” ဟု ကျိုင်းတုံမြို့ရှိ ရှမ်းပြည်နယ်ဟိုတယ်နှင့် ခရီးသွားလုပ်ငန်း ညွှန်ကြားမှုဦးစီးဌာနမှ လက်ထောက်ညွှန်ကြားရေးမှူး ဦးစန်းလှိုင်က ကမ္ဘောဇတိုင်းသို့ ပြောသည်။
.
ထို့အတူ ကျိုင်းတုံမြို့ရှိ ဟိုတယ်လုပ်ငန်းရှင်များအသင်း ဥက္ကဋ္ဌ ဦးရဲမြင့်အောင်ကလည်း “COVID-19 ကူးစက်ရောဂါ ကြိုတင်ကာကွယ်ရေး လုပ်ငန်းစဉ်တွေကို တိတိကျကျ လိုက်နာမှ လုပ်ငန်းရှင်နဲ့ ဝန်ထမ်းတွေရော၊ လာတည်းခိုတဲ့ ဧည့်သည်တွေပါ ဘေးအန္တရာယ် ကင်းမှာဖြစ်ပါတယ်။ ရောဂါကာကွယ်ရေးအတွက် ကုန်ကျစရိတ် ပိုတိုးလာမှာဖြစ်လို့ ဝန်ဆောင်ခတွေလည်း ပိုသွားနိုင်ပါတယ်။ ဒါကို ကာမိအောင်ဆိုရင် အခွန်လျှော့ချပေးစေချင်ပါတယ်” ဟု ၎င်း၏ အမြင်ကို ပြောဆိုခဲ့သည်။
.
ကျိုင်းတုံမြို့တွင် ဟိုတယ်၊ မိုတယ်၊ တည်းခိုခန်း ၁၇ ခု ရှိပြီး တာချီလိတ်မြို့တွင် ၅၀ ခန့်ရှိကာ COVID-19 ကူးစက် ရောဂါ ကာကွယ်ထိန်းချုပ်ရေးအတွက် ဧပြီလဆန်းမှ စတင်၍ လုပ်ငန်းများ ရပ်နားထားခြင်း ဖြစ်ကြောင်း သိရသည်။
.

No comments:

Post a Comment

Journal Download

Photo of three cats

About