စုလှိုင်
.
ရှမ်းပြည်နယ်မြို့တော် တောင်ကြီးမြို့မှ COVID-19 ပိုးတွေ့အတည်ပြုလူနာ
အမှတ် (၁၂၁) သည် Facilties Quarantine ရက်ပြည့်၍ ယနေ့ မေလ ၂၃ ရက်မှ စတင်ကာ Home
Quarantine ၇ ရက် ဆက်လက် ဝင်ရောက် ရမည်ဖြစ်ကြောင်း သိရသည်။
.
.
"၁၂၁ က Facilities Quaratine ဒီနေ့ မနက်ပြည့်သွားလို့ Home
Quaratine ဆက်ဝင်နေတယ်။ အိမ်ပြန်သွားပြီ။ နောက်ထပ် ဓါတ်ခွဲနမူနာတွေ မနက်ဖြန် ပြင်ဆင်ပြီး
ပို့ဖို့ရှိတယ်။ ပျမ်းမျှ ၁၃၀ ကျော် ပို့ဖို့ လုပ်ထားတယ်။ စောင့်ကြည့် မပါဘူး
Facilities Quaratine ဝင်နေတဲ့ သူတွေပဲ” ဟု ရှမ်းပြည်နယ် ပြည့်သူ့ကျန်းမာရေးဦးစီးဌာနမှ
ဒေါက်တာနှင်းအိဖြူက ကမ္ဘောဇတိုင်းသို့ ပြောသည်။
အဆိုပါ COVID-19 အတည်ပြုလူနာ အမှတ် (၁၂၁) သည် အင်္ဂလန်နိုင်ငံမှ
ရန်ကုန်မြို့သို့ မတ်လ ၂၂ ရက်တွင် လေကြောင်း ခရီးဖြင့် ရောက်ရှိလာသူဖြစ်ပြီး ရန်ကုန်မြို့၌
Hotel Quarantine ၁၄ ရက် ဝင်ရောက်ပြီးနောက် ဧပြီလ ၅ ရက်တွင် လေကြောင်းခရီးဖြင့် ရန်ကုန်မြို့မှ
တောင်ကြီးမြို့၊ မြို့မရပ်ကွက်ရှိ နေအိမ်သို့ ဟဲဟိုးလေဆိပ်မှတစ်ဆင့် ပြန်လည် ရောက်ရှိခဲ့ခြင်းဖြစ်ကာ
ဧပြီလ ၁၉ ရက်တွင် ၎င်း၏ ဓါတ်ခွဲနမူနာအား ပို့ဆောင်စစ်ဆေးရာ ဧပြီလ ၂၁ ရက်၊ ည ၈ နာရီ
ထုတ်ပြန်ချက်အရ COVID-19 ပိုးတွေ့လူနာအဖြစ် အတည်ပြုခဲ့ခြင်းဖြစ်ကြောင်း သိရသည်။
.
ရှမ်းပြည်နယ်တွင် ယနေ့ မေလ ၂၃ရက်အထိ COVID-19 ပိုးတွေ့ အတည်ပြုလူနာ
၇ ဦး ရှိပြီး ၎င်းတို့အနက် ၆ ဦးမှာ ရောဂါမှ ပြန်လည်သက်သာလာပြီဖြစ်ကာ ကျိုင်းတုံပြည်သူ့ဆေးရုံကြီးတွင်
တက်ရောက်ဆေးကုသမှု ခံယူနေသော မိုင်းဖြတ်မြို့မှ လူနာ အမှတ် (၆၄) တစ်ဦးသာ ကျန်ရှိတော့ကြောင်း
သိရသည်။
.
