အေးသာယာတွင် သင်္ကန်းဝတ်ဆင်ထားသူတစ်ဦးထံမှ စိတ်ကြွရူးသွပ်ဆေးပြားများ ဖမ်းမိ

နန်းဝင်းရီ

.

ရှမ်းပြည်နယ်တောင်ပိုင်း၊ တောင်ကြီးမြို့နယ်၊ အေးသာယာမြို့တွင် ယနေ့ မေလ ၈ ရက်၊ နံနက်အစောပိုင်းက သင်္ကန်းဝတ်ဆင်ထားသူတစ်ဦးထံမှ စိတ်ကြွရူးသွပ်ဆေးပြားများ ဖမ်းဆီးရမိခဲ့ကြောင်း သိရသည်။

.

 

.

အေးသာယာနယ်မြေရဲစခန်းမှ နယ်ထိန်းအရာရှိ ဦးစီးသော တပ်ဖွဲ့ဝင်များသည် မူးယစ်ဆေးဝါး သတင်းအရ မေလ ၈ ရက်၊ နံနက် ၂ နာရီခွဲ ခန့်တွင် သက်သေများနှင့်အတူ အေးသာယာမြို့၊ မုံတဝ-စက်မှုဇုန်လမ်းတွင် စောင့်ဆိုင်းနေစဉ် မုံတဝဘက်မှ စက်မှုဇုန်ဘက်သို့ မော်တော်ဆိုင်ကယ်ဖြင့် မောင်းနှင်လာသည့် မုံတဝဘုန်းကြီးကျောင်းနေ ရှင်စန္ဒာသီရိ၊ လူအမည် ဇော်သက် (၂၀ နှစ်) အား စစ်ဆေးရာ ၎င်းခါးပန်းကြိုးအတွင်း သိုဝှက်သယ်ဆောင်လာသည့် အဖြူရောင် ပလတ်စတစ်အိတ်အတွင်းမှ WY စာတန်းပါ ပန်းရောင် စိတ်ကြွရူးသွပ်ဆေးပြား ၄၉ ပြား၊ တန်ဖိုးငွေ ၄၉၀၀၀ ကျပ်အား ဖမ်းဆီးရမိခဲ့ခြင်း ဖြစ်ကြောင်း သိရသည်။

.

အဆိုပါ ဖမ်းဆီးရမိမှုနှင့် ပတ်သက်၍ ရှင်စန္ဒာသီရိ (ခ) ဇော်ထက်အား မုံတဝဘုန်းတော်ကြီးကျောင်းသို့ ခေါ်ဆောင် သွားပြီး ၎င်းကျောက်းတိုက်နေ ဆရာတော် ဦးထေရဝံသမှ သိက္ခာချ လူဝတ်လဲစေခဲ့ကြောင်း သိရသည်။

.

ဆက်လက်ပြီး ၎င်းအား စစ်ဆေးမေးမြန်းရာ အဆိုပါ မူးယစ်ဆေးဝါးများကို အသက် ၄၀ နှစ်ခန့်ရှိ အမျိုးသားတစ်ဦးထံမှ တစ်ပြားလျှင် ၅၀၀ ကျပ်နှုန်းဖြင့် ကိုယ်တိုင်သုံးစွဲရန် ဝယ်ယူခဲ့ခြင်းဖြစ်ကြောင်း သိရသည်။

.

သို့ဖြစ်ပါ၍ မူးယစ်ဆေးဝါးများနှင့်အတူ လက်ဝယ်တွေ့ရှိသည့် ရှင်စန္ဒာသီရိ(ခ) ဇော်ထက်အား အေးသာယာနယ်မြေ ရဲစခန်းမှ မူး/စိတ်ပုဒ်မ ၁၉(က)အရဖြင့် အမှုဖွင့်အရေးယူ ဆောင်ရွက်ထားပြီး ကွင်းဆက်များအား စုံစမ်းဖော်ထုတ် လျက်ရှိကြောင်း သိရသည်။

.