မင်းဇော်မင်း
.
ရှမ်းပြည်နယ်တောင်ပိုင်း၊ ကလောမြို့နယ်၊
အောင်ပန်းမြို့သို့ ဝင်ရောက်လာသည့် ကုန်တင်ယာဉ်များအားလုံး ရပ်ကွက်/ကျေးရွာများအတွင်း ဝင်ရောက်ခြင်းမပြုဘဲ COVID-19 ကာလအတွင်း ကုန်တင်ကုန်ချပြုလုပ်ရန် ယာယီ သတ်မှတ်ထားသည့် ညောင်ပင်ထောင်ရပ်ကွက်ရှိ
ဟိုက်ဒရိုကွင်း၌သာ ကုန်တင်ကုန်ချနှင့် ညအိပ်ရပ်နားခြင်း ပြုလုပ် ရမည်ဖြစ်ကြောင်း သိရသည်။
.
.
အောင်ပန်းမြို့၊ COVID-19 ရောဂါ ကာကွယ်ထိန်းချုပ်ရေး ကော်မတီ အနေဖြင့် ရောဂါဖြစ်ပွားကူးစက်မှု မရှိစေရေးနှင့်
ကုန်စည်များ ကူးသန့်ပို့ဆောင်မှု အဆင်ပြေစေရေးအတွက် လွှတ်တော်ကိုယ်စားလှယ်များ၊ ပွဲရုံ၊
ကုန်တင်ယာဉ်လုပ်ငန်း ရှင်များ၊ မြို့အထောက်အကူပြုကော်မတီဝင်များ စုပေါင်းဆွေးနွေးအား
အားလုံး၏ သဘောတူညီချက်ဖြင့် ယင်းကဲ့သို့ ပြုလုပ်ခြင်းဖြစ်ကြောင်း ရှမ်းပြည်နယ် မဲဆန္ဒနယ်
အမှတ် (၁) မှ အမျိုးသားလွှတ်တော်ကိုယ်စားလှယ် ဦးဇော်မင်းလတ် ထံက သိရသည်။
“အောင်ပန်းရဲ့အဓိကထွက်ကုန်က ရာသီကုန်စိမ်းတွေဖြစ်ပြီး
ဒီကပို့တဲ့ မီးဖိုချောင်သီးနှံတွေက အောက်ပြည်အောက်ရွာ အတွက် အထူးလိုအပ်ချက်ဖြစ်လို့
ကုန်စည်ပို့ဆောင်ရေးလည်း စဉ်ဆက်မပြတ် အဆင်ပြေချောမွေ့အောင်နဲ့ COVID-19 ရောဂါ ဖြစ်ပွားကူးစက်မှု မရှိအောင် တိုင်ပင်ပြီး လုပ်ဆောင်ကြရခြင်းဖြစ်ပါတယ်”
ဟု အမျိုးသားလွှတ်တော်ကိုယ်စား လှယ် ဦးဇော်မင်းလတ်က ပြောသည်။
.
အောင်ပန်းမြို့တွင် COVID-19 အတည်ပြုလူနာ မရှိသေးသော်လည်း အကယ်၍ ပေါ်ပေါက်ခဲ့ပါက လူထုအတွက် လိုအပ်သည့်
စားသောက်ကုန်လုပ်ငန်းများ ရပ်တန့်မသွားစေရေး၊ ညမထွက်ရအမိန့်များအရ အခြားဒေသများသို့
ကုန်စည်ပို့ဆောင်ရာတွင် ကုန်တင်ယာဉ်များ ဖြတ်သန်းသွားလာခွင့် ရရှိစေရေးတို့အတွက် သက်ဆိုင်ရာ
ဒေသ များရှိ အစိုးရ၊ လွှတ်တော်ကိုယ်စားလှယ်များနှင့် ချိတ်ဆက်ဆောင်ရွက်လျက်ရှိကြောင်း
၎င်းက ဆက်လက်ပြောဆို ခဲ့သည်။
.
ဟိုက်ဒရိုကွင်းတွင် ကွင်းဝင်ကြေး အနေဖြင့်
ပြင်ပယာဉ် တစ်စီးလျှင် ကျပ် ၂၀၀၀၊ မြို့တွင်ယာဉ် ကျပ် ၁၀၀၀ နှင့် ခေါက်တိုယာဉ်များအတွက်
အခမဲ့ သတ်မှတ်ထားပြီး ညအိပ်ရပ်နားပါက ယာဉ်မောင်းနှင့် ယာဉ်အကူသာ အိပ်ရန်၊ နေအိမ်များသို့
သွားရောက်ခြင်းမပြုရန်၊ နံနက် ၆ နာရီမှ ညနေ ၆ နာရီအထိသာ ကုန်တင်ကုန်ချ ပြုလုပ်ရန်၊
ကွင်းအတွင်း ချက်ပြုတ်စားသောက်ခြင်း မပြုဘဲ ပါဆယ်မှာယူစားသောက်ရန်၊ သန့်ရှင်းရေး၊ အိမ်သာရေချိုးခန်း
သုံးစွဲမှု အဆင်ပြေစေရန်နှင့် အခြား ပြဿနာများ မပေါ်ပေါက်စေရေးအတွက် သတ်မှတ်ထားသည့်
စည်းကမ်းများကို လိုက်နာ ကြရန် ဟိုက်ဒရိုကွင်း စီမံခန့်ခွဲရေးအဖွဲ့မှ မေတ္တာရပ်ခံ
ပန်ကြားထားသည်ဟု သိရသည်။
.
အဆိုပါ ဟိုက်ဒရို ယာယီယာဉ်ရပ်နားကွင်းမှာ
ကားစီးရေ ၁၀၀ ကျော် ရပ်နားနိုင်ပြီး လိုအပ်ပါက အခြားနေရာ များတွင်လည်း ယာယီရပ်နားနိုင်ရေး
စီစဉ်ဆောင်ရွက်ထားကြောင်း သိရသည်။
.
“တစ်ရက်ကို ကုန်ဆွဲရင် ဆွဲသလို အစီးရေ
၁၀၀ လောက်ထွက်တယ်။ အဓိက ရန်ကုန်ပို့တဲ့ ကုန်စိမ်းက လမ်းမှာ ည မအိပ်ရဖို့ လိုတယ်။ ကားသမားအတွက်လည်း
အဆင်ပြေအောင် လိုအပ်တဲ့ အထောက်အပံ့တွေ ဆောင်ရွက်ဖို့ စီစဉ် ထားပါတယ်” ဟု အောင်ပန်းမြို့ရှိ
ယာဉ်လိုင်းပိုင်ရှင်များက ပြောသည်။
.
ရှမ်းပြည်နယ်တောင်ပိုင်းဒေသနှင့် အောင်ပန်းမြို့မှ
ထွက်ရှိသည့် ရာသီသီးနှံ ကုန်စိမ်းများကို နေပြည်တော်၊ တောင်ငူ၊ ပဲခူး၊ ရန်ကုန်နှင့်
မန္တလေးမြို့များရှိ စားသုံးသူဈေးကွက်များသို့ ပို့ဆောင်ပေးလျက်ရှိကြောင်း သိရသည်။
.
