မင်းဇော်မင်း
.
ရှမ်းပြည်နယ်တောင်ပိုင်း၊ ကလောမြို့နယ်၊
အောင်ပန်းမြို့တွင် ယမန်နေ့ ဧပြီလ ၃၀ ရက်၊ ညပိုင်းက မိုးသည်းထန်စွာ ရွာသွန်းမှုကြောင့်
ဘုန်းတော်ကြီးကျောင်းနှင့် အထက်တန်းကျောင်းများ၏ ခြံစည်းရိုး အုတ်တံတိုင်းများ ပြိုကျပျက်စီး
ခဲ့ကြောင်း သိရသည်။
.
.
ပြိုကျပျက်စီးခဲ့သည့် အုတ်တံတိုင်းများမှာ
အောင်ပန်းမြို့၊ အမှတ် (၃) ရပ်ကွက်၊ နယ်မြေ (၁) ရှိ မြို့မပြင်သာ ဘုန်းတော်ကြီးကျောင်း
အုတ်တံတိုင်းနှင့် အမှတ် (၁) ရပ်ကွက်၊ မြင့်မိုရ်လမ်းရှိ အမှတ် (၅) အခြေခံပညာအထက်တန်း
ကျောင်း အုတ်တံတိုင်းများ ဖြစ်သည်ဟု အောင်ပန်းမြို့ စည်ပင်သာယာရေးဌာနခွဲမှ သိရသည်။
“ကျောင်းအုတ်တံတိုင်းက ပြန်လုပ်ရမယ်ဆိုရင်
၄၈ သိန်းလောက် ကုန်နိုင်မယ်။ အရင်ကုန်ကျခဲ့တဲ့ စာရင်းအရတော့ ပျက်စီးမှုတန်ဖိုး ၁၉ သိန်း
၂ သောင်းဖြစ်တယ်။ ကျောင်းဖွင့်အမီ လုံခြုံရေးအတွက် ပြန်ကာဖို့ကတော့ ကျောင်းအကျိုး တော်ဆောင်အဖွဲ့နဲ့
ပညာရေးဌာနတို့ ဘယ်လိုလုပ်မယ်ဆိုတာ ညှိနှိုင်းတိုင်ပင်ရမှာ ဖြစ်ပါတယ်” ဟု အောင်ပန်းမြို့၊
စည်ပင်သာယာရေးဌာနခွဲမှ ဦးစီးအရာရှိ ဦးနိုင်မျိုးဦး ကမ္ဘောဇတိုင်းသို့ ပြောသည်။
.
အဆိုပါ မိုးရွာသွန်းမှုကြောင့် အောက်ခြေမြေသားများ
ပြိုကျခဲ့သဖြင့် ည ၁၀ နာရီခန့်တွင် ပြင်သာကျောင်း ခြံစည်းရိုး အုတ်တံတိုင်း အမြင့်
၁၀ ပေ၊ အရှည် တစ်ခန်း ၈ ပေနှုန်းဖြင့် ၇ ခန်း၊ စုစုပေါင်း ၅၆ ပေ ပြိုကျပျက်စီးခဲ့ပြီး
ည ၁၂ နာရီကျော်ခန့်တွင် အထက (၅) ကျောင်း အုတ်တံတိုင်း အလျား ၈၆ ပေ၊ အမြင့် ၁၀ ပေ ပြိုကျပျက်စီးခဲ့ခြင်း
ဖြစ်ကြောင်း သိရသည်။
.
ထို့အပြင် ပြင်သာဘုန်းကြီးကျောင်း အနောက်တောင်ဘက်ရှိ
အုတ်တံတိုင်း ပြိုကျပျက်စီးမှုကြောင့် အနီးရှိ နေအိမ် ဝရန်တာတစ်ခု အနည်းငယ် ထိခိုက်ပျက်စီးခဲ့ပြီး
လူနှင့် တိရစ္ဆာန် ထိခိုက်ဒဏ်ရာရမှု မရှိခဲ့ကြောင်း သိရသည်။
.
ယင်းပြိုကျပျက်စီးခဲ့သည့် အုတ်တံတိုင်း
အပိုင်းအစများအား ယနေ့ မေလ ၁ ရက်တွင် အောင်ပန်းမီးသတ်ဦးစီးဌာနနှင့် အောင်ပန်းပညာရေးတပ်မှ
အရာရှိ၊ စစ်သည်များ၊ ဒေသခံပြည်သူများမှ ဖယ်ရှားရှင်းလင်း ဆောင်ရွက်လျက်ရှိကြောင်း သိရသည်။
.
တောင်ကြီးမြို့ရှိ မိုးလေဝသစခန်း၏ မေလ
၁ ရက် ထုတ်ပြန်ချက်အရ ဧပြီလ ၃၀ ရက်က ဟဲဟိုးမြို့တွင် မိုးရေချိန် ၀ ဒသမ ၉၈ လက်မ၊ ပင်လောင်းတွင်
၂ ဒသမ ၄၈ လက်မနှင့် တောင်ကြီးတွင် ၀ ဒသမ ၈၆ လက်မ ရွာသွန်းခဲ့ကြောင်း သိရသည်။
.
