ကျိုင်းတုံဒေသထွက် လိုင်ချီးသီးများ စျေးကွင်းအတွင်း ဝယ်လိုအား နည်းနေ

ထက်တိုင်းကျော်

.

ရှမ်းပြည်နယ်အရှေ့ပိုင်း၊ ကျိုင်းတုံမြို့နယ်တွင် ရာသီပေါ်သီးနှံဖြစ်သည့် လိုင်ချီးသီးများ စျေးကွက်အတွင်း၌ ရောင်းချနေပြီ ဖြစ်သော်လည်း ဝယ်လိုအား နည်းပါးသဖြင့် စျေးကောင်း မရဘဲ ဖြစ်နေကြောင်း သိရသည်။

.

 လိုင်ချီးသီးမှာ နွေဦးရာသီ‌ပေါ်သီးနှံ တစ်မျိုး ဖြစ်ပြီး ယင်းနှင့်အတူ သရက်သီး၊ နာနတ်သီး၊ မက်မန်းသီးများလည်း တပြိုင်တည်း ထွက်ပေါ်ကာ COVID-19 ကူးစက်ရောဂါ အခြေအနေများကြောင့် ယခင်နှစ်များထက် ဝယ်လိုအား နည်းနေခြင်း ဖြစ်ကြောင်း သိရသည်။

.

 “အထူးဒေသ(၂)နဲ့ အထူးဒေသ(၄) တွေလို နေရာတွေမှာ ခရီးသည် ဖြတ်သန်းသွားလာခွင့် ပိတ်ထားပြီး ကျိုင်းတုံမြို့နယ်မှာလည်း လူစုလူဝေးနဲ့ အလှူ၊ မင်္ဂလာဆောင်တွေ မလုပ်ရတာကြောင့်လည်း ဖြစ်မယ် ထင်ပါတယ်။ ဒီနှစ် စျေး သိပ်မရဘူး။” ဟု လိုင်ချီးသီးပင်စိုက် တောင်သူ တစ်ဦးက ကမ္ဘောဇတိုင်းသို့ ပြောသည်။

.

ကျိုင်းတုံမြို့နယ်တွင် လိုင်ချီးသီး တစ်ကီလိုလျှင် လက်လီစျေး ၂၀၀၀ ကျပ်ဖြင့် ရောင်းချလျက် ရှိပြီး အိမ်တိုင်ရာရောက် အဖြစ် ၅ ကီလို မှာယူပါက တစ်ကီလိုလျှင် ၁၅၀၀ ကျပ်နှုန်းဖြင့် ရောင်းချနေကြောင်း သိရသည်။

.