ထမံသီ
.
ရှမ်းပြည်နယ်တောင်ပိုင်း၊
ရပ်စောက်မြို့နယ်စိုက်ပျိုးရေးဦးစီးဌာနလက်အောက်ရှိ ညောင်သုံးပင်ကျေးရွာ ဥယျာဉ်ခြံ၊
ဟင်းသီးဟင်းရွက်နှင့် အပင်ဇီဝနည်းပညာဌာန ဝန်ထမ်းအိမ်ရာဝင်းအတွင်း ဧပြီလ ၁၂ ရက်က ဦးစီးအရာရှိမှ
ဒုတိယ ဦးစီးမှူးအား သံပေါက်ပြားရိုးဖြင့် ရိုက်နှက်သဖြင့် ဒုဦးစီးတွင် လက်ဖျံရိုး ကျိုးသွားခဲ့ကြောင်း
သိရသည်။
.
.
အဆိုပါ
ဥယျာဉ်ခြံ ဝန်ထမ်းအိမ်ရာဝင်းအတွင်း နေထိုင်သည့် ဦးစီးအရာရှိ ဦးဌေးမြင့်နှင့် ဒုတိယဦးစီးမှူး
ဦးကျော်မင်းထွန်းတို့သည် ပုဂ္ဂိုလ်ရေးကိစ္စဖြင့် အချင်းများရာမှ ဦးဌေးမြင့်က ဦးကျော်မင်းထွန်းအား
အချင်း ၁ လက်မခွဲ၊ အရှည် ၃ ပေခန့်ရှိ သံပေါက်ပြားရိုးဖြင့် ရိုက်နှက်ခဲ့ခြင်းဖြစ်ကြောင်း
သိရသည်။
“အခင်းဖြစ်ပြီးနောက်
ခရိုင်ဦးစီးမှူး ဦးဇော်ဝင်းထွန်းနဲ့ ပြည်နယ်ရုံးကို တင်ပြထားပြီးဖြစ်ပါတယ်။ ဧပြီလ
၁၃ ရက်မှာ လည်း ရပ်စောက်မြို့မရဲစခန်းမှာ ထပ်ပြီးအမှုဖွင့်ထားပါတယ်” ဟု ဒုတိယဦးစီးမှူး
ဦးကျော်မင်းထွန်းက ကမ္ဘောဇတိုင်း သို့ ပြောသည်။
.
အဆိုပါကိစ္စနှင့်
ပတ်သက်၍ ရပ်စောက်မြို့မရဲစခန်းမှ အမှုစစ်အရာရှိက “ကျွန်တော်တို့ သွားရောက်စစ်ဆေးပြီးပါပြီ။
သက်သေခံအဖြစ် ရိုက်ခဲ့တဲ့ သံပေါက်ပြားရိုးကိုလည်း သိမ်းဆည်းခဲ့ပါပြီ။ အရိုက်ခံရတဲ့
ဒုတိယဦးစီးမှူးက လက်ဖျံရိုး ကျိုးသွားတဲ့အတွက် စခန်းမှာ အမှုဖွင့်တာဖြစ်ပါတယ်” ဟု ပြောဆိုခဲ့သည်။
.
ထို့အတူ
ရပ်စောက်မြို့နယ်စိုက်ပျိုးရေးဦးစီးဌာနမှူး ဦးမောင်မောင်ဦးကလည်း “သူတို့အခင်းဖြစ်ပွားတာက
ဧပြီလ ၁၂ ရက်၊ တနင်္ဂနွေနေ့ပါ။ ဖြစ်တဲ့ပြဿနာကလည်း ပုဂ္ဂိုလ်ရေးကိစ္စပါ။ ဌာနလုပ်ငန်းနဲ့
ဘာပတ်သက်မှုမှ မရှိပါဘူး” ဟု ပြောသည်။
.
ယင်းကဲ့သို့
ရိုက်နှက်မှုနှင့် ဦးစီးအရာရှိ ဦးဌေးမြင့်အား ကမ္ဘောဇတိုင်း မှ ဆက်သွယ်မေးမြန်းရာ ပုဂ္ဂိုလ်ရေးကိစ္စသာ
ဖြစ်ကြောင်းနှင့် ဦးကျော်မင်းထွန်း၏ လုပ်ဆောင်မှုများသည် ၎င်း၏ ဂုဏ်သိက္ခာထိခိုက်စေမှုအတွက်
ရပ်စောက်မြို့မ ရဲစခန်းတွင် ပြန်လည်တရားစွဲဆိုသွားမည်ဖြစ်ကြောင်း ပြောဆိုခဲ့သည်။
.
အခင်းဖြစ်ပွားရာ
ညောင်သုံးပင်ကျေးရွာရှိ ဥယျာဉ်ခြံ ဟင်းသီးဟင်းရွက်နှင့် အပင်ဇီဝနည်းပညာဌာနသည်
ရပ်စောက်မြို့နယ် ယမ်းတွင်းငါးကြောင်ကျေးရွာအုပ်စုတွင်တည်ရှိပြီး၊ စုစုပေါင်း ၅၄ ဧကကျယ်ဝန်းကာ
ဝန်ထမ်းအိမ်ရာ ၃ ခန်း၊ ဦးစီးအရာရှိမိသားစု ၄ ဦး၊ ဒုတိယဦးစီးမှူး တစ်ဦး၊
လက်ထောက်ဦးစီးမှူး တစ်ဦး၊ ဒုတိယလက်ထောက်ဦးစီးမှူး တစ်ဦးနှင့် အခြားဝန်ထမ်းတစ်ဦး
စုစုပေါင်း ၈ ဦးနေထိုင်လျက်ရှိကြောင်း သိရသည်။
.
