စိုင်းသိင်္ခသူ
.
ရှမ်းပြည်နယ်မြောက်ပိုင်း၊
မူဆယ်နယ်စပ်မှတစ်ဆင့် တရုတ်နိုင်ငံသို့ တင်ပို့မည့် ဖရဲသီးတင်ကားများ လမ်းခရီး ကြန့်ကြာမှု
အခက်အခဲကြောင့် ဝါးနက်ချောင် ဆင်စခန်းနှင့် ဒီးဒုတ်ဆင်စခန်းများသို့ ဖရဲသီးများ သွာရောက်လှူဒါန်း
ခဲ့ကြောင်း သိရသည်။
.
.
“မူဆယ်မှာ
ဖရဲသီးတွေ ပျက်စီးလို့ လွှင့်ပစ်နေတဲ့ပုံတွေ Facebook မှာ တွေ့ရလို့ လွှင့်ပစ်မယ့်အစား
လာလှူပေးဖို့ အကူအညီတောင်းတာမှာ ကား ၂ စီးက လာလှူသွားတာပါ။ ဆင်တွေအတွက် အကောင်းဆုံးအစာဖြစ်လို့
ကျေးဇူး တင်ရပါတယ်။ နောက်လည်း လာလှူကြမယ်လို့ သိရပါတယ်” ဟု ဝါးနက်ချောင် ဆင်စခန်းတာဝန်ခံ
ဦးတင်ကျော်မိုး က ကမ္ဘောဇတိုင်းသို့ ပြောသည်။
ပြီးခဲ့သည့်
ဧပြီလ ၂၃ ရက်က ဖရဲသီးများကို လွှင့်ပစ်နေသည့် ဗီဒီယိုဖိုင်များကို လူမှုကွန်ရက်တွင်
တွေ့ရှိပြီးနောက် ဆင်စခန်းများသို့ ဆက်သွယ်လှူဒါန်းနိုင်ကြောင်း အကူအညီ တောင်းခံချက်အရ
ဧပြီလ ၂၄ ရက်တွင် ဖရဲသီးတင်ကား ၂ စီးမှ ဖရဲသီးအလုံး ၃၀၀၀ ခန့်ကို လာရောက်လှူဒါန်းခဲ့ခြင်းဖြစ်သည်ဟု
သိရသည်။
.
အဆိုပါ
ဆင်စခန်းများမှာ မန္တလေး-ပြင်ဦးလွင်အတက် ကျောက်ချောတိုးဂိတ်မှ တောင်ဘက် ၅ မိုင်၊ ၅
ဖာလုံအခန့်တွင် တည်ရှိသည့် ဝါးနက်ချောင် ဆင်စခန်းနှင့် ၉ မိုင်ကျော်အကွာရှိ ဒီးဒုတ်ဆင်စခန်းများဖြစ်ပြီး
မန္တလေးဖောင်ဖွဲ့ရေး ဒေသမှ သစ်ထုတ်လုပ်ရေးပိုင် ဆင်စခန်းများဖြစ်ကြောင်း သိရသည်။
.
ဝါးနက်ချောင်ဆင်စခန်းတွင်
ဆင်အထီး ၃ ကောင် နှင့် ဆင်အမ ၃ ကောင်ရှိပြီး ဒီးဒုတ်ဆင်စခန်းတွင် ဆင်အထီး ၂ ကောင်နှင့်
ဆင်အမ ၄ ကောင်၊ စုစုပေါင်း ဆင် ၁၂ ကောင်သည် အသက်၈ နှစ်မှ ၁၅ နှစ်အတွင်း ရှိ ဆင်များဖြစ်၍ ပြည်တွင်းပြည်ပခရီးသွားများ
လာရောက်ကြည့်ရှုအပန်းဖြေရာ ဆင်စခန်းများဖြစ်ကြပြီး ယခုအချိန်တွင် ဆင်များကို စခန်းတွင်
မထားဘဲ အစာအတွက် စားကျက်လွှတ်ကျောင်းထားကာ COVID-19 ရောဂါ ကာကွယ်ထိန်းချုပ်ရေးအတွက် ဆင်စခန်းများ ကို ယာယီပိတ်သိမ်း
ထားကြောင်း သိရှိရပါသည်။
.
“ဖရဲ
သခွားတွေ လွှင့်ပစ်မယ့်အစား ပြန်သယ်သွားတာထက် မတက်လာဘဲ သွားလှူနိုင်ရင် ပိုကောင်းမှာပါ။
အသီးကား တွေကို ပြောပေးပါမယ်” ဟု မူဆယ်အခြေစိုက် ခွာညိုသစ်သီးပွဲရုံမှ ဦးစိုင်းခင်မောင်က
ပြောသည်။
.
ဆင်တစ်ကောင်သည်
တစ်ရက်လျှင် အစာအလေးချိန် ပေါင် ၆၀၀ မှ ၇၀၀ အထိ စားသုံးပြီး ၀ါးနု၊ ကျူပင်၊
ထမဆိုင်း (တံမျက်စည်းအနု)၊ ရွက်နု စသည်တို့ကို စားသုံးကာ အစာရှာနယ်မြေ ကျဉ်းမြောင်းသည့်အတွက်
ဆင်အစာများ လိုအပ်လျက်ရှိကြောင်းသိရှိရပါသည်။
.
