TNLA က ဖမ်းဆီးထားသည့် နမ့်ခမ်းမှ ခိုလုံလီရှော ၁၂ ဦး ပြန်လွတ်လာ - Kanbawza Tai News

Breaking

ကမ္ဘောဇတိုင်းသတင်းဂျာနယ်သည် တောင်ကြီးမြို့တွင် အခြေစိုက်၍ ထုတ်ဝေခွင့်အမှတ် (မြဲ-၀၁၀၇၉)ဖြင့် ဆောင်ရွက်နေသည့် တရားဝင် သတင်းမီဒီယာ တစ်ခု ဖြစ်ပါသည်။

Friday, April 3, 2020

TNLA က ဖမ်းဆီးထားသည့် နမ့်ခမ်းမှ ခိုလုံလီရှော ၁၂ ဦး ပြန်လွတ်လာ


စိုင်းသိင်္ခသူ
.
TNLA အဖွဲ့က ဖမ်းဆီးထားသည့် ရှမ်းပြည်နယ်မြောက်ပိုင်း၊ နမ့်ခမ်းမြို့နယ်ရှိ ဒေသခံ ၂၃ ဦး အနက် အောက်ဆီးတန့်ကျေးရွာမှ ၁၂ ဦးကို ဧပြီလ ၂ ရက်တွင် ပြန်လည် လွတ်မြောက်လာကြောင်း ခိုလုံလီရှောလူငယ်ပြန်ကြားရေးအဖွဲ့ထံမှ သိရသည်။
.
ခိုလုံလီရှော လူငယ်အဖွဲ့မှ TNLA ဆက်ဆံရေး တာဝန်ခံထံသို့ ဆက်သွယ် အကူအညီတောင်းခံခဲ့သဖြင့် ဧပြီလ ၂ ရက်၊ နေ့လယ်ပိုင်းတွင် နမ့်ခမ်းမြို့နယ်၊ သာယာကုန်းရှိ စစ်ရှောင်စခန်းဘက်သို့ တရားဝင် ပြန်လည် လွတ်ပေးခဲ့ခြင်း ဖြစ်သည်ဟု သိရသည်။
.
ခုလို ပြန် လွှတ်ပေးတာ TNLA ကို ကျေးဇူး အများကြီး တင်ပါတယ်။ ဒါပေမဲ့ ထွက်ပြေးလာတဲ့ သူတွေ မပါ ဖမ်းထားတာ ၅ ယောက် ကျန်နေပါသေးတယ်၊ သူတို့ကိုလည်း အမြန်ဆုံး လွှတ်ပေးစေချင်ပါတယ်၊ အခုက အောက်ဆီးတန့်ရွာက ၁၂ ယောက်ပါ။ ကလေးအမေတွေ အပါအဝင် ကျား ၆ ဦး၊ မ ၆ ဦး အားလုံးကို မြန်မာငွေ ၁၀ သိန်း ပေးရပါတယ်၊ ဒါပေမဲ့ ဘိန်းခင်းနောက်ခံနဲ့ ဓာတ်ပုံ ရိုက်ထားတာတောင်းလို့ အရင် ရိုက်ထားတဲ့ ပုံ တစ်ပုံကို ပေးလိုက်ရတယ်။ဟု ခိုလုံလီရှောအဖွဲ့မှ မသိမ့်က ပြောသည်။
.
အောက်ဆီးတန့်ကျေးရွာမှ အဖမ်းခံရသူ  ကျား ၆ ဦး၊ မ ၇ ဦးအနက် ကလေးအမေဖြစ်သူ တစ်ဦးမှာ ထွက်ပြေး လွတ်မြောက် လာသည်ဟု သိရသော်လည်း ယခုထိ ၎င်း၏ ရွာသို့ ပြန်လည် ရောက်ရှိခြင်း မရှိသေးကြောင်း၊ မတ်လ ၃၁ ရက်က ထွက်ပြေးလာသူ ၂ ဦးကိုလည်း လက်ထိပ်များ ဖြုတ်ပေးနိုင်ခဲ့ပြီး ကျန်ကားရွာမှ ၃ ဦးကိုလည်း ကောင်းခေရွာတွင် ထားရှိကြောင်း လွတ်မြောက်လာသူများ၏ ပြောကြားချက်အရ သိရသည်ဟု ၎င်းက ဆိုသည်။
.

နမ့်ခမ်းမြို့၏ အရှေ့မြောက်ဘက်ရှိ အောက်ဆီးတန့်ရွာတွင် မတ်လ ၂၉ ရက်က ဒေသခံ ၁၃ ဦးနှင့် မတ်လ ၂၅ ရက်တွင် ကျန်းကားရွာမှ ရွာသား ၅ ဦး၊ ကဝါးချက်၊ လွယ်လန်ရွာမှ ၅ ဦး စုစုပေါင်း ၂၃ ဦးကို TNLA အဖွဲ့မှ ဖမ်းဆီး သွားခဲ့ခြင်း ဖြစ်ပြီး မတ်လ ၃၁ ရက်က ထွက်ပြေးလာသူ ၃ ဦးနှင့် လွယ်လန့်ရွာ မှ ငွေပေး ရွေး၍ လွတ်မြောက်လာသူ ၃ ဦးတို့ အပါအဝင် လွတ်မြောက်လာသူပေါင်း ၁၈ ဦး ရှိရာ ဖမ်းခံထားရသူ  ၅ ဦး ကျန်ရှိနေဆဲ ဖြစ်ပြီး ၎င်းတို့မှာ ကျန်ကားရွာသား ၃ ဦးနှင့် ကဝါးချက်ရွာသား ၂ ဦးတို့ ဖြစ်ကြောင်း မသိမ့်ထံမှ သိရသည်။
.
အဆိုပါ ကိစ္စများနှင့် ပတ်သက်၍ မေးမြန်း အတည်ပြုရန်အတွက် PSLF/TNLA အဖွဲ့ထံသို့ ဆက်သွယ်မှုများ ပြုလုပ်ရာတွင် ဆက်သွယ် မရရှိဘဲ ဖြစ်နေပြီး PSLF/TNLA Website စာမျက်နှာ ဖြစ်သည့် www.pslftnla.org မှာ ပို့ဆောင်ရေးနှင့် ဆက်သွယ်ရေးဝန်ကြီးဌာနမှ ပိတ်သိမ်းခဲ့ကြောင်း TNLA က ထုတ်ပြန်ထားကာ TNLA အဖွဲ့သည် KIA MNDAA တို့နှင့်အတူ ရှမ်းပြည်နယ်လွှတ်တော်တွင် အကြမ်းဖက် အဖွဲ့အစည်းများ အဖြစ် သတ်မှတ်ထားကြောင်း အတည်ပြုထားသည်။
.

No comments:

Post a Comment

Journal Download

Photo of three cats

About