ဗျတ္တ
.
ရှမ်းပြည်နယ်မြို့တော် တောင်ကြီးမြို့တွင် နွေရာသီကာလ သောက်သုံးရေ
ရှားပါးမှုအပြင် ကူးစက်မြန် COVID-19 ကပ်ရောဂါကြောင့် ရေကားအချို့ မထွက်သည့်အတွက် သောက်သုံးရေကား
မှာယူရာတွင် ခက်ခဲမှုများ ရှိလာနေသည် ဟု ဒေသခံများထံမှ သိရသည်။
.
.
ယခုအခါ တောင်ကြီးမြို့ပေါ်ရှိ အများပြည်သူ သောက်သုံးရေအတွက် ဖြန့်ဝေပေးနေသည့်
သောက်သုံးရေကန်များ ခန်းခြောက်လာမှုနှင့်အတူ ရပ်ကွက်များအတွင်းရှိ စက်ရေတွင်းများလည်း
ရေထွက်နှုန်း ကျဆင်းလာနေသည့်အတွက် ရေကားများကို အဓိက မှာယူအားထားနေရခြင်းဖြစ်ကြောင်း
သိရသည်။
“အခုက နွေရာသီ ရေရှားပါးတဲ့အချိန် ဖြစ်သလို COVID-19 ရောဂါဖြစ်တဲ့အချိန်နဲ့လည်း
တိုက်ဆိုင်နေတယ်။ ပုံမှန် ထွက်တဲ့ရေကားတချို့ မထွက်တာလည်း ရှိတယ်။ ဒီတော့ ရှိတဲ့ကားကိုပဲ
မှာနေရတော့ ရဖို့ မလွယ်တော့ဘူး။ အခုချိန်မှာ ရေကို ချွေတာသုံးပြီး မကုန်ခင် ကြိုမှာထားတာ
အကောင်းဆုံးဖြစ်မယ်” ဟု တောင်ကြီးမြို့၊ ချမ်းသာ ရပ်ကွက်နေ ဒေသခံတစ်ဦးက ပြောသည်။
.
တောင်ကြီးမြို့၊ ကျောင်းကြီးစုနှင့် ချမ်းသာရပ်ကွက်များအတွင်း ပုံမှန်
သောက်သုံးရေ ရောင်းချနေသည့် ရေကား အစီးရေ ၂၀ ခန့်ရှိပြီး အနီးအဝေးပေါ်မူတည်၍ ရေကား
တစ်စီးလျှင် ကျပ် ၅၀၀၀ မှ ၇၀၀၀ ကျပ်အကြား ရောင်းချ ပေးနေခြင်း ဖြစ်ကြောင်း သိရသည်။
.
အဆိုပါ ကိစ္စနှင့် ပတ်သက်၍ တောင်ကြီးမြို့၊ ဝါးပြားလမ်းဆုံးအနီးရှိ
ရေကားပိုင်ရှင်တစ်ဦးက “အရင်တုန်းက ရေကားတွေ တော်တော်များတယ်။ အခုက နည်းသွားပြီ။ နောက်စက်ရေတွင်းတွေက
ရေထွက်နှုန်း ကျသွားတယ်။ တချို့က ရေအနောက်ပဲထွက်တယ်။ ဒီတော့ မှာတဲ့လူများတဲ့အခါ လူတိုင်းကို
အချိန်မီပို့ပေးနိုင်ဖို့ ခက်သွားတာပေါ့။ ကျွန်တော်တို့လည်း တတ်နိုင်သလောက်တော့ မှာတဲ့အိမ်တိုင်းကို
ပို့ပေးနိုင်ဖို့ ကြိုးစားနေပါတယ်” ဟု ပြောသည်။
.
ရှမ်းပြည်နယ်မြို့တော် တောင်ကြီးမြို့သည် တောင်ပေါ်မြို့တစ်မြို့
ဖြစ်သည့်အတွက် မြေအောက်ရေကို အဓိကထား သုံးစွဲနေရခြင်းဖြစ်ပြီး မြို့အနီးတစ်ဝိုက်ရှိ
ရေဝေရေလဲ သစ်တောသစ်ပင်များ ထိန်းသိမ်းမှု အားနည်းပါက နောင်ကာလ များတွင် ယခုထက်ပို၍
ရေရှားပါးမှုပြဿနာကို ကြုံတွေ့လာရနိုင်ကြောင်း ဒေသခံများက ပြောဆိုလျက်ရှိသည်။
.
