ကိုစိုး (ကမ္ဘောဇတိုင်း)
.
နိုင်ငံတော်သမ္မတ ဦးဝင်းမြင့်မှ မြန်မာနှစ်သစ်ကူးအခါသမယ
အထိမ်းအမှတ်အဖြစ် နိုင်ငံတော်သမ္မတ၏ ပြစ်ဒဏ် လွတ်ငြိမ်းချမ်းသာခွင့်ဖြင့်
အကျဉ်းထောင်အသီးသီးမှ အကျဉ်းသား ၂၄၀၀၀ ကျော်ကို ယနေ့ ဧပြီလ ၁၇ ရက်၊ နံနက်ပိုင်းက ပြစ်ဒဏ်မှ လွတ်ငြိမ်းချမ်းသာခွင့်ပြုခဲ့ရာ
အဆိုပါ ကျဉ်းသားများအနက် တောင်ကြီးမြို့နယ်အတွင်းရှိ တောင်လေးလုံးအကျဉ်းထောင်နှင့်
စိုက်ပျိုးရေး၊ မွေးမြူရေးရဲဘက်စခန်းမှ အကျဉ်းကျ ၆၀၀ ကျော် လွတ်မြောက် ခဲ့သည်ဟု သိရသည်။
.
.
“တောင်လေးလုံးက
၃၆၄ ဦး ပါပါတယ်။ စိုက်ပျိုးရေး၊ မွေးမြူရေးမှာကတော့ ၂၅၃ ဦးပါ။ စာရင်းက အတိအကျတော့ မဟုတ်သေးပါဘူး။
အပြောင်းအလဲ ရှိနိုင်ပါသေးတယ်” ဟု တောင်ကြီးမြို့နယ်ရဲတပ်ဖွဲ့မှူး ရဲမှူးအေးနိုင်က
ကမ္ဘောဇတိုင်းသို့ ပြောသည်။
နိုင်ငံတော်သမ္မတရုံးမှ
အမိန့်အမှတ် (၁၂/၂၀၂၀) ဖြင့် နိုင်ငံသား အကျဉ်းသား/သူ ၂၄၈၆၉ ဦးကိုလည်းကောင်း၊ အမိန့်အမှတ်
(၁၃/၂၀၂၀) ဖြင့် နိုင်ငံခြားသား အကျဉ်းသား/သူ ၈၇ ဦးတို့ကိုလည်းကောင်း စည်းကမ်းသတ်မှတ်ချက်
မထားဘဲ ပြစ်ဒဏ်မှ လွတ်ငြိမ်းချမ်းသာခွင့် ပြုခဲ့ခြင်းဖြစ်ပြီး နိုင်ငံခြားသား အကျဉ်းသားများကို
ပြည်နှင်ဒဏ် ပေးခဲ့ကြောင်း သိရသည်။
.
