ဈေးပြန်လည်ရောင်းချခွင့် ရရှိရေးအတွက် တောင်ကြီးစည်ပင်ရုံးရှေ့တွင် ပျံကျဈေးသည်များ စုဝေးတောင်းဆို - Kanbawza Tai News

Breaking

ကမ္ဘောဇတိုင်းသတင်းဂျာနယ်သည် တောင်ကြီးမြို့တွင် အခြေစိုက်၍ ထုတ်ဝေခွင့်အမှတ် (မြဲ-၀၁၀၇၉)ဖြင့် ဆောင်ရွက်နေသည့် တရားဝင် သတင်းမီဒီယာ တစ်ခု ဖြစ်ပါသည်။

Friday, April 24, 2020

ဈေးပြန်လည်ရောင်းချခွင့် ရရှိရေးအတွက် တောင်ကြီးစည်ပင်ရုံးရှေ့တွင် ပျံကျဈေးသည်များ စုဝေးတောင်းဆို


ကိုစိုး (ကမ္ဘောဇတိုင်း)
.
ရှမ်းပြည်နယ်မြို့တော်၊ တောင်ကြီးမြို့၊ သစ်တောရပ်ကွက်ရှိ မြို့နယ်စည်ပင်သာယာရေးဌာနရုံးရှေ့တွင် ယနေ့ ဧပြီလ ၂၄ ရက် ညနေပိုင်းက ပျံကျဈေးသည် ၃၀ ဦးခန့်မှ ဈေးပြန်လည်ရောင်းချခွင့် ရရှိရေးအတွက် စုဝေးတောင်းဆို ခဲ့ကြသည်ဟု သိရသည်။
.
.
အဆိုပါ ဈေးသည်များမှာ City Square Shopping Center အရှေ့ လမ်းကြားတွင် ပျံကျ ရောင်းချသည့် ဈေးသည်များ ဖြစ်ပြီး ၎င်းတို့၏ မူလနေရာတွင် ဈေးပြန်လည်ရောင်းချခွင့် ရရှိရေးအတွက် တောင်းဆို ခဲ့ကြခြင်းဖြစ်ကြောင်း သိရသည်။
.
“ကျွန်မတို့က City Square ရှေ့မှာ ရောင်းကြတာပါ။ အရင်နေရာမှာ ပြန်ရောင်းခွင့်ရဖို့ သွားပြောကြတာပါ။ စည်ပင် ကတော့ ဈေးပြန်ဖွင့်တာနဲ့ ရောင်းခွင့်ပေးမယ်လို့ ပြောပါတယ်” ဟု ပျံကျဈေးသည်တစ်ဦးက ပြောသည်။
.
“လူစုလူဝေး မဖြစ်အောင်လို့ ရပ်ကွက်အလိုက် ယာယီဈေးရောင်းချဖို့ လုပ်ထားပေးတဲ့ နေရာတွေရှိပါတယ်။ သူတို့က အဲဒီမှာ မရောင်းချင်ဘူး။ မူလ ရောင်းတဲ့နေရာမှာပဲ ရောင်းချင်လို့ လာပြောကြတာပါ” ဟု တောင်ကြီးမြို့နယ်စည်ပင် သာယာရေးဌာနမှ တာဝန်ရှိသူတစ်ဦးက ပြောသည်။
.
ထို့အတူ တောင်ကြီးမြို့နယ်စည်ပင်သာယာရေးဌာနမှ အမှုဆောင်အရာရှိ ဦးအေးကိုကလည်း “ဈေးမရောင်းရ နေရာမှာ ရောင်းလို့ စည်ပင်က တားရတာပါ။ သူတို့က ရပ်ကွက်အလိုက် သတ်မှတ်ထားတဲ့ဈေးမှာ ရောင်းမကောင်းလို့ ကန့်သတ် ထားတဲ့ ဈေးနားမှာ ရောင်းချင်လို့ လာတောင်းဆိုတာပါ” ဟု ပြောဆိုခဲ့သည်။
.
ကမ္ဘာတစ်ဝှမ်း ဖြစ်ပွားနေသော ကိုရိုနာဗိုင်းရပ်စ် COVID-19 ကူးစက်မှုမှ ကာကွယ်နိုင်ရန်အတွက် လူစုလူဝေး မဖြစ်ပေါ် စေရေး တောင်ကြီးမြို့နယ်အတွင်းရှိ ဈေးများအားလုံးကို ရက်အကန့်အသတ်မရှိ ယာယီပိတ်ထားပြီး မြို့ပေါ် ရပ်ကွက်အလိုက် ယာယီဈေးရောင်းချရန်နေရာ ၉ ခု သတ်မှတ်ထားပေးပြီးဖြစ်ကြောင်း သိရသည်။
.

No comments:

Post a Comment

Journal Download

Photo of three cats

About