COVID-19 လူနာအမှတ် (၁၂၁) ၏ နေအိမ်ကို Lockdown ပြုလုပ်ထားပြီး လမ်းများကို ပိတ်ထားခြင်းမရှိ - Kanbawza Tai News

Breaking

ကမ္ဘောဇတိုင်းသတင်းဂျာနယ်သည် တောင်ကြီးမြို့တွင် အခြေစိုက်၍ ထုတ်ဝေခွင့်အမှတ် (မြဲ-၀၁၀၇၉)ဖြင့် ဆောင်ရွက်နေသည့် တရားဝင် သတင်းမီဒီယာ တစ်ခု ဖြစ်ပါသည်။

Wednesday, April 22, 2020

COVID-19 လူနာအမှတ် (၁၂၁) ၏ နေအိမ်ကို Lockdown ပြုလုပ်ထားပြီး လမ်းများကို ပိတ်ထားခြင်းမရှိ


ကိုစိုး (ကမ္ဘောဇတိုင်း)
.
COVID-19 အတည်ပြုလူနာအမှတ် (၁၂၁) နေထိုင်ရာ တောင်ကြီးမြို့၊ မြို့မရပ်ကွက်ရှိ နေအိမ်အား ကျန်းမာရေးဌာန၏ ညွှန်ကြားချက် အရ နေအိမ် Lockdown ပြုလုပ်ထားပြီး လမ်းများကိုမူ အသွားအလာ ကန့်သတ်ထားခြင်း မရှိကြောင်း တောင်ကြီးမြို့နယ် အုပ်ချုပ်ရေးမှူး ဦးဖြိုးမင်းထိုက်ထံက သိရသည်။
.
.
“ကျန်းမာရေးဝန်ကြီးဌာနက နေအိမ် Lockdown ပဲ ချပါလို့ ညွှန်ကြားထားတဲ့အတွက် အဲဒီအတိုင်းပဲ ဆောင်ရွက်ရ ပါတယ်။ လမ်းတော့ မပိတ်ပါဘူး။ လူနာနဲ့ ထိတွေ့ခဲ့တဲ့ သူတွေကတော့ လောလောဆယ် စာရင်းပြုစုနေဆဲပါပဲ” ဟု တောင်ကြီးမြို့နယ် အုပ်ချုပ်ရေးမှူး ဦးဖြိုးမင်းထိုက်က ကမ္ဘောဇတိုင်းသို့ ပြောသည်။
.
အဆိုပါ COVID-19 အတည်ပြုလူနာ အမှတ် (၁၂၁) သည် အင်္ဂလန်နိုင်ငံမှ ရန်ကုန်မြို့သို့ မတ်လ ၂၂ ရက်တွင် လေကြောင်း ခရီးဖြင့် ရောက်ရှိလာပြီးနောက် ရန်ကုန်မြို့၌ Hotel Quarantine ၁၄ ရက် ဝင်ရောက်ခဲ့ကာ ဧပြီလ ၅ ရက်တွင် လေကြောင်းခရီးဖြင့် ရန်ကုန်မြို့မှ တောင်ကြီးမြို့၊ မြို့မရပ်ကွက်ရှိ နေအိမ်သို့ ပြန်လည်ရောက်ရှိလာခဲ့ခြင်း ဖြစ်ကြောင်း သိရသည်။
.
ထို့အပြင် အတည်ပြုလူနာ သွားရောက်လည်ပတ်ခဲ့သည့် HotelBar များနှင့် ပတ်သက်၍ ရှမ်းပြည်နယ်အစိုးရ၏ ညွှန်ကြားချက် များအား လိုက်နာမှုရှိမရှိ စိစစ်လျက်ရှိပြီး လိုက်နာမှုမရှိကြောင်း စိစစ်တွေ့ရှိရပါက သက်ဆိုင်ရာ လုပ်ထုံးလုပ်နည်း များနှင့် အညီ အရေးယူဆောင်ရွက်သွားမည်ဖြစ်ကြောင်း တောင်ကြီးမြို့နယ်အုပ်ချုပ်ရေးမှူး ဦးဖြိုးမင်းထိုက်က ကမ္ဘောဇတိုင်းသို့ ပြောဆိုထားသည်။
.
တောင်ကြီးမြို့၊ စဝ်စံထွန်းဆေးရုံတွင် ယနေ့ ဧပြီလ ၂၂ ရက်အထိ COVID-19 ပိုးတွေ့လူနာ ၂ ဦးအား ဆေးကုသမှုများ ပြုလုပ်ပေးလျက်ရှိပြီး ၎င်းတို့မှာ တောင်ကြီးမြို့၊ ညောင်ရွှေဟော်ကုန်းရပ်ကွက်မှ အသက် ၂၆ နှစ်အရွယ် လူနာအမှတ် (၂၉) အမျိုးသားနှင့် ယခု မြို့မရပ်ကွက်မှ အသက် ၂၁ နှစ်အရွယ် လူနာအမှတ် (၁၂၁) အမျိုးသမီးတို့ဖြစ်ကြောင်း သိရသည်။
.

No comments:

Post a Comment

Journal Download

Photo of three cats

About