ထက်တိုင်းကျော်
.
ရှမ်းပြည်နယ်အရှေ့ပိုင်း၊ ကျိုင်းတုံမြို့တွင်
လက်ရှိ COVID-19 ကူးစက်ရောဂါ ကြိုတင်ကာကွယ်ရေး ဆောင်ရွက်နေသည့် ကာလအတွင်း
နေ့စားလုပ်ငန်း ဝင်ငွေရှာဖွေ လုပ်ကိုင်နေသူများ အနေဖြင့် အလုပ် မရှိ၍ ဝင်ငွေ
မရှိခြင်းကြောင့် အခက်အခဲများ ဖြစ်ပေါ်နေရကြောင်း သိရသည်။
.
“ အလုပ်က အဆင်မပြေပါဘူး။ လူတွေကလည်း
အပြင် မထွက်ကြတာများတော့ အလုပ် မဖြစ်ဘူး။” ဟု ကျိုင်းတုံမြို့မစျေး အနီး၌ အငှားဆိုင်ကယ်
မောင်းနှင်သူ တစ်ဦးက ကမ္ဘောဇတိုင်းသို့ ပြောသည်။
.
အဆိုပါ အလုပ်မရှိ၍ ဝင်ငွေ မရှိသဖြင့်
အခက်အခဲ ဖြစ်ပေါ်နေကြသူ နေ့စား အလုပ်သမား အများစုတွင် ပန်းရံ၊ လက်သမား ၊
ကုန်တင်ကုန်ချ၊ အငှားယာဉ်မောင်း လုပ်ကိုင်သူများနှင့် ပစ္စည်းဟောင်း ရှာဖွေ ရောင်းချရေးလုပ်ငန်းများ၊
ပျံကျဈေးသည်များ ပါဝင်ကြောင်း သိရသည်။
.
“ သမီးဆိုရင် အလုပ် နားနေရတာ ကြာပါပြီ။
အပြင် ထွက်ခွင့်လည်း မပေးဘူး။ တစ်ရက် တစ်ရက်အတွက် ဝင်ငွေ မရှိတော့ ရှိတာလေးကိုပဲ
ချွေတာ စားနေရပါတယ်။” ဟု ကျိုင်းတုံမြို့နယ်ရှိ လမ်းလုပ်ငန်းတွင် နေ့စားဝန်ထမ်း လုပ်ကိုင်နေသူ
တစ်ဦးက ပြောဆိုခဲ့သည်။
.
ရှမ်းပြည်နယ်၌ ရှိသည့် COVID-19 အတည်ပြုလူနာ ၆
ဦးအနက် ရှမ်းပြည်နယ် အရှေ့ပိုင်းတွင် လူနာ ၃ ဦး ပါဝင်ပြီး ယင်း လူနာ ၃ ဦးကို
ကျိုင်းတုံ ပြည်သူ့ဆေးရုံတွင် ဆေးကုသမှု ပေးနေလျက်ရှိကြောင်း သိရသည်။
.
