ရှမ်းပြည်နယ်အတွင်းရှိ မြို့နယ်များအားလုံးတွင် ညမထွက်ရအမိန့် ထုတ်ပြန်ရန် ညွှန်ကြားထား - Kanbawza Tai News

Breaking

ကမ္ဘောဇတိုင်းသတင်းဂျာနယ်သည် တောင်ကြီးမြို့တွင် အခြေစိုက်၍ ထုတ်ဝေခွင့်အမှတ် (မြဲ-၀၁၀၇၉)ဖြင့် ဆောင်ရွက်နေသည့် တရားဝင် သတင်းမီဒီယာ တစ်ခု ဖြစ်ပါသည်။

Monday, April 20, 2020

ရှမ်းပြည်နယ်အတွင်းရှိ မြို့နယ်များအားလုံးတွင် ညမထွက်ရအမိန့် ထုတ်ပြန်ရန် ညွှန်ကြားထား


ကိုစိုး (ကမ္ဘောဇတိုင်း)
.
ရှမ်းပြည်နယ်အတွင်းရှိ မြို့နယ်များ အားလုံးတွင် ညမထွက်ရအမိန့် ထုတ်ပြန်ရန် ရှမ်းပြည်နယ် COVID-19 ထိန်းချုပ် ရေးနှင့် အရေးပေါ်တုံ့ပြန်ရေးကော်မတီမှ ကိုယ်ပိုင် အုပ်ချုပ်ခွင့်ရတိုင်း/ဒေသနှင့် ခရိုင်အထွေထွေအုပ်ချုပ်ရေးဦးစီးဌာန များသို့ ယနေ့ ဧပြီလ ၂၀ ရက်က ညွှန်ကြားစာ ထုတ်ပြန်ထားသည်ဟု သိရသည်။
.
.
“ညမထွက်ရအမိန့်ထုတ်ဖို့ အကြောင်းကြားထားပါတယ်။ သက်တမ်းကတော့ ဧပြီလ ၂၀ ရက်ကနေ မေလ ၁၉ ရက်အထိ တစ်လဖြစ်ပါတယ်” ဟု ရှမ်းပြည်နယ်အစိုးရအဖွဲ့ ပြောရေးဆိုခွင့်ရှိသူ ပြည်နယ်စီမံကိန်းနှင့် ဘဏ္ဍာရေးဝန်ကြီး ဦးစိုးညွန့်လွင်က ကမ္ဘောဇတိုင်းသို့ ပြောသည်။
.
ရှမ်းပြည်နယ်အတွင်း COVID-19 ပိုးတွေ့လူနာ ၄ ဦး အထိ ရှိလာနေပြီး Community Based Facilities Quarantine Center များတွင် ထားရှိသူ ၄၀၀၈ ဦး၊ Home Quarantine ထားရှိသူ ၅၁၃၈ ဦး ရှိလာနေခြင်းကြောင့် ရောဂါထပ်မံ မဖြစ်ပွားစေရန်နှင့် ကာကွယ်ထိန်းချုပ် တုံ့ပြန်ကုသနိုင်ရေးအတွက် ရှမ်းပြည်နယ်အတွင်း ညမထွက်ရအမိန့် ထုတ်ပြန် ထားသည့် ကိုးကန့်ကိုယ်ပိုင်အုပ်ချုပ်ခွင့်ရဒေသရှိ မြို့နယ် ၂ မြို့နယ်နှင့် ဝင်မရမြို့နယ် ၅ မြို့နယ်မှ လွဲ၍ ကျန် ၄၈ မြို့နယ် တို့တွင် နေ့စဉ် ည ၁၀ နာရီမှ နံနက် ၄ နာရီအထိ ညမထွက်ရအမိန့် ထုတ်ပြန်ရန် ညွှန်ကြားထားခြင်းဖြစ်ပြီး ယင်းအမိန့်သည် တာဝန်ရှိသူများ၊ လူနာများနှင့် ကုန်စည်စီးဆင်းမှု မပြတ်လပ်စေရေးအတွက် ကုန်တင်ယာဉ်များ အပေါ် သက်ရောက်မှုရှိမည်မဟုတ်ကြောင်း သိရသည်။
.
“ညမထွက်ရအမိန့်ထုတ်ဖို့ အခုပဲ စာစီနေပါပြီ။ ထုတ်ပါတော့မယ်။ ပြည်သူလူထု သိအောင်ဆိုရင်တော့ ရပ်ကွက်/ ကျေးရွာတွေထဲ လိုက်ပြီး ကြေညာပေးမှာပါ။ မလိုက်နာခဲ့ရင်တော့ ဥပဒေအရ အရေးယူဆောင်ရက်သွားရမှာပေါ့” ဟု တောင်ကြီးမြို့နယ် စီမံခန့်ခွဲမှုကော်မတီ ဥက္ကဋ္ဌ၊ မြို့နယ်အုပ်ချုပ်ရေးမှူး ဦးဖြိုးမင်းထိုက်က ကမ္ဘောဇတိုင်းသို့ ပြောသည်။
.
မြန်မာနိုင်ငံတွင် ဧပြီလ ၂၀ ရက်၊ နံနက်ပိုင်းအထိ COVID-19 အတည်ပြုလူနာ ၁၁၁ ဦး ရှိပြီ ဖြစ်ပြီး ရှမ်းပြည်နယ်တွင် အတည်ပြုလူနာ ၄ ဦး ရှိကာ ၎င်းတို့မှာ တောင်ကြီးမြို့၊ စဝ်စံထွန်းဆေးရုံမှ ၁ ဦး၊ လားရှိုးပြည်သူ့ဆေးရုံမှ ၁ ဦးနှင့် ကျိုင်းတုံပြည်သူဆေးရုံမှ ၂ ဦးတို့ဖြစ်ကြောင်း သိရသည်။
.

No comments:

Post a Comment

Journal Download

Photo of three cats

About