စဝ်စံထွန်းဆေးရုံ၌ ဆေးကုသမှု ခံယူနေစဉ် သေဆုံးခဲ့သော သံသယလူနာ အမျိုးသမီးအပါအဝင် ရှမ်းတောင်မှ ဓါတ်ခွဲနမူနာ ၁၀ ခုတွင် COVID-19 ပိုးမတွေ့

ကိုစိုး (ကမ္ဘောဇတိုင်း)

.

ရှမ်းပြည်နယ်မြို့တော် တောင်ကြီးမြို့ရှိ စဝ်စံထွန်းဆေးရုံတွင် တက်ရောက်ဆေးကုသမှုခံယူနေစဉ် သေဆုံးခဲ့သော COVID-19 သံသယလူနာ အမျိုးသမီး အပါအဝင် ရှမ်းတောင်မှ ပေးပို့ထားသည့် ဓါတ်ခွဲနမူနာ ၁၁ ခုအနက် ၁၀ ခု၏ ဓါတ်ခွဲအဖြေများတွင် COVID-19 ရောဂါပိုး မတွေ့ရှိရဘဲ ကျန်တစ်ဦး၏ ဓါတ်ခွဲအဖြေကို စောင့်ဆိုင်းနေဆဲဖြစ်ကြောင်း ရှမ်းပြည်နယ်ပြည်သူ့ကျန်းမာရေးနှင့် ကုသရေးဦးစီးဌာနမှ သိရသည်။

.

.

တောင်ကြီးမြို့၊ စဝ်စံထွန်းဆေးရုံတွင် COVID-19 စောင့်ကြည့်လူနာအဖြစ် ဆေးဝါးကုသမှု ခံယူနေသော ရပ်စောက် မြို့နယ်မှ အသက် ၅၀ နှစ်အရွယ် အမျိုးသမီးတစ်ဦးသည် ဧပြီလ ၂၈ ရက် နံနက်ပိုင်းက သေဆုံးခဲ့ခြင်းဖြစ်ပြီး ၎င်း အပါအဝင် စုစုပေါင်း သံသယလူနာ ၁၁ ဦး၏ ဓါတ်ခွဲနမူနာများကို ဧပြီလ ၂၇ ရက်က ရန်ကုန်မြို့ရှိ အမျိုးသားဓါတ်ခွဲမှု ဆိုင်ရာဌာနသို့ ပေးပို့ထားခြင်းဖြစ်သည်။

.

“ဆုံးသွားတဲ့ အမျိုးသမီး အပါအဝင် အားလုံး ၁၀ ယောက်ရဲ့ ဓါတ်ခွဲအဖြေက Negative ထွက်ပါတယ်။ လွိုင်လင်က တစ်ယောက်ရဲ့ အဖြေ ထွက်ဖို့ ကျန်ပါသေးတယ်။ လက်ရှိမှာတော့ ဓါတ်ခွဲနမူနာ ထပ်ပို့ထားတာ မရှိသေးပါဘူး” ဟု ရှမ်းပြည်နယ် ပြည်သူ့ကျန်းမာရေးနှင့် ကုသရေးဦးစီးဌာနမှ လက်ထောက်ညွှန်ကြားရေးမှူး ဒေါက်တာနှင်းအိဖြူက ကမ္ဘောဇတိုင်းသို့ ပြောသည်။

.

အဆိုပါ ဓါတ်ခွဲနမူနာ ပေးပို့ထားသည့် ၁၁ ဦးတွင် လူနာအမှတ် (၁၂၁) နှင့် ထိတွေ့ခဲ့သူ တစ်ဦးနှင့် လူနာအမှတ် (၉၆) နှင့် ဆက်စပ်သူတစ်ဦးပါဝင်ပြီး ကျန်၉ ဦးမှာ သံသယလူနာများဖြစ်ကာ လက်ရှိတွင် လွိုင်လင်မှ သံသယလူနာတစ်ဦး၏ ဓါတ်ခွဲအဖြေမှ အပ ကျန်သူများတွင် COVID-19 ရောဂါပိုး မတွေ့ရှိခြင်းဖြစ်ကြောင်း သိရသည်။

.

ယနေ့ ဧပြီလ ၃၀ ရက် နံနက်ပိုင်းအထိ မြန်မာနိုင်ငံတစ်ဝှမ်းတွင် COVID-19 ပိုးတွေ့လူနာ ၁၅၀ ဦးအထိရှိလာနေပြီး ယင်းအနက် ၆ ဦး သေဆုံး၍ ၂၇ ဦးမှာ ပြန်လည် သက်သာလာပြီ ဖြစ်ကြောင်းနှင့် ရှမ်းပြည်နယ်တွင်မူ COVID-19 အတည်ပြုလူနာ ၇ ဦး ရှိကာ ၁ ဦးမှာ ပြန်လည် သက်သာလာပြီ ဖြစ်ကြောင်း သိရသည်။

.