ရှမ်းပြည်နယ်လွှတ်တော်ဥက္ကဌ၏ ယာဉ်မောင်းနှင့် ပြည်နယ်ရဲတပ်ဖွဲ့မှူး၏ ကိုယ်ရေးအရာရှိတို့ကို ကျိုင်းတုံတွင် Quarantine လုပ်ထား - Kanbawza Tai News

Breaking

ကမ္ဘောဇတိုင်းသတင်းဂျာနယ်သည် တောင်ကြီးမြို့တွင် အခြေစိုက်၍ ထုတ်ဝေခွင့်အမှတ် (မြဲ-၀၁၀၇၉)ဖြင့် ဆောင်ရွက်နေသည့် တရားဝင် သတင်းမီဒီယာ တစ်ခု ဖြစ်ပါသည်။

Tuesday, April 21, 2020

ရှမ်းပြည်နယ်လွှတ်တော်ဥက္ကဌ၏ ယာဉ်မောင်းနှင့် ပြည်နယ်ရဲတပ်ဖွဲ့မှူး၏ ကိုယ်ရေးအရာရှိတို့ကို ကျိုင်းတုံတွင် Quarantine လုပ်ထား


ထက်တိုင်းကျော်
.
ရှမ်းပြည်နယ် ဝန်ကြီးချုပ်၏ ရှမ်းပြည်နယ်အရှေ့ပိုင်း ခရီးစဉ်တွင် အတူ လိုက်ပါ တာဝန် ထမ်းဆောင်ခဲ့သူများကို ဧပြီလ ၂၀ ရက်၊ နံနက်ပိုင်းတွင် Test Kits ဖြင့် စစ်ဆေးစဉ် ရှမ်းပြည်နယ်လွှတ်တော်ဥက္ကဌ၏ ယာဉ်မောင်းနှင့် ရှမ်းပြည်နယ်ရဲတပ်ဖွဲ့မှူး၏ ကိုယ်ရေးအရာရှိတို့မှာ COVID-19 နှင့် ပတ်သက်၍ သံသယ ဖြစ်ဖွယ် တွေ့ရသဖြင့် ကျိုင်းတုံမြို့တွင် Quarantine ပြုလုပ်ထားကြောင်း သိရသည်။
.
.
Test Kite နဲ့ စစ်ဆေးကြည့်လို့၊ COVID-19 သံသယ ဖြစ်ဖွယ်ရယ်လို့တောင် အတိအကျ အတည်ပြု ပြောလို့ရတဲ့ အနေအထား မဟုတ်ပါဘူး။ သူတို့  ၂ ယောက်ရဲ့ လက်ရှိ ကျန်းမာရေးကတော့ ကောင်းနေပါတယ်။"ဟု ရှမ်းပြည်နယ် အရှေ့ပိုင်း ပြည်သူ့ကျန်းမာရေးနှင့် ကုသရေးဦးစီးဌာနမှူး ဒေါက်တာ မြင့်ကျော်က ကမ္ဘောဇတိုင်းသို့ ပြောသည်။
.
ထို့အပြင် ရှမ်းပြည်နယ်အစိုးရအဖွဲ့ လူမှုရေးဝန်ကြီး ဒေါက်တာ မျိုးထွန်းထံသို့ ဆက်သွယ်မေးမြန်းရာတွင် ဝန်ကြီးချုပ် အပါအဝင် ၃၀ ဦးခန့်အား Test Kits ဖြင့် စစ်ဆေးစဉ် ယင်းဝန်ထမ်း ၂ ဦးအား ကိုယ်အပူချိန် မြင့်တက်နေခြင်းကြောင့် ခရီးစဉ်တွင် လိုက်ပါ တာဝန် ထမ်းဆောင်စေခြင်း မပြုဘဲ Quarantine ပြုလုပ်ရန် စီစဉ်ခြင်း ဖြစ်သည့် အပြင် ယင်း Test Kits မှာ ကမ္ဘာ့ကျန်းမာရေးအဖွဲ့မှ အသိအမှတ် ပြုထားခြင်း မရှိသဖြင့် စစ်ဆေးမှုသည် တရားဝင်သည်ဟု ပြောဆို၍ မရကြောင်း ရှင်းပြသည်။
.
ရှမ်းပြည်ဝန်ကြီးချုပ်၏ ရှမ်းပြည်နယ် အရှေ့ပိုင်း ခရီးစဉ်တွင် ဝန်ကြီးချုပ်နှင့်အတူ လူမှုရေးဝန်ကြီး ဒေါက်တာ မျိုးထွန်း၊ လမ်းပန်း ဆက်သွယ်ရေး ဝန်ကြီး ဦးခွန်ရဲထွေး၊ စည်ပင်သာယာရေး ဝန်ကြီး ဦးစိုင်းစွံဆိုင်း၊ ဗမာတိုင်းရင်းသား လူမျိုးရေးရာ ဝန်ကြီး ဒေါက်တာ အောင်သန်းမောင်၊ ရှမ်းပြည်နယ် ရဲတပ်ဖွဲ့မှူး ရဲမှူးချုပ် တင်ကိုကိုနှင့် တာဝန်ရှိသူများ ပါဝင်ကြောင်း သိရသည်။
.
အဆိုပါ ဝန်ထမ်းများကို ကျိုင်းတုံပညာရေးတက္ကသိုလ်၊ ရတနာဆောင်တွင် Facility Quarantine ပြုလုပ်ထားပြီး ၎င်းတို့အား ကျန်းမာရေးဝန်ထမ်းများ ပါဝင်သည့် တာဝန် ရှိသူများက စောင့်ကြပ်ပေးလျက် ရှိကြောင်း သိရသည်။
.

No comments:

Post a Comment

Journal Download

Photo of three cats

About