ရှမ်းပြည်နယ်ဝန်ကြီးချုပ်နှင့် ဝန်ကြီးများ နမ့်စန်ဆေးရုံသို့ ဆေးဝါးပစ္စည်းများ သွားရောက်ထောက်ပံ့

ကမ္ဘောဇတိုင်း

.

ရှမ်းပြည်နယ်အစိုးရအဖွဲ့ ပြည်နယ်ဝန်ကြီးချုပ်နှင့် ပြည်နယ်အစိုးရအဖွဲ့ဝင် ဝန်ကြီးများ၊ တာဝန်ရှိသူများသည် ယနေ့ ဧပြီလ ၁ ရက်က ရှမ်းပြည်နယ်တောင်ပိုင်း၊ လွိုင်လင်ခရိုင်၊ နမ့်စန်မြို့နယ် ပြည်သူ့ဆေးရုံတွင် COVID-19 ကာကွယ်ရေး အထောက်အကူပြု ဆေးဝါးပစ္စည်းများ သွားရောက်ထောက်ပံ့ခဲ့ကြောင်း သိရသည်။

.

.

ထောက်ပံ့ပွဲတွင် ဦးစွာ နမ့်စန်မြို့နယ်ပြည်သူ့ကျန်းမာရေးနှင့် ကုသရေးဦးစီးဌာနမှူးက နမ့်စန်မြို့နယ်အတွင်း COVID-19 ကိုရိုနာဗိုင်းရပ်စ် ကာကွယ်ထိန်းချုပ်ရေး ဆောင်ရွက်နေမှုအခြေအနေများကို ရှင်းလင်းတင်ပြခဲ့ပြီး ပြည်နယ်ဝန်ကြီးချုပ်နှင့် ပြည်နယ်အစိုးရအဖွဲ့ဝင် ဝန်ကြီးများက လိုအပ်သည်များကို ဖြည့်စွက်မှာကြားခဲ့ကြောင်း သိရသည်။

.

ထို့နောက် နမ့်စန်မြို့နယ်အတွက် ထောက်ပံ့ပစ္စည်းများကို ပြည်နယ်ဝန်ကြီးချုပ် ဒေါက်တာလင်းထွဋ်က ပေးအပ်ရာ မြို့နယ် ပြည်သူ့ကျန်းမာရေးနှင့် ကုသရေးဦးစီးဌာနမှူးက လက်ခံရယူကာ ဆေးရုံဝင်းအတွင်း COVID-19 စောင့်ကြည့်လူနာများအား သီးခြားထားရှိထားမှုနှင့် ဆေးရုံအဆောင်သစ် ပြင်ဆင်ထားမှုများ၊ လူနာတင်ယာဉ်များ ကြိုတင်ပြင်ဆင်ထားမှုများကို ပြည်နယ်ဝန်ကြီးချုပ်နှင့် တာဝန်ရှိသူများက လှည့်လည် ကြည့်ရှုစစ်ဆေးခဲ့ကြောင်း သိရသည်။

.

အဆိုပါ ထောက်ပံ့ပေးအပ်ပွဲတွင် နမ့်စန်မြို့နယ်အတွက် PPE ကာကွယ်ရေးဝတ်စုံ ၅၀၊ နှာခေါင်းစည်း Mask ၅၀၀ ခု၊ လက်အိတ် အစုံ ၂၅၀၊ ဖိနပ် အရံ ၂၀ ကိုလည်းကောင်း ခိုလန်မြို့အတွက် နှာခေါင်းစည်း Mask ၁၈၀၀ ခု၊ ဖိနပ် အရံ ၂၀ တို့ကိုလည်းေကောာင်း ထောက်ပံ့ပေးအပ်ခဲ့ခြင်းဖြစ်ကြောင်း သိရသည်။

.

“မြေပြင်မှာ လိုအပ်တာတွေကို သွားရောက်ထောက်ပံ့တာဖြစ်ပါတယ်။ ရှမ်းပြည်နယ်အစိုးရ အနေနဲ့ ကျန်တဲ့ မြို့နယ်တွေကိုလည်း လိုအပ်သလို ထောက်ပံ့သွားဖို့ ရှိပါတယ်။ Facalities Quarantine လုပ်ထားတဲ့ ပြည်တော်ပြန်တွေကိုလည်း ရှမ်းအစိုးရအနေနဲ့ သွားရောက်တွေ့ဆုံအားပေးစကား ပြောကြားခဲ့တာဖြစ်ပါတယ်” ဟု ရှမ်းပြည်နယ်အစိုးရအဖွဲ့ဝင် ပြည်နယ်လူမှုရေးဝန်ကြီး ဒေါက်တာမျိုးထွန်းက ကမ္ဘောဇတိုင်းသို့ ပြောသည်။

.

ဆက်လက်ပြီး ရှမ်းပြည်နယ်ဝန်ကြီးချုပ် ဒေါက်တာလင်းထွဋ်နှင့် ပြည်နယ်အစိုးရအဖွဲ့ဝင် ဝန်ကြီးများ၊ တာဝန်ရှိသူများသည် လွိုင်လင်မြို့နယ်၊ ပန်ခေါက်ဝိုးကျေးရွာရှိ Facalities Quarantine စခန်းနှင့် ပင်လုံမြို့ရှိ Facalities Quarantine စခန်းများသို့ သွားရောက်ကာ ပြည်ပနိုင်ငံများမှ ပြန်လည်ရောက်ရှိလာသူများကို အားပေးစကား ပြောကြားခဲ့ပြီး ပင်လုံကွန်ပျူတာတက္ကသိုလ်တွင် Facalities Quarantine စခန်းများအတွက် ထောက်ပံ့ငွေ ၁၀ သိန်းကျပ် ပေးအပ်ခဲ့ကြောင်း သိရသည်။

.