မိုင်းယောင်းတွင် တောမီးမှတစ်ဆင့် ထပ်လုံစေတီတော်ရှိ ဆွမ်းစားဆောင်များ မီးကူးစက်လောင်ကျွမ်း

စိုင်းအောင်ဇော်လင်း

.

ရှမ်းပြည်နယ်အရှေ့ပိုင်း၊ တာချီလိတ်ခရိုင်၊ မိုင်းယောင်းမြို့နယ်၊ ဝမ်ကောင်းကျေးရွာအုပ်စု၊ ဝမ်တောင်းကျေးရွာအနီး တွင် မတ်လ ၅ ရက် ညနေ ၅ နာရီ၊ ၁၅ မိနစ်ခန့်က တောမီးလောင်ကျွမ်းရာမှတစ်ဆင့် ထပ်လုံစေတီတော် ကုန်းမြေပေါ်ရှိ ဆွမ်းစား ဆောင် ၂ လုံးအား မီးကူးစက်လောင်ကျွမ်းမှု ဖြစ်ပွားခဲ့ကြောင်း သိရသည်။

.

.

မီးလောင်မှုဖြစ်ပွားရာသို့ မိုင်းယောင်းမြို့နယ် မဲဆန္ဒနယ်အမှတ် (၁) မှ ရှမ်းပြည်နယ်လွှတ်တော်ကိုယ်စားလှယ် ဦးအိုက်ခမ်းလှိုင်၊ ယာယီနည်းဗျူဟာမှူး ဒုတိယဗိုလ်မှူးကြီးထွန်းနေဝင်း၊ မြို့နယ်အုပ်ချုပ်ရေးမှူး ဦးညီညီဝင်း၊ မြို့နယ်ရဲတပ်ဖွဲ့မှူး ရဲမှူးမျိုးမြင့်ဦး၊ မြို့နယ်မီးသတ်ဦးစီးမှူး ဦးထွန်းနေလှိုင်နှင့် ဌာနဆိုင်ရာများ၊ နယ်မြေခံ တပ်မတော်သားများ၊ ရဲတပ်ဖွဲ့၊ မီးသတ်တပ်ဖွဲ့နှင့် ကြက်ခြေနီတပ်ဖွဲ့ဝင်များ၊ ရပ်မိရပ်ဖများ၊ ဒေသခံပြည်သူများနှင့် လူမှုရေးအသင်းအဖွဲ့များက မီးသတ်ယာဉ် ၂ စီး၊ ရေသယ်ယာဉ် တစ်စီးနှင့် ဒေသရေသယ်ယာဉ် ၅ စီးဖြင့် ဝိုင်းဝန်းငြှိမ်းသတ်ခဲ့ရာ ညနေ ၅ နာရီခွဲတွင် မီးညွန့်ကျိုးခဲ့ပြီး ၇ နာရီ ၅၅ မိနစ်တွင် မီးငြှိမ်းသတ်နိုင်ခဲ့ကြောင်း သိရသည်။

.

အဆိုပါ မီးလောင်မှုကြောင့် အလျားပေ ၃၀၊ အနံ ၁၈ ပေရှိ RC တစ်ထပ်၊ သွပ်မိုးဆွမ်းစားဆောင် ၂ လုံး၏ သွပ်နှင့် ဒိုင်းမြှားများ မီးကူးစက်လောင်ကျွမ်းခဲ့ပြီး ဆုံးရှုံးမှုတန်ဖိုးကျပ် ၂၀၀၀၀၀ ခန့်ဖြစ်ကာ လူနှင့် တိရစ္ဆာန်များ ထိခိုက်ပျက်စီးဆုံးရှုံးမှု မရှိကြောင်း သိရသည်။

.