.
ရှမ်းပြည်နယ်အရှေ့ပိုင်း၊
မိုင်းပျဉ်းမြို့ရှိ တည်းခိုခန်းများနှင့် ကျိုင်းတုံ- တာချီလိတ်သို့ ပြေးဆွဲနေသည့်
မော်တော်ယာဉ်လိုင်းများကို COVID-19 ကူးစက်မှု ကြိုတင်ကာကွယ်ရေးအတွက်
ဧပြီလ ၃ ရက်တွင် ယာယီ ပိတ်သိမ်းထားကြောင်း သိရသည်။
.
“ တည်းခိုခန်းတွေကတော့
ဧပြီ ၁ ရက်မှာ စ ပိတ်ပြီး ကား ယာဉ်လိုင်းတွေကတော့ ၃ ရက်နေ့မှာ စ ပိတ်လိုက်တာ ဖြစ်ပါတယ်။
အရေးကြီး ကျန်းမာရေး လူနာနဲ့ ကုန်စည်လောက်ပဲ သွားလာဖို့ ခွင့်ပြုပေးထားပါတယ်” ဟု မိုင်းပျဉ်းမြို့ရှိ
ရွှေနမ့်ပိန်း မော်တော်ယာဉ်လိုင်း ဥက္ကဌ ဦးအောင်က ကမ္ဘောဇတိုင်းသို့ ပြောသည်။
.
မိုင်းပျဉ်းမြို့သည်
တောင်ကြီးမြို့မှ ထွက်ခွာလာသည့် ခရီးသည်တင်ယာဉ်နှင့် ကုန်တင်ယာဉ်များ ထမင်းစားနား၊
ညအိပ် ရပ်နားသည့် မြို့ ဖြစ်ပြီး လူနှင့် ယာဉ်အဝင်/အထွက် များပြားသည့် မြို့ ဖြစ်သည်။
.
ထို့အပြင် မိုင်းပျဉ်းမြို့သည်
အထူးဒေသ (၂)၊ (၄) နှင့် ဆက်သွယ် သွားလာနိုင်သည့် ကားလမ်းနှင့် မိုင်းတုံ၊ မိုင်းဆတ်သို့
သွားလာနိုင်သည့် ကားလမ်းများပေါ်တွင် တည်ရှိပြီး မိတ္ထီလာ- တောင်ကြီး- ကျိုင်းတုံ-
တာချီလိတ် ပြည်ထောင်စု လမ်းမပေါ်တွင် ရှိသော မြို့ ဖြစ်ခြင်းကြောင့် ယာဉ်နှင့် လူ
အဝင်/အထွက် များပြားသည့်အတွက် COVID-19 နှင့် ပတ်သက်၍ ဒေသခံများက
စိုးရိမ်မှုများ ဖြစ်ပေါ်နေကြောင်းလည်း သိရသည်။
