လူစုလူဝေး မဖြစ်စေရေးအတွက် မြန်မာ့စီးပွားရေးဘဏ်များတွင် ပင်စင်လစာ ထုတ်ယူခွင့်ကို ရပ်ကွက်/ကျေးရွာ အလိုက် ခွဲခြားထုတ်ပေးမည် - Kanbawza Tai News

Breaking

ကမ္ဘောဇတိုင်းသတင်းဂျာနယ်သည် တောင်ကြီးမြို့တွင် အခြေစိုက်၍ ထုတ်ဝေခွင့်အမှတ် (မြဲ-၀၁၀၇၉)ဖြင့် ဆောင်ရွက်နေသည့် တရားဝင် သတင်းမီဒီယာ တစ်ခု ဖြစ်ပါသည်။

Sunday, April 19, 2020

လူစုလူဝေး မဖြစ်စေရေးအတွက် မြန်မာ့စီးပွားရေးဘဏ်များတွင် ပင်စင်လစာ ထုတ်ယူခွင့်ကို ရပ်ကွက်/ကျေးရွာ အလိုက် ခွဲခြားထုတ်ပေးမည်


ထက်တိုင်းကျော်
.
မြန်မာ့စီးပွားရေးဘဏ် (ရုံးချုပ်) စီမံခန့်ခွဲရေးဌာန၊ နေပြည်တော်၏ ညွှန်ကြားချက်အရ COVID-19 ကပ်ရောဂါ ကူးစက်မှုမှုမှ ကြိုတင်ကာကွယ်နိုင်ရန် လူစုလူဝေး မဖြစ်ပေါ်စေရေးအတွက် မြန်မာ့စီးပွားရေး ဘဏ်ခွဲများတွင် ပင်စင်လစာခံစားနေသည့် အငြိမ်းစားဝန်ထမ်းဟောင်းများ၏ ပင်စင်လစာ ထုတ်ယူခွင့်ကို ရပ်ကွက်/ကျေးရွာအုပ်စု နယ်မြေအလိုက် ခွဲခြားထုတ်ပေးသွားမည်ဖြစ်ကြောင်း သိရသည်။
.
.
ယင်းညွှန်ကြားချက်အရ ပင်စင်အငြိမ်းစားလစာ ခံစားထုတ်ယူကြမည့် နိုင်ငံ့ဝန်ထမ်းဟောင်းများအား COVID-19 ကပ်ရောဂါ ကူးစက်မှုမရှိစေရေးအတွက် ဘဏ်ခွဲအဆောက်အဦနှင့် ဘဏ်ဝင်းအတွင်း စနစ်တကျ နေရာချထားရေး၊ ကျန်းမာရေးစောင့်ရှောက်မှုနှင့် လုံခြုံမှုရှိစေရေးအတွက် ဆောင်ရွက်သွားမည်ဖြစ်ပြီး ပင်စင်ထုတ်ယူနိုင်သည့် ရက်များ အတွင်း လူဦးရေ အကန့်အသတ်ဖြင့် စနစ်တကျ လာရောက်ထုတ်ယူကြရန် မေတ္တာရပ်ခံထားကြောင်း သိရသည်။
.
“ကျိုင်းတုံမြန်မာ့စီးပွားရေးဘဏ်ခွဲကနေ ကျွန်တော်တို့ ရပ်ကွက်/ကျေးရွာအုပ်စုတွေကို မြို့နယ်အုပ်ချုပ်ရေးမှူးရုံး ကနေတစ်ဆင့် အသိပေးအကြောင်းကြားစာတွေ ပေးထားလို့ ကျွန်တော်တို့လည်း ပင်စင်စားတွေကို အသိပေး ပြောထားပါတယ်” ဟု ကျိုင်းတုံမြို့၊ အမှတ် (၁) ရပ်ကွက်အုပ်ချုပ်ရေးမှူး ဦးစိုင်းလုံက ကမ္ဘောဇတိုင်းသို့ ပြောသည်။
.
ယင်းကဲ့သို့ ပင်စင်လစာများအား ခွဲခြားထုတ်ပေးမှုနှင့် ပတ်သက်၍ ကျိုင်းတုံမြို့နေ စစ်မှုထမ်း အငြိမ်းစား တစ်ဦး ကလည်း “အခုလို COVID-19 ရောဂါ ကာကွယ်ရေး အတွက် သတိထားနေရတဲ့အချိန်မှာ ပင်စင်စားတွေနဲ့ လူစုလူဝေး မဖြစ်အောင် လုပ်ပေးတာ ကောင်းပါတယ်” ဟု ၎င်း၏ အမြင်ကို ပြောဆိုခဲ့သည်။
.
ရှမ်းပြည်နယ်အရှေ့ပိုင်းရှိ ကျိုင်းတုံပြည်သူ့ဆေးရုံကြီးတွင် COVID-19 ရောဂါ ကူးစက်ခံထားရသည့် လူနာ ၂ ဦး တက်ရောက်ဆေးကုသမှု ခံယူနေလျက်ရှိကြောင်း သိရသည်။
.

No comments:

Post a Comment

Journal Download

Photo of three cats

About